গুৱাহাটী, ২০ জুন : আজি বিষ্ণু ৰাভা দিৱস (Bishnu Prasad Rabha Divas) । বিষ্ণু ৰাভাৰ প্ৰতি সন্মান জনাই প্ৰতি বছৰে ২০ জুনৰ দিনটোত প্ৰতিবছৰে "বিষ্ণু ৰাভা দিৱস" হিচাপে পালন কৰি অহা হৈছে । এইবাৰো ৰাজ্যৰ বিভিন্ন প্ৰান্তৰ লগতে মহানগৰীত বিভিন্ন অনুষ্ঠান প্ৰতিষ্ঠানৰ উদ্যোগত পালন কৰা হয় বিষ্ণু ৰাভা দিৱস ।
দেওবাৰে সদৌ গুৱাহাটী ছাত্ৰ সন্থাৰ উদ্যোগত ৫৩ তম কলাগুৰু বিষ্ণু ৰাভা দিৱস উদযাপন কৰা হয় (Bishnu Rabha Divas observed in Guwahati) । মহানগৰীৰ খানাপাৰাৰ ক্ৰীড়া আৰু সাংস্কৃতিক খেলপথাৰ প্ৰাংগনত এই কেন্দ্ৰীয় বিষ্ণু ৰাভা দিৱসটি অনুষ্ঠিত কৰা হয় । পতাকা উত্তোলন আৰু শ্বহীদ তৰ্পনেৰে আৰম্ভ হোৱা এই অনুষ্ঠানত কলাগুৰুৰ প্ৰতিচ্ছবিত মাল্যৰ্পন আৰু বন্তি প্ৰজ্বলন কৰে সংগীত নাটক অকাডেমী বঁটাপ্ৰাপক ভাস্কৰ্য শিল্পী নুৰুদ্দিন আহমেদে ।
বিষ্ণু ৰাভা দিৱসৰ লগত সংগতি ৰাখি ছাত্ৰ-ছাত্ৰীসকলৰ মাজত বিষ্ণু ৰাভা সংগীত প্ৰতিযোগিতা, একক নৃত্য প্ৰতিযোগিতা, চিত্ৰাংকণ আৰু আবৃত্তিৰ এখন প্ৰতিযোগিতাও অনুষ্ঠিত কৰা হয় । সন্ধিয়া বটা বিতৰণি অনুষ্ঠানৰ লগতে এখনি সাংস্কৃতিক অনুষ্ঠানৰো আয়োজন কৰা হয় ।
ইফালে, অসম নাট্য সন্মিলনৰ (Assam Natya Sammelan) মহানগৰ আঞ্চলিক শাখাৰ উদ্যোগতো বিষ্ণু ৰাভা দিৱস উদযাপন কৰা হয় । মহানগৰীৰ ৰূপনগৰস্থিত অসম ৰাজ্যিক মুক্তি যুজাৰু ভৱনতো বিষ্ণু ৰাভা দিৱসৰ লগত সংগতি ৰাখি এখনি মুকলি সভা অনুষ্ঠিত হয় ।
