ধুবুৰী, 14 জুন : ভাৰত-বাংলা সীমান্তত বিএছ এফে অস্থায়ী কাইঁটীয়া তাঁৰৰ বেৰ দিয়াত বিন্নাচৰা আৰু বালাডবা গাঁৱৰ মাজত সৃষ্টি হৈছে এক চেপা উত্তেজনাৰ ৷ জানিব পৰা মতে, অঞ্চলটোৰ ভাৰত-বাংলা সীমান্তত থকা কাইঁটীয়া তাঁৰৰ বহু অংশ নৈৰ বুকুত উটি যোৱাৰ ফলত উন্মুক্ত হৈ পৰিছে এই ভূমিখণ্ড ।
তেনে সময়তে ধুবুৰীৰ ভাৰত-বাংলা সীমান্ত অঞ্চলৰ বিন্নাচৰা আৰু বালাডবা গাঁৱৰ মাজত সোমাই গংগাধৰ নৈৰ পাৰে পাৰে বৃহৎ অংশ বি এছ এফে অস্থায়ী বেৰ দিয়াত ৰাইজৰ মাজত হাহাকাৰ পৰিস্থিতিৰ সৃষ্টি হৈছে ৷
উন্মুক্ত সীমান্তৰ বাবে গংগাধৰ নৈৰ পাৰে পাৰে অস্থায়ীভাৱে কাইঁটীয়া তাঁৰৰ বেৰ নিৰ্মাণ কৰি সীমান্ত অঞ্চলত চোৰাং ব্যৱসায় আৰু অপৰাধজনিত ঘটনা ৰোধ কৰাৰ প্ৰয়াস কৰিব বিচাৰিছে বি এছ এফে । কিন্তু এইখিনিতে লক্ষণীয় বিষয় যে, এই অস্থায়ী কাইঁটীয়া তাঁৰৰ সিপাৰে ভাৰতীয় এলেকাৰ নদীত গা-ধোৱা, পানী সংগ্ৰহ কৰা বা সিপাৰে থকা খেতিত কাম কৰিবলৈ যাওঁতে বি এছ এফৰ অনুমতিৰ প্ৰয়োজন হ’ব বুলি জানিব পৰা গৈছে ।
আনকি এটা সময়ত বাংলাদেশীয়ে উন্মুক্ত সীমান্তৰে আহি ভাৰতীয় কৃষকৰ কৃষিভূমি দখল কৰিব পাৰে বুলিও আশংকা প্ৰকাশ কৰিছে স্থানীয় ৰাইজে । এনে ধৰণৰ অভিযোগ উত্থাপন কৰি এক প্ৰকাৰ উত্তেজিত হৈ পৰিছে বিন্নাচৰা আৰু বালাডবা অঞ্চলৰ ৰাইজ ।
অৱশ্যে বি এছ এফে অস্থায়ীভাৱেহে কাইঁটীয়া তাঁৰৰ বেৰ নিৰ্মাণ কৰা বুলি মন্তব্য কৰিছে ৷ যদিও স্থানীয় ৰাইজৰ সৈতে বি এছ এফে এই সন্দৰ্ভত কোনো আলোচনা কৰা নাই বুলি জানিব দিয়ে । যাৰ বাবে ৰাইজৰ মাজত বিভিন্ন শংকা দেখা দিয়াৰ সমান্তৰালকৈ ক্ষোভিত হৈ পৰিছে সীমান্তবাসী ভাৰতীয় লোকসকল ৷ সমগ্ৰ ঘটনা সন্দৰ্ভত বিন্নাচৰা বালাডবা অঞ্চলৰ গাঁৱৰ ৰাইজে সংবাদ মাধ্যমৰ যোগেদি বিচাৰিছে চৰকাৰৰ হস্তক্ষেপ ৷
লগতে পঢ়ক : নৌকা যাত্ৰাৰে ব্ৰহ্মপুত্ৰৰ খহনীয়া পৰিদৰ্শন মন্ত্ৰী পীযুষ হাজৰিকাৰ
