নেশ্যনেল ডেস্ক,২৪ মাৰ্চ: ম্যানমাৰৰ শৰণাৰ্থীক উত্তৰ পূৰ্বাঞ্চলৰ ৰাজ্যসমূহত বিতাড়িত কৰাৰ সন্দৰ্ভত দেশৰ গৃহ মন্ত্ৰালয়ে পত্ৰ প্ৰেৰণ কৰাৰ পিছতে প্ৰতিবাদমুখৰ হৈ পৰিছে মিজোৰাম । মঙলবাৰে জ' ৰিইউনিফিকেশ্বন সংস্থায়েও (জোৰো) গৃহ মন্ত্ৰালয়ৰ পত্ৰৰ বিৰুদ্ধে প্ৰতিবাদ সাব্যস্ত কৰে ।
শৰণাৰ্থীসকলক তাৎক্ষণিকভাৱে বিতাড়ন কৰাৰ সন্দৰ্ভত গৃহ মন্ত্ৰালয়ে মিজোৰাম, মণিপুৰ, নাগালেণ্ড, অৰুণাচল প্ৰদেশৰ মুখ্য সচিব আৰু অসম ৰাইফলছৰ ডিজিলৈ প্ৰেৰণ কৰা পত্ৰখন জ্বলাই দি প্ৰতিবাদ সাব্যস্ত কৰে জোৰোৱে । হাতে হাতে ভিন্ন চৰকাৰ বিৰোধী প্লে’কাৰ্ড লৈ চৰকাৰৰ বিৰুদ্ধে শ্ল’গান দিয়ে প্ৰতিবাদকাৰীসকলে ।
জোৰোৱে গৃহ মন্ত্ৰালয়ৰ এই কাৰ্যক গৰিহণা দিয়াৰ লগতে এয়া গ্ৰহণযোগ্য নহয় বুলি মন্তব্য কৰে । প্ৰতিবাদকাৰীসকলে লগতে কয় যে তেওঁলোকে ম্যানমাৰৰ নাগৰিকসকলক পৰিয়ালৰ সদস্যৰ দৰে সকলো ধৰণৰ সহায় আৰু সুৰক্ষা প্ৰদান কৰিব, কিন্তু অবৈধ শৰণাৰ্থী হিচাপে নহয় ।
ভাৰত চৰকাৰে ম্যানমাৰৰ সামৰিক জান্তাৰ নৃশংসতাৰ পৰা ৰক্ষা পাবলৈ ভাৰতলৈ অহা ম্যানমাৰৰ নাগৰিকসকলক শৰণাৰ্থীৰ মৰ্যদা দিব লাগে বুলি দাবী জনাই জোৰোৱে ।
লগতে পঢ়ক: মিজোৰামত পুনৰ এগৰাকী আক্ৰান্ত কৰ'ণাত
