নিউজ ডেস্ক: ভালপোৱা সংজ্ঞাবিহীন ৷ এক বুজাব নোৱাৰা, বুজিব নোৱাৰা শিহৰণেই ভালপোৱা ৷ বয়সক উপেক্ষা কৰি বুকুৱে বুকুৱে বিয়পি থাকে ভালপোৱাৰ ৰং ৷ এই প্ৰেম, ভালপোৱাৰ বাবে নিৰ্দিষ্ট কোনো দিনৰ প্ৰয়োজন নহয় যদিও প্ৰতি বছৰে ফেব্ৰুৱাৰী মাহৰ 7 তাৰিখৰ পৰা 14 তাৰিখলৈ বিশ্বজুৰি পালন কৰি অহা হৈছে ভেলেন্টাইন সপ্তাহ হিচাপে (Valentine Week) ৷ হয়টো আপুনি প্ৰেমৰ সম্পৰ্কত নাই, হয়টো আপোনাক ভালপোৱাই শিঁহৰিত কৰা নাই অথবা বিশেষজনক আপুনি বিচাৰি পোৱা নাই, তথাপি এই বিশেষ সপ্তাহটোক উপেক্ষা কৰিব নোৱাৰে । সপ্তাহটোৰ প্ৰতিটো দিনৰে আছে বিশেষ গুৰুত্ব ৷ ৰ’জ ডে’ৰে সপ্তাহটোৰ বাকী দিনকেইটা একাদিক্ৰমে প্ৰপ’জ ডে’, চকলেট ডে’, টেডি ডে’, প্ৰমিছ্ ডে’, হাগ্ ডে’, কিচ্ ডে’ আৰু শেষৰ দিনটোত ভেলেণ্টাইন ডে’ হিচাপে পালন কৰা হয় ৷
জানো আহক সাতোদিনৰ তাৎপৰ্যসমূহ...
7 ফেব্ৰুৱাৰী: ৰ’জ ডে’
গোলাপক আমি প্ৰেমৰ প্ৰতীক হিচাপে গ্ৰহণ কৰোঁ ৷ সেয়েহে এই দিনটোত প্ৰেম, বিশ্বাস, সন্মানৰ প্ৰতীক হিচাপে গোলাপৰ আদান-প্ৰদান কৰা হয় ৷ প্ৰেমতো থাকে বন্ধুত্ব ৷ যাৰ সংকেত বহন কৰে গোলাপে ৷ ৰঙা ৰঙৰ গোলাপে প্ৰেমৰ অভিব্যক্তি প্ৰকাশ কৰাৰ বিপৰীতে হালধীয়া ৰঙৰ গোলাপেৰে বন্ধুত্বৰ প্ৰস্তাৱ দিয়া হয় ৷
8 ফেব্ৰুৱাৰী: প্ৰপ’জ ডে’
ভেলেণ্টাইন সপ্তাহৰ দ্বিতীয়টো দিন ৷ বিশেষজনক ক’ম ক’ম বুলি কোৱা নোহোৱা বিশেষ কথাটো এই দিনটোতে বিনাদ্বিধাই কোৱা হয় ৷ প্ৰস্তাৱ দিয়া হয় প্ৰেমৰ ৷ আজীৱন একেলগে থাকিবলৈ বিচৰাজনক আনুষ্ঠানিকভাৱে প্ৰস্তাৱ আগবঢ়োৱা এই দিনটো ৰ’জ ডে'ৰ পিছতে বিশেষ দিন হিচাপে গ্ৰহণ কৰা হয় ৷
9 ফেব্ৰুৱাৰী: চকলেট ডে’
ভাল লগাজনক প্ৰেমৰ প্ৰস্তাৱ আগবঢ়োৱাৰ পিছত তেও সেই প্ৰস্তাৱ গ্ৰহণেই কৰক অথবা অগ্ৰাহ্য কৰক, এক মিঠা অনুভূতি প্ৰকাশ কৰিবলৈ এই দিনটোত চকলেট, মিঠাই যঁচা হয় ৷ চকলেট ডে’ক দম্পতিসকলে বছৰটোৰ আটাইতকৈ মধুৰ দিন হিচাপে বিবেচনা কৰে ৷
10 ফেব্ৰুৱাৰী: টেডি ডে’
ভাল পোৱাজনৰ অনুপস্থিতিয়ে যাতে নিসংগতাৰ অনুভৱ কৰাব নোৱাৰে, তাৰ বাবেই এই বিশেষ দিনটোত এটা টেডী বিয়েৰ উপহাৰ দিয়া হয় ৷ যাতে প্ৰিয়জনক টেডী বিয়েৰটোৰ মাজতেই বিচাৰি লৈ আলিঙ্গন কৰিব পাৰে ৷
11 ফেব্ৰুৱাৰী: প্ৰমিছ্ ডে’
এক হোৱা দুটি মন আজীৱন এক হৈ থকাৰ প্ৰতিশ্ৰুতি দিয়া হয় এই দিনটোত ৷ প্ৰতিশ্ৰুতি দিয়া হয়, জীৱন বাটৰ প্ৰতিটো ঘাত-প্ৰতিঘাটত দুয়ো একলগে খোজ দিব ৷ স্থায়ী কৰিব এই সম্পৰ্ক ৷
12 ফেব্ৰুৱাৰী: হাগ ডে’
ভালপোৱাজনক এবাৰ চুই চোৱাৰ, আলিংগন কৰাৰ হেঁপাহে প্ৰতিপলত আমনি কৰে ৷ এই বিশেষ দিনটোত প্ৰেমাস্পদৰ আলিংগনেৰে সাহস দিয়ে দুয়ো দুয়োকে ৷
13 ফেব্ৰুৱাৰী: কিচ্ ডে’
সম্পৰ্ক সুদৃহ কৰাৰ পিছত উদযাপন কৰা হয় এই দিনটো ৷ ভেলেণ্টাইন ডে’ৰ প্ৰাকক্ষণত চুম্বনেৰে প্ৰেমৰ সম্পৰ্কক এক বিশেষ গতি দিয়া হয় ৷ প্ৰিয়জনৰ ওচৰত স্নেহ প্ৰকাশ কৰা হয় ৷
14 ফেব্ৰুৱাৰী: ভেলেণ্টাইন দিৱস
প্ৰেমৰ দিন হিচাপে উদযাপন কৰা হয় ৷ ইজনে-সিজনক দিয়ে অফুৰন্ত সময় ৷ ৰোমান্টিক ভঙ্গী প্ৰকাশ, উপহাৰ আদান-প্ৰদান কৰি বিশেষ দিন হিচাপে উদযাপন কৰা হয় এই দিনটো ৷
