নেশ্যনেল ডেস্ক, ১৯ জুলাই : ৰাষ্ট্ৰীয় জনতা দলৰ নেতা তথা ৰাজ্যসভাৰ সাংসদ মনোজ ঝা(Manoj Jha)ই ক'ভিডত হোৱা মৃত্যুৰ প্ৰকৃত তথ্য লুকুওৱাৰ অভিযোগ উত্থাপন কৰিছে কেন্দ্ৰীয় চৰকাৰৰ বিৰুদ্ধে । সাংসদগৰাকীয়ে ইটিভি ভাৰতৰ আগত কয় যে, ক'ভিড-১৯ৰ দ্বিতীয় ঢৌৰ সময়ত কেন্দ্ৰই পৰিস্থিতি নিয়ন্ত্ৰণৰ ক্ষেত্ৰত সম্পূৰ্ণৰূপে ব্যৰ্থ হৈছে । লগতে দ্বিতীয় ঢৌৰ সময়ত হোৱা মৃত্যুৰ প্ৰকৃত তথ্য কেন্দ্ৰীয় চৰকাৰে লুকুৱাইছে । তেওঁ কয় যে, এতিয়া ক'ভিডৰ তৃতীয় ঢৌৰ সংক্ৰমণ আৰম্ভ হোৱাৰ আশংকাও বৃদ্ধি পাইছে ।
কিন্তু চৰকাৰে প্ৰয়োজনীয় প্ৰস্তুতি চলোৱা পৰিলক্ষিত হোৱা নাই বুলি তেওঁ মন্তব্য কৰে । তৃতীয় ঢৌৰ ভয়াৱহতা সন্দৰ্ভত তেওঁ কয় যে, বিৰোধীয়ে সংসদৰ চলিত বৰ্ষাকালীন অধিৱেশনত কেন্দ্ৰক এই বিষয়ত প্ৰশ্ন কৰাৰ সম্ভাৱনা আছে । মনোজ ঝাই লগতে কয় যে, দেশত প্ৰতিষেধকৰ যথেষ্ট অভাৱ হৈছে । দেশৰ অৰ্থনীতিৰো পঁয়ালগা অৱস্থা হৈছেগৈ । পেট্ৰ'ল আৰু ডিজেলৰ মূল্য অভাৱনীয় হাৰত বৃদ্ধি পাইছে বুলিও তেওঁ কেন্দ্ৰক সমালোচনা কৰে ।
লগতে তেওঁ কয় যে, কেইবামাহো ধৰি প্ৰতিবাদ সাব্যস্ত কৰি এতিয়া কৃষকসকলৰ অৱস্থাও বেয়া হৈ আহিছে । তথাপিও কেন্দ্ৰই কৃষকসকলৰ ক'লা আইন বাতিলৰ দাবী লোৱা নাই বুলি তেওঁ সমালোচনা কৰে । বিৰোধীয়ে চীন, তালিবান আৰু নিবনুৱা সমস্যা সন্দৰ্ভতো কেন্দ্ৰক বিধানসভাত প্ৰশ্ন কৰিব বুলি তেওঁ জানিবলৈ দিয়ে ।
উল্লেখ্য যে, সংসদৰ অধিৱেশন সোমবাৰৰ পৰা আৰম্ভ হৈছে আৰু এই অধিৱেশন ১৩ আগষ্টলৈকে অব্যাহত থাকিব । জানিব পৰা মতে, বিৰোধীয়ে বিজেপি নেতৃত্বাধীন এন ডি এ চৰকাৰক আকাশলংঘী পেট্ৰ'ল আৰু ডিজেলৰ মূল্য আৰু ক'ভিড-১৯ মহামাৰীৰ সময়ত পৰিস্থিতি নিয়ন্ত্ৰণ ব্যৱস্থাপনা আদি বিষয়ত প্ৰশ্নবাণেৰে থকা সৰকা কৰাৰ সম্ভাৱনা আছে । আনহাতে, অত্যাৱশ্যকীয় সামগ্ৰীৰো মূল্য বৃদ্ধি পাইছে । বিগত সময়চোৱাত মূল্যবৃদ্ধিৰ বিৰোধিতাৰে বিভিন্ন প্ৰতিবাদী কাৰ্যসূচী গ্ৰহণ কৰা পৰিলক্ষিত হৈছে ।
লগতে পঢ়ক:জামিয়া মিলিয়াৰ কবৰস্থানত কবৰস্থ কৰা হ’ল ডানিছ ছিদ্দিকীক
