গুৱাহাটী, ১৭ নৱেম্বৰ: ব্যতিক্ৰমী তথা নিজস্ব গায়ন শৈলীৰে হাজাৰ হাজাৰ শ্ৰোতাক মন্ত্ৰমুগ্ধ কৰা জনপ্ৰিয় কণ্ঠশিল্পী জীনা ৰাজকুমাৰীয়ে এইবাৰ এগৰাকী গ্ৰন্থ ৰচক হিচাপে পৰিচিত হৈছে । মংগলবাৰে গুৱাহাটী প্ৰেছ ক্লাবত এক গাম্ভীৰ্যপূৰ্ণ অনুষ্ঠানত তেওঁৰ দ্বাৰা ৰচিত “চক্ৰবেহু” আৰু “প্ৰতিবিম্ব” নামৰ দুখন গ্ৰন্থ উন্মোচন কৰা হয় ।
অনুষ্ঠানখনত ৰাজকুমাৰীয়ে মনৰ ভাৱ প্ৰকাশ কৰি কয় যে, কৰ'ণা মহামাৰীকালীন তলাবন্ধৰ কঠিন সময়চোৱাত নিজকে কিছু সৃষ্টি কৰ্মত নিয়োজিত কৰাৰ ফলতেই এই গ্ৰন্থ দুখন লিখি উলিয়াবলৈ সক্ষম হৈছে বুলি মন্তব্য কৰে । এগৰাকী কৰ্কত ৰোগী হিচাপে নিজস্ব অভিজ্ঞতাৰে জুমুঠিত কল্পনাৰ বোল সানি ৰোগবিধৰ সম্পৰ্কত সজাগতা সৃষ্টিৰ বাবে “চক্ৰবেহু” নামৰ উপন্যাসখন ৰচনা কৰে ৷ তেওঁৰ জীৱনৰ বহু অভিজ্ঞতাসমূহৰ প্ৰতিফলন ঘটা আৰু বাতৰি কাকতত প্ৰকাশিত বিভিন্ন প্ৰবন্ধৰে “প্ৰতিবিম্ব”নামৰ আনখন প্ৰৱন্ধও যুগুতোৱা হৈছে বুলি তেওঁ মন্তব্য কৰে । “চক্ৰবেহু” গ্ৰন্থখনি উন্মোচন কৰে বিশিষ্ট সাহিত্যিক তথা সাহিত্য অকাডেমী বঁটা বিজয়ী বিপুল দেউৰী আৰু “প্ৰতিবিম্ব” গ্ৰন্থখনি উন্মোচন কৰে অসম সাহিত্য সভাৰ প্ৰাক্তন সভাপতি ডঃ পৰমানন্দ ৰাজবংশীয়ে ৷
ইপিনে,উক্ত অনুষ্ঠানখনত সাংবাদিক গৌতম শৰ্মাই ৰচনা আৰু মনোজ শৰ্মাই সুৰেৰে সজোৱা জীনা ৰাজকুমাৰীৰ “সন্ধ্যাতৰা” শীৰ্ষক এটি ভিডিঅ’ গীতো মুক্তি দিয়া হয় । গীতটি মুকলি কৰে জ্যেষ্ঠ শিল্পী সুদক্ষিণা শৰ্মাই । অনুষ্ঠানখনত নৃত্যাচাৰ্য যতীন গোস্বামী,ডাঃ অঞ্জনজ্যোতি চৌধুৰী,ৰুবী কটকী,ময়ুৰী দত্ত,তৃষ্ণা দেৱী, হিয়া মেধি,গোপাল জালানকে ধৰি কেবাগৰাকীও গণ্য-মান্য ব্যক্তি উপস্থিত থাকে ।
অন্য এক খবৰৰ বাবে: দালাই লামাক ভাৰত ৰত্ন দিয়াৰ দাবী তিব্বত মুক্তি আন্দোলনৰ নেতাৰ
