নিউজ ডেস্ক, ৯ জুলাই : প্ৰবল বৰষুণৰ ফলত উত্তৰ ভাৰতৰ কেইবাটাও স্থানত কমেও ১৪ জন লোকৰ মৃত্যু হোৱাৰ বাতৰি পোৱা গৈছে । লগতে ভূমিস্খলনৰ ফলত বহু ঘৰ আৰু ৰাস্তা ক্ষতিগ্ৰস্ত হৈছে । পথৰ ওপৰত বৃহৎ পৰিমাণৰ পানী জমা হোৱাৰ লগতে কেইবাখনো দলং উটুৱাই নিছে ।
এতিয়ালৈকে আটাইতকৈ বেছি ক্ষতিগ্ৰস্ত ৰাজ্যসমূহৰ ভিতৰত আছে হিমাচল । ৰাজ্যখনত অতি কমেও পাঁচজন লোকে প্ৰাণ হেৰুৱাইছে । লগতে ভূমিস্খলনৰ ফলত পাহাৰীয়া ৰাজ্যখনৰ একাধিক ঘৰ আৰু অন্যান্য প্ৰতিষ্ঠান ক্ষতিগ্ৰস্ত হৈছে । উত্তৰাখণ্ডত এখন গাড়ী ভূমিস্খলনৰ ফলত খুন্দা খাই গংগাত ডুব যোৱাৰ ফলত কমেও তিনিজন লোক নিহত হৈছে । আনহাতে, ১৯৮২ চনৰ পৰা জুলাই মাহত দিল্লীত এটা দিনত সৰ্বাধিক বৰষুণৰ ৰেকৰ্ড কৰা হৈছে । লগতে বৰষুণে ৰাষ্ট্ৰীয় ৰাজধানীকো অচল কৰি পেলাইছে ।
উল্লেখ্য যে জম্মু-কাশ্মীৰত শনিবাৰে সন্ধিয়া পুঞ্চ জিলাত আকস্মিক বানপানীত উটি গৈ দুজন সেনা জোৱানৰ মৃত্যু হয় । ৰাজস্থানৰ কেইবাখনো জিলাত ধাৰাসাৰ বৰষুণৰ ফলত শনিবাৰে পৃথক ঘটনাত চাৰিজন লোকৰ মৃত্যু হয় । চিত্তোৰগড়ত বজ্ৰপাতৰ ফলত এজন পুৰুষ আৰু এগৰাকী মহিলাৰ মৃত্যু হয় । আনহাতে, সৱাই মাধোপুৰত দুটা পৃথক ঘটনাত দুজন পুৰুষ পানীত ডুব যায় ।
ইফালে ভাৰতীয় বতৰ বিজ্ঞান বিভাগে দিল্লী, হাৰিয়ানা, হিমাচল প্ৰদেশ, উত্তৰাখণ্ড, ৰাজস্থান, পঞ্জাব আৰু জম্মু-কাশ্মীৰত ধাৰাসাৰ বৰষুণৰ আগজাননী দিছে । আইএমডিয়ে কয় যে উত্তৰ ভাৰতৰ ওপৰত এক পশ্চিমী বতাহে বিৰাজ কৰাৰ ফলত শনিবাৰ আৰু দেওবাৰে তীব্ৰ বৰষুণ হয় ।
আইএমডিয়ে ৯ জুলাইৰ দুপৰীয়া ১ বজাৰ বুলেটিনত কয়, "হিমাচল, উত্তৰাখণ্ড আৰু পঞ্জাব আৰু হাৰিয়ানাৰ কাষৰীয়া অঞ্চলত দেওবাৰে ধাৰাসাৰ বৰষুণ হয় । উত্তৰ-পশ্চিম ভাৰতত পৰৱৰ্তী ৫ দিনত পশ্চিম হিমালয় অঞ্চল, পঞ্জাব, হাৰিয়ানা, চণ্ডীগড়, দিল্লী, ৰাজস্থান আৰু উত্তৰ প্ৰদেশত পাতল/মধ্যমীয়াৰ পৰা তীব্ৰ বৰষুণ হোৱাৰ সম্ভাৱনা আছে । দেওবাৰে উত্তৰাখণ্ড, হিমাচল প্ৰদেশ আৰু পঞ্জাব, হাৰিয়ানা, চণ্ডীগড়ৰ কাষৰীয়া জিলাবোৰতো ছেগাচোৰোকাকৈ প্ৰৱল বৰষুণ হোৱাৰ সম্ভাৱনা আছে । ১০-১৩ জুলাইলৈকে উত্তৰ প্ৰদেশত প্ৰচুৰৰ পৰা অতি ধাৰাসাৰ বৰষুণ হোৱাৰ সম্ভাৱনা আছে ।"
লগতে পঢ়ক :himachal weather : হিমাচলত ৰেড এলাৰ্ট জাৰি; ঘৰ খহি তিনিজনৰ মৃত্যু
