নেশ্যনেল ডেস্ক, 23 অক্টোবৰ : শনিবাৰে দেশৰ সাতটাকৈ ভেকচিন প্ৰস্তুতকাৰী প্ৰতিষ্ঠানৰ প্ৰতিনিধিৰ সৈতে বৈঠকত মিলিত হ’ব প্ৰধানমন্ত্ৰী নৰেন্দ্ৰ মোডী ৷ সূত্ৰৰ পৰা জানিব পৰা অনুসৰি ভাৰতে 100 কোটি ভেকচিন পালি প্ৰদানৰ লক্ষ্যত উপনীত হোৱাৰ বাবেই ভেকচিন প্ৰস্তুতকাৰী প্ৰতিষ্ঠান কেইটাৰে প্ৰতিনিধিৰে এই বৈঠকত মিলিত হ’ব প্ৰধানমন্ত্ৰী ৷
চেৰাম ইনষ্টিটিউট অৱ ইণ্ডিয়া, ভাৰত বায়’টেক, ডাঃ ৰেড্ডী লেবৰেটৰিজ, জিডাছ কেডিলা, বায়’ল’জিকেল ই, জেনোভা বায়’ফাৰ্মা, পেনেচিয়া বায়’টেকৰ প্ৰতিনিধি উপস্থিত থাকিব প্ৰধানমন্ত্ৰীৰে সৈতে হ’বলগীয়া উক্ত বৈঠকত ৷ প্ৰধানমন্ত্ৰীয়ে যিমান সম্ভৱ সোনকালে দেশৰ উপযুক্ত লোকসকলক দুয়োপালি ভেকচিন প্ৰদানৰ সমান্তৰালকৈ ‘সকলোৰে বাবে ভেকচিন’ আঁচনিৰ অংশ হিচাপে অন্যান্য দেশকো ভেকচিন লাভত সুবিধা কৰি দিয়াৰ ক্ষেত্ৰত যথেষ্ট গুৰুত্ব আৰোপ কৰিছে ৷
শনিবাৰে পুৱা 7 বজাত কেন্দ্ৰীয় স্বাস্থ্য মন্ত্ৰণালয়ৰ পৰা প্ৰকাশিত তথ্য অনুসৰি দেশে বৰ্তমানলৈকে ভেকচিনৰ 101.30 কোটি পালি প্ৰদান কৰিবলৈ সক্ষম হৈছে ৷ 21 অক্টোবৰত দেশে 100 কোটি ভেকচিন পালি প্ৰদানৰ লক্ষ্যত উপনীত হোৱাৰ বাবে দেশৰ বিভিন্ন প্ৰান্তত ইয়াক উদযাপন কৰা হয় ৷
ভাৰতৰ মুঠ জনসংখ্যাৰ 75 শতাংশই অতি কমেই এটা পালি ক’ভিড প্ৰতিষেধক গ্ৰহণ কৰিছে ৷ ইয়াৰ ভিতৰত 9 খন ৰাজ্য আৰু কেন্দ্ৰীয় শাসিত অঞ্চলে ক্ৰমে, আন্দামান আৰু নিকোবৰ দ্বীপপুঞ্জ, চণ্ডীগড়, গোৱা, উত্তৰাখণ্ড, দদৰা আৰু নগৰ হাভেলী, হিমাচল প্ৰদেশ, জম্মু-কাশ্মীৰ, লক্ষদ্বীপ আৰু ছিকিমে 100 শতাংশ লোকক ক’ভিডৰ প্ৰথম পালি ভেকচিন প্ৰদান কৰিবলৈ সক্ষম হৈছে ৷
স্বাস্থ্য মন্ত্ৰণালয়ৰ বিবৃতি অনুসৰি দেশৰ 93 কোটি প্ৰাপ্তবয়স্কৰ 31 শতাংশই ক’ভিডৰ দুয়োটা পালি ভেকচিন গ্ৰহণ কৰিছে ৷ দেশৰ ক’ভিড ভেকচিনেছন ড্ৰাইভত ভাৰত বায়’টেকৰ ক’ভেক্সিন আৰু স্পুটনিক ভি আৰু চেৰাম ইনষ্টিটিউটৰ ক’ভিশ্বিল্ড প্ৰদান কৰা হৈছে ৷
লগতে পঢ়ক : আত্মনিৰ্ভৰ ভাৰত স্বয়ংপূৰ্ণ গোৱা : হিতাধিকাৰীৰে মত বিনিময় কৰিব প্ৰধানমন্ত্ৰীয়ে
