গুৱাহাটী,৯ অক্টোবৰ : দুদিনৰ জেৰাৰ পাছত দেওবাৰে পুনৰ দিছপুৰ থানাত হাজিৰ হ'ব লাগিব ডাঃ নভনীল বৰুৱা । আজিও প্ৰায় দহ ঘণ্টা জেৰা কৰাৰ পাছত জি এন আৰ চি হাস্পতালৰ চিকিৎসক ডাঃ নভনীল বৰুৱাক স্বাস্থ্য পৰীক্ষা সম্পন্ন কৰি ঘৰলৈ যাব দিয়া হয় । শুকুৰবাৰে প্ৰায় দহ ঘণ্টা জেৰা কৰাৰ পাছত আজি পুনৰ দিনজোৰা জেৰা চলোৱা হয় জ্যেষ্ঠ চিকিৎসক গৰাকীক ।
পুনৰ দেওবাৰে তেওঁ হাজিৰ হ’ব লাগিব দিছপুৰ থানাত । পুৱা ১০ বজাত ডাঃ বৰুৱাক জেৰাৰ বাবে পুনৰ হাজিৰ হোৱাৰ নিৰ্দেশ দিয়া হৈছে । শুকুৰবাৰে প্ৰথম ৰাজকন্যা বৰুৱা কাণ্ডৰ সন্দৰ্ভত দিছপুৰ আৰক্ষীয়ে জেৰা কৰিছিল ডাঃ বৰুৱাক । প্ৰথম দিনাৰ জেৰাৰ অন্তত স্বাস্থ্য পৰীক্ষা কৰি তেওঁক যাবলৈ দিয়া হৈছিল ঘৰলৈ ।
দ্বিতীয় দিনাও অনুৰূপ ধৰণেই দীৰ্ঘসময় জেৰাৰ অন্তত স্বাস্থ্য পৰীক্ষা কৰি ঘৰলৈ যোৱাৰ অনুমতি দিয়ে আৰক্ষীয়ে । উল্লেখ্য যে, ১ অক্টোবৰৰ নিশা ১.৩০ বজাত আঠজনকৈ শ্ৰমিকক সুৰামত্ত হৈ বাহনেৰে মহতীয়াই নিয়া বিতৰ্কিত মডেল ৰাজকন্যা বৰুৱাক ৰক্ষণাবেক্ষণ দিয়াৰ অভিযোগ উত্থাপিত হৈছে ডাঃ নভনীল বৰুৱাৰ বিৰুদ্ধে ।
ৰাজকন্যা বৰুৱাক গ্ৰেপ্তাৰৰ পৰা বচাবলৈ ডাঃ নভনীল বৰুৱাই জি এন আৰ চি হাস্পতালৰ চেমি আই চি ইউত ভৰ্তি কৰাৰ সুবিধা কৰি দিছিল । মেডিকেল ব'ৰ্ডৰ ৰিপৰ্টত ৰাজকন্যা বৰুৱা সুস্থ বুলি প্ৰমাণ হোৱাৰ পাছতেই ডাঃ নভনীল বৰুৱাৰ অভিসন্ধি পোহৰলৈ আহে । ইফালে, ৰাজকন্যা বৰুৱাক ইতিমধ্যে ১৪ দিনৰ ন্যায়িক জিম্মালৈ প্ৰেৰণ কৰা হৈছে ।
আনহাতে, ৰাজকন্যা বৰুৱাক ৰক্ষণাবেক্ষণ দিয়াৰ অভিযোগত বিপদত পৰিছে জি এন আৰ চি কৰ্তৃপক্ষ আৰু ডাঃ নভনীল বৰুৱা । আৰক্ষীৰ চমন লাভ কৰাৰ পাছত শুকুৰবাৰে দিছপুৰ থানাত হাজিৰ হোৱা ডাঃ নভনীল বৰুৱাক ১০ ঘণ্টা জেৰা কৰা হয় । জেৰাৰ অন্তত নিশা জি এম চি এইচত স্বাস্থ্য পৰীক্ষা কৰাই ঘৰলৈ যাব দিয়া হয় । শুকুৰবাৰে জি এন আৰ চিৰ চিকিৎসা অধীক্ষক সুব্ৰত ভাগৱতীকো জেৰা কৰা হয় । আজি পুনৰ জেৰাৰ সন্মুখীন হয় নভনীল বৰুৱা । দেওবাৰে পুনৰ তেওঁ জেৰাৰ সন্মুখীন হ'ব লাগিব ।
লগতে পঢ়ক : ৰাজকন্যাৰ গাড়ীৰ খুন্দাত আহত শ্ৰমিকক উপযুক্ত ক্ষতিপূৰণৰ দিয়াৰ দাবী
