নিউজ ডেস্ক, 5 জুলাই : চলচ্চিত্ৰ এখনৰ দৃশ্যগ্ৰহণ (Shooting)ৰ সময়ত ছবিখনৰ কলা-কুশলী তথা নিৰ্মাতাসকলে বিভিন্ন সমস্যা তথা অসুবিধাত পৰাতো স্বাভাৱিক ৷ কিন্তু এই সমস্যাকো নেওচি চলচ্চিত্ৰ অথবা তথ্যচিত্ৰৰ দৃশ্যগ্ৰহণ অব্যাহত ৰাখিছে ছবি নিৰ্মাতাসকলে ৷ এই সমস্যা সমাধানৰ বাবে আগবাঢ়ি আহিছে উত্তৰ-পূৱ সীমান্ত ৰে'লৱে (North-East Frontier Railway)ই ৷ এতিয়াৰ পৰা আৰু দৃশ্যগ্ৰহণৰ সময়ত পূৰ্বৰ সমস্যাৰ সন্মুখীন হ’ব নালাগে ছবি নিৰ্মাতাসকলে ৷ অনলাইনযোগে উপলব্ধ হৈ পৰিছে চলচ্চিত্ৰৰ দৃশ্যগ্ৰহণৰ সুবিধা ৷
উল্লেখ্য যে, চলচিত্ৰ আৰু তথ্যচিত্ৰৰ দৃশ্যগ্ৰহণৰ বাবে এক জনপ্ৰিয় স্থান হৈছে ‘দাৰ্জিলিং’ (Darjeeling) ৷ দাৰ্জিলিং হিমালয়ান ৰে’লৱে (Darjeeling Himalayan Railway)ৰ কিছুমান আটাইতকৈ মনোৰম স্থান হৈছে- বাটাছিয়া লপু, এগনী পইন্ট, ঘুম ষ্টেচন, দাৰ্জিলিং ষ্টেচন, চুকনা আৰু ৰংটং ষ্টেচনৰ মাজত অৱস্থিত মহানন্দা অভয়াৰণ্য ৷ এই অঞ্চলসমূহত চলচিত্ৰৰ দৃশ্যগ্ৰহণ কৰিবলৈ যাওতে বহু অসুবিধাৰ সন্মুখীন হয় প্ৰযোজক অথবা পৰিচালকসকল ৷ এখন ছবিৰ দৃশ্যগ্ৰহণৰ বাবে কেতিয়াবা দুই-তিনিবাৰলৈকে দৃশ্যগ্ৰহণথলীলৈ অহা-যোৱা কৰিবলগীয়া পৰিস্থিতিৰ সন্মুখীন হয় ছবি নিৰ্মাতাসকল ৷ যাৰ ফলস্বৰূপে ছবিখনত ব্যয় হোৱা ধনকে ধৰি কেতিয়াবা ছবিখনৰ দৃশ্যগ্ৰহণৰ সময়-সূচীও সাল-সলনি কৰিবলগীয়া হোৱাত বহু সমস্যা আহি পৰে ৷
এই সমস্যাসমূহ সমাধানৰ ক্ষেত্ৰত সোমবাৰে উত্তৰ-পূৱ সীমান্ত ৰে’লৱেৰ মুখ্য জন সম্পৰ্কৰক্ষী বিষয়া শুভানন চন্দে ৰে'লৱেৰ ৱেবছাইটত প্ৰযোজক তথা উৎসাহীৰ লোকৰ বাবে এটা লিংক প্ৰদান কৰিছে ৷ লিংকটো হৈছে https://nfr.indiarailways.Gov.in/ ৷
ওপৰত উল্লেখিত দাৰ্জিলিঙৰ বিভিন্ন স্থানত ইতিমধ্যে 25 খনতকৈ অধিক বলীউড চলচ্চিত্ৰৰ দৃশ্যগ্ৰহণ কৰা হৈছে ৷ ঠাইসমূহত ইতিমধ্যে দৃশ্যগ্ৰহণ কৰা কেইখনমান জনপ্ৰিয় চলচ্চিত্ৰ হৈছে ‘জব প্যাৰ কিচি চে হোতা হে’ (1961), ‘চাইনা টাউন’ (1962), ‘আৰাধনা’ (1969), ‘ৰাজু বন গয়া জেন্টলমেন’ (1992), ‘পৰিণীতা’ (2005), ‘বৰফি’ (2012) আৰু ‘জাগ্গা জাসুচ’ (2017) ৷ শেহতীয়াকৈ চলিত বৰ্ষৰ জানুৱাৰী মাহতো মাদাৰ টেৰেচাৰ ওপৰত এখন তথ্যচিত্ৰৰ দৃশ্যগ্ৰহণ শিলিগুৰি জংচনৰ পৰা কাৰ্ছিয়াঙলৈ ট্ৰয়-ট্ৰেইন এখনত কৰা হৈছিল ৷
