গুৱাহাটী, 10 ফেব্ৰুৱাৰীঃ নিজৰ অস্তিত্বৰ সম্পৰ্কে সমাজ আৰু চৰকাৰক অৱগত কৰোৱাৰ বাবে গুৱাহাটীৰ দীঘলীপুখুৰী পাৰত দেওবাৰে বাহিৰ কৰা হয় সমকামী সকলৰ এক বাৰেবৰণীয়া শোভাযাত্ৰা । 2018 চনৰ 6 ছেপ্তেম্বৰত উচ্চতম ন্যায়ালয়ে সমকামীতাক বৈধ ঘোষণা কৰাৰ পিছতো সমাজৰ লগতে চৰকাৰৰ কোনো ধৰণৰ সঁহাৰি আৰু সমৰ্থন লাভ কৰা নাই এই সকল লোকে ৷ বৰ্তমানেও সমাজে সম-লিংগৰ দুগৰাকী ব্যক্তিৰ মাজত হোৱা বিবাহক বৈধ বুলি মানি নলয় ৷ লগতে সমকামী অভিভাৱক সকলেও সন্তান তুলি লোৱাৰ পৰা এতিয়াও বঞ্চিত । আনহাতে উচ্চতম ন্যায়ালয়ৰ নিৰ্দেশৰ পিছতো স্কুল কলেজৰ পাঠ্যক্ৰমত অন্তৰ্ভুক্ত কৰা হোৱা নাই সমকামিতা বিষয়ে কোনো তথ্য ।
যাৰ বাবেই সমাজক সচেতন কৰিবৰ বাবে এওঁলোকৰ এই যাত্ৰা । সমাজত নিজৰ অস্তিত্বক লৈ গৌৰৱৰে জীয়াই থকা, অধিকাৰ বিচৰাৰ লগতে স্কুল-কলেজৰ পাঠ্যক্ৰমত সমকামিতা বিষয়ৰ পাঠ অন্তৰ্ভুক্ত কৰা, এওঁলোকৰ বাবে অসমত কল্যাণ মণ্ডল গঠন কৰা, আৰ্থিক আৰু সামাজিক কল্যাণ আঁচনি প্ৰস্তুত কৰা, সমকামী লোক সকলৰ বাবে পেঞ্চন আৰু বীমা আদিৰ সুবিধা প্ৰদান কৰাৰ দাবী জনায় চৰকাৰক ৷ লগতে Transgender Persons Act, 2019 ৰো সংশোধনৰ দাবী জনায় ৷
এই শোভাযাত্ৰাত দেখা পোৱা গৈছে ঘৰৰ পৰা পূৰ্ণ সমৰ্থন লাভ কৰা বহু যুৱক-যুৱতিক যিয়ে স-গৌৰৱৰে ওলাই আহিছে নিজৰ অধিকাৰ বিচাৰি । এই সমাজক এই চৰকাৰক সজাগ কৰিবলৈ লগতে নিজৰ অস্তিত্বক সমাজক দেখাবলৈ ওলাই আহিছে তেওঁলোক ৷ এইয়া হৈছে এওঁলোকৰ অস্তিত্বৰ ৰক্ষাৰ যুঁজ, স্বাধীন ভাৰতত থকা গণতান্ত্ৰিক অধিকাৰ দাবীৰ যুঁজ ।
এই সমাজ আৰু চৰকাৰে উপলুঙা কৰিলেও নিজৰ অস্তিত্বৰ বাবে ওলাই আহিছে এই সকল সচেতন যুৱক-যুৱতী । আধুনিকতাৰ যুগৰ গণতান্ত্ৰিক ভাৰতৰ এই সকল হৈছে সজাগ যুৱক-যুৱতী । সমাজে এওঁলোকক বিমুখ কৰি আহিছে যদিও নিজৰ অস্তিত্ব, অধিকাৰৰ বাবে চলাই গৈছে সংগ্ৰাম । এতিয়া প্ৰশ্ন, সমকামিতাৰ দৰে বিষয়বোৰত কিমান সজাগ আমাৰ সমাজ আৰু চৰকাৰ তথা প্ৰশাসন ।
