গুৱাহাটী, ৩০ অক্টোবৰ : ৰাজ্যৰ পাঁচটাকৈ বিধানসভা সমষ্টিত শনিবাৰে উপ নিৰ্বাচনৰ ভোটদান চলি থকা সময়তে মুখ্যমন্ত্ৰী ড৹ হিমন্তবিশ্ব শৰ্মাই বেংগালুৰুত বাহৰ পাতি আছে । মুখ্যমন্ত্ৰীগৰাকীয়ে বেংগালুৰুত নিৰ্মাণ হ’বলগীয়া প্ৰস্তাৱিত অসম ভৱনৰ নিৰ্মাণস্থলী পৰিদৰ্শন কৰে । ড৹ শৰ্মাই পৰিদৰ্শন কালত বিষয়াবৰ্গৰ সৈতে প্ৰস্তাৱিত অসম ভৱনৰ বিষয়ে বিস্তৃতভাৱে আলোচনা কৰে ।
তেওঁ বেংগালুৰু উন্নয়ন কৰ্তৃপক্ষৰ সৈতে যোগাযোগ কৰি এই সম্পৰ্কীয় যাৱতীয় অনুমতি আদিৰ ব্যৱস্থা কৰিবলৈও বিষয়াবৰ্গক নিৰ্দেশ দিয়ে । স্মৰ্তব্য যে, অসম চৰকাৰে ইতিমধ্যে নতুন দিল্লীৰ দ্বাৰকা, কলকাতাৰ ৰাছেল ষ্ট্ৰীট, চণ্ডীগড়,পণ্ডিচেৰী আৰু হায়দৰাবাদকে ধৰি দেশৰ কেইবাখনো চহৰত অসম ভৱন নিৰ্মাণৰ পদক্ষেপ হাতত লৈছে । নতুন দিল্লীৰ দ্বাৰকাত নিৰ্মাণ হ’বলগীয়া অসম ভৱনত অসমৰ ছাত্ৰ-ছাত্ৰী আৰু ৰোগীৰ বাবে বিশেষ ব্যৱস্থা ৰাখিবলৈও বিষয়াবৰ্গক নিৰ্দেশ দিয়ে মুখ্যমন্ত্ৰীগৰাকীয়ে ।
লগতে পঢ়ক : 69.60 শতাংশ ভোটদানেৰে পাঁচ সমষ্টিত উপ-নিৰ্বাচনৰ ভোটদান সম্পন্ন
