গুৱাহাটী, ১৪ জুলাই : গুৱাহাটী মহানগৰীৰ সুৰাপায়ীসকলৰ বাবে সুখবৰ । এতিয়াৰে পৰা অনলাইন (Online) যোগে গুৱাহাটী পৌৰ নিগম এলেকাত উপলব্ধ হ'ব সুৰা । এই সন্দৰ্ভত বুধবাৰে ৰাজ্যিক কেবিনেটে গ্ৰহণ কৰে সিদ্ধান্ত । কেবিনেট বৈঠকৰ পাছত জনতা ভৱনত আয়োজন কৰা এখন সংবাদমেলত স্বাস্থ্যমন্ত্ৰী কেশৱ মহন্ত (Keshab Mahanta) আৰু জলসম্পদ মন্ত্ৰী পীয়ুষ হাজৰিকাই (Piyush Hazarika) এই কথা সদৰি কৰে । ক'ভিড পৰিস্থিতিৰ বাবে এই সিদ্ধান্ত গ্ৰহণ কৰা হৈছে বুলি উল্লেখ কৰি মন্ত্রীদ্বয়ে কয়-' সান্ধ্য আইনৰ সময়ৰ আগে আগে সুৰাৰ বিপণীৰ সমুখত অতিমাত্ৰা ভিৰ হোৱাৰ প্ৰতি লক্ষ্য ৰাখিয়েই এই সিদ্ধান্ত গ্ৰহণ কৰা হৈছে ।
এই সন্দৰ্ভত উচ্চতম ন্যায়ালয় আৰু মাদ্ৰাছ উচ্চ ন্যায়ালয়ে দিয়া এক নিৰ্দেশৰ ভিত্তিতে ক'ভিড পৰিস্থিতিৰ প্ৰতি লক্ষ্য ৰাখি অসম চৰকাৰে এই সিদ্ধান্ত গ্ৰহণ কৰিছে । অৱশ্যে আৰম্ভণিতে কেৱল ১ মাহৰ বাবে পৰীক্ষামূলক ভাৱে আৰম্ভ হ'ব এই অনলাইন সুৰা যোগান তথা হোম ডেলিভাৰী পদ্ধতি । পৰিস্থিতিৰ প্ৰতি লক্ষ্য ৰাখি পিছলৈ এই ব্যৱস্থাৰ ক্ষেত্রত ৰাজ্য চৰকাৰে সিদ্ধান্ত গ্ৰহণ কৰিব । বৰ্তমান কেৱল গুৱাহাটী পৌৰ নিগমৰ অধীনৰ অঞ্চলতহে অনলাইন যোগে সুৰা লাভ কৰিব পৰা যাব।'
উল্লেখ যে, মুখ্যমন্ত্ৰী ড৹ হিমন্ত বিশ্ব শৰ্মাৰ অধ্যক্ষতাত জনতা ভৱনত অনুষ্ঠিত নৱমখন কেবিনেট বৈঠকত (9th Cabinet Meeting) আন কেইবাটাও গুৰুত্বপূৰ্ণ সিদ্ধান্ত গ্ৰহণ কৰা হয় । কেবিনেটত গ্ৰহণ কৰা সিদ্ধান্ত অনুসৰি শীতকালীন সময় চাহ বাগানসমূহত কাম কম থকাৰ পৰিপ্ৰেক্ষিতত শ্ৰমিকসকলৰ বাবে এম জি এনৰেগাৰ (MGNREGA) অধীনত কাম দিয়া হ'ব ।
আনহাতে গ্ৰাম্য অৰ্থনীতি শক্তিশালী কৰাৰ উদ্দেশ্যে গাঁৱত এম জি এনৰেগাৰ অধীনত পুখুৰী খন্দাত অগ্ৰাধিকাৰ দিয়া হ'ব । তদুপৰি ঘৰে ঘৰে অগৰু, চন্দন আদি মূল্যবান গছ ৰোপণৰ ব্যৱস্থা কৰা হ'ব । ইয়াৰ বাবে অভিভাৱক মন্ত্রী আৰু খণ্ড উন্নয়ন বিষয়া (BDO) সকলে পৰিকল্পনা প্ৰস্তুত কৰিব । সেইদৰে পঞ্চদশ বিত্তীয়ৰ ধনৰে স্কুল, অংগনবাড়ী গৃহ, পাৰ্ক আদি নিৰ্মাণৰ আঁচনিত কেবিনেটে অনুমোদন জনায় ।
সমান্তৰালকৈ ডব্লিউ পি টি চি (WPTC)ৰ অধীনত জনজাতীয় বিষয়সমূহ গৱেষণা কৰাৰ ক্ষেত্রত কেবিনেটত সিদ্ধান্ত গ্ৰহণ কৰা হয় । কেবিনেটৰ সিদ্ধান্ত অনুসৰি গুৱাহাটী উন্নয়ন বিভাগ আৰু নগৰ উন্নয়ন বিভাগক একলগ কৰি ‘হাউচিং এণ্ড আৰবান পৰিক্ৰমা দপ্ত’ৰ এটা কেন্দ্ৰীয় চৰকাৰৰ আৰ্হিত গঠন কৰা হৈছে । সেইদৰে জি.এ.ডি (GAD) আৰু এছ.এ.ডি (SAD)ক একলগ কৰি সাধাৰণ প্ৰশাসনীয় বিভাগ কৰা হৈছে।
সংবাদ মাধ্যমৰ স্বতাধিকাৰীসকলে চৰকাৰী বিজ্ঞাপনৰ ক্ষেত্রত পাবলগীয়া ধনৰ বাবে এতিয়াৰে পৰা অপেক্ষা কৰিব নালাগে । জনসংযোগ বিভাগে প্ৰত্যক্ষভাৱে চিলিং দিব পাৰিব । বিত্ত বিভাগলৈ যাব নালাগে ।
খৰাং পীড়িত অঞ্চল হিচাপে চিহ্নিত গোলাঘাট আৰু সৰুপথাৰ খণ্ডৰ সংশ্লিষ্ট অঞ্চলত মন্ত্রী যোগেন মহন (Jogen Mahan) আৰু অশোক সিংঘাল (Ashok Singhal) গৈ পৰিস্থিতিৰ বুজ লৈ সাহাৰ্য দিয়াৰ ব্যৱস্থা কৰিব । সেইদৰে এশ বছৰ পুৰণি মুখ্য ন্যায়াধীশৰ আৱাসগৃহটো ঐতিহ্যপূৰ্ণ ভৱন (Heritage house) হিচাপে সংৰক্ষিত কৰা হ'ব ।
লগতে পঢ়ক-অৱনমিত বিধানসভাৰ মৰ্যাদা : অধ্যক্ষ-বিধায়কৰ ভূমিকাক লৈ ৰাজ্যজুৰি প্ৰতিক্ৰিয়া
