নেশ্যনেল ডেস্ক,২ অক্টোবৰ : মহাৰাষ্ট্ৰৰ বহু ঠাইত এতিয়াও নাই বাট পথৰ সু-ব্যৱস্থা । যাৰ বাবে উন্নত যাতায়াতৰ সুবিধাৰ পৰা বঞ্চিত লোকসকল । আনকি কিছুমান অঞ্চলত এম্বুলেন্স যোৱাৰ বাবেও পথৰ ব্যৱস্থা নাই । যাৰ বাবে দুৰ্ভোগ ভুগি আহিছে গ্ৰামাঞ্চলৰ ৰাইজ । বাট পথৰ সমস্যাৰ বাবে বিভিন্ন ধৰণৰ ঘটনাও সংঘটিত হৈ আহিছে জনজাতীয় অঞ্চলবোৰত ।
যাতায়াতৰ অসুবিধাৰ বাবে এগৰাকী গৰ্ভৱতী মহিলাক পৰিয়ালৰ লোকে কান্ধত ভাৰ বান্ধি অৰ্থাৎ সাঙীত লৈ যোৱাৰ এক ঘটনা পোহৰলৈ আহিছে । ঘটনাটো থানেৰ বুলি জানিব পৰা গৈছে । প্ৰসৱ বেদনাত ছটফটাই থকা মহিলাগৰাকীক পৰিয়ালৰ লোকে কান্ধত ভাৰ বান্ধি হাস্পতাললৈ লৈ যোৱাৰ এটা ভিডিঅ' সামাজিক মাধ্যমত ভাইৰেল হৈ পৰিছে । লগে লগে বিভিন্নম মহলত তীব্ৰ প্ৰতিক্ৰিয়াৰ সৃষ্টি হৈছে ।
জানিব পৰা মতে পতিকাচা জনপদৰ মহিলাগৰাকীক তেওঁৰ পৰিয়ালৰ সদস্য আৰু কিছু গাওঁবাসীয়ে পুৱা কান্ধত ভাৰ বান্ধি লৈ গৈছিল । গৰ্ভৱতী মহিলাগৰাকীক স্বাস্থ্য সেৱা কেন্দ্ৰলৈ ভাৰ বান্ধি প্ৰায় চাৰে চাৰি কিলোমিটাৰ ভ্ৰমণ কৰিব লগা হয় । ইফালে হাস্পতাললৈ যোৱাৰ পথতে মহিলাগৰাকীয়ে এটি কন্যা সন্তান জন্ম দিয়ে । পাছত মহিলাগৰাকী আৰু কেঁচুৱাটোক এখন ব্যক্তিগত বাহনত কাচাৰা প্ৰাথমিক স্বাস্থ্য কেন্দ্ৰলৈ লৈ যোৱা হয় । একাংশ লোকৰ মতে সৌভাগ্যক্ৰমে তেওঁলোকৰ সৈতে এগৰাকী আশা কৰ্মীও আছিল । তেওঁ মহিলাগৰাকীৰ মসৃণ প্ৰসৱত সহায় কৰিছিল । মাতৃ আৰু কেঁচুৱাটো বৰ্তমান সুৰক্ষিত আৰু তেওঁ স্বাস্থ্যৰ অৱস্থা সুস্থিৰ বুলি জানিব পৰা গৈছে । স্থানীয় লোকে জনোৱা মতে তেওঁলোকৰ গাঁওখন মুখ্যমন্ত্ৰী একনাথ সিন্দেৰ আদৰ্শ গাঁও আছিল ।
