নেশ্যনেল ডেস্ক, ৫ অক্টোবৰ : দেশজুৰি পেট্ৰ'ল ডিজেলৰ মূল্য়বৃদ্ধিৰ বিৰুদ্ধে প্ৰতিবাদ অব্যাহত আছে । কিন্তু তাৰ মাজতো দেশত পেট্ৰ'ল ডিজেলৰ মূল্য় হ্ৰাস হোৱা পৰিলক্ষিত হোৱা নাই । এইবাৰ দেশত পেট্ৰ'ল-ডিজেলৰ মূল্যই গঢ়িলে অভিলেখ ।
মঙলবাৰে দিল্লীত পেট্ৰ'লৰ মূল্য ২৫ পইচাকৈ বৃদ্ধি হৈছে আৰু প্ৰতি লিটাৰত ইয়াৰ মূল্য হৈছেগৈ ১০২.৬৪ টকা । মুম্বাইত প্ৰতি লিটাৰত ২৪ পইচাকৈ বৃদ্ধি হৈ ইয়াৰ মূল্য হৈছেগৈ ১০৮.৬৭ টকা । কলকাতাত সৰ্বাধিক ২৯ পইচা বৃদ্ধি হৈছে আৰু চহৰখনত সম্প্ৰতি প্ৰতি লিটাৰ পেট্ৰ'লৰ মূল্য হৈছেগৈ ১০৩.৩৬ টকা । ঠিক তেনেদৰে চেন্নাইত বৰ্তমান পেট্ৰ'লৰ মূল্য ১০০.২৩ টকা ।
একেদৰে ডিজেলৰ মূল্যও ৩০ পইচাকৈ বৃদ্ধি হৈছে । শনিবাৰলৈ দিল্লীত ডিজেল প্ৰতি লিটাৰত হ'ব ৯১.০৭ টকা । মুম্বাইত ডিজেলৰ মূল্য ৯৮.৮০ টকা, কলকতাত ৯৪.১৭ টকা আৰু চেন্নাইত প্ৰতি লিটাৰত ৯৫.৫৯ টকা । মুঠতে পেট্ৰ'লৰ সমান্তৰালকৈ হয়টো আৰু কিছুদিন পাছত ডিজেলৰ মূল্যও ১০০ৰ ঘৰ পাৰ হ'ব ।
