নেশ্যনেল ডেস্ক, 28 জুন: ওড়িশাৰ শোকাৱহ ৰে’ল দুৰ্ঘটনাৰ প্ৰায় এটা মাহ সম্পূৰ্ণ হ’ল ৷ প্ৰায় 300 লোকে প্ৰাণ লোকে হেৰুৱা এই দুৰ্ঘটনাৰ পাচত বিভীষিকাৰ যেন এতিয়াও অন্ত পৰা নাই ৷ কাৰণ এতিয়াও চিনাক্ত কৰিব পৰা হোৱা নাই 81 জন লোকৰ মৃতদেহ ৷ ফলত আপোনজনৰ মৃতদেহ বিচাৰি দুৰ্বিসহ দিন পাৰ কৰিব লগা হৈছে আত্মীয়ই ৷
উল্লেখ্য যে ওড়িশাৰ AIIMSত ৰাখি থোৱা হৈছে অচিনাক্ত মৃতদেহসমূহ ৷ DNA পৰীক্ষাৰ জৰিয়তে মৃতদেহসমূহ চিনাক্ত কৰা বাবে চেষ্টা কৰা হৈছে যদিও 81 জন লোকক চিনাক্ত কৰিব পৰা হোৱা নাই ৷ বহুলোকে নিজৰ আত্মীয়ৰ সন্ধান বিচাৰি বিগত এটা মাহে বাহৰ পাতি আছে AIIMSৰ সমীপৰ বিভিন্ন হোটেলত ৷ সকলোৰে মনত এটাই আশা যে মৃতদেহ চিনাক্ত কৰা হ’ব আৰু ঘৰলৈ নি ধৰ্মীয় ৰীতি-নীতি সম্পন্ন কৰিব ৷
ইফালে বহু লোকে নিজৰ আত্মীয় বুলি আন লোকৰ মৃতদহে ঘৰলৈ নি সৎকাৰ কৰাৰ তথ্যও পোহৰলৈ আহিছে ৷ জানিব পৰা মতে বিহাৰৰ এগৰাকী মহিলাৰ স্বামী দুৰ্ঘটনাত পতিত হোৱা ৰে’লখনেৰে চেন্নাইলৈ যাত্ৰা কৰিছিল ৷ তেওঁৰ মৃতদেহ উদ্ধাৰ কৰি ৰখা হৈছিল ওড়িশাৰ KIMS হাস্পতালত ৷ কিন্তু মহিলাগৰাকীৰ স্বামীৰ মৃতদেহ বিহাৰৰে আন এটা পৰিয়ালে ঘৰলৈ নি সৎকাৰ কৰে ৷ মুঠৰ ওপৰত এক অবৰ্ণনীয় পৰিৱেশ সৃষ্টি হৈছে মৃতদেহ চিনাক্ত কৰিব নোৱাৰা আত্মীয় অথবা পৰিয়ালৰ লোকসকলৰ মাজত ৷
তথ্য অনুসৰি ভুৱনেশ্বৰৰ AIIMSত তিনিটা পাত্ৰত সংৰক্ষিত 81 টা মৃতদেহৰ পৰিচয় এতিয়াও চিনাক্ত কৰিব পৰা হোৱা নাই ৷ এতিয়ালৈকে 84 টা পৰিয়ালে তেওঁলোকৰ ডিএনএ (DNA)ৰ নমুনা প্ৰদান কৰিছে ৷
স্মৰ্তব্য যে 2 জুনত বালাছোৰ জিলাৰ বাহানাগা বজাৰ ষ্টেচনৰ সমীপত সংঘটিত শোকাৱহ দুৰ্ঘটনাটোত চেন্নাই অভিমুখী কৰোমণ্ডেল এক্সপ্ৰেছ, হাওৰা অভিমুখী এছএমভিপি-হাওৰা চুপাৰফাষ্ট এক্সপ্ৰেছ আৰু এখন মালবাহী ৰে’লৰ মাজত হোৱা সংঘৰ্ষত 290 জনৰো অধিক লোকৰ মৃত্যু হয় ৷
লগতে পঢ়ক: Amit Malviya booked: বিজেপিৰ আইটি চেলৰ মুৰব্বীৰ বিৰুদ্ধে কৰ্ণাটক কংগ্ৰেছৰ গোচৰ ৰুজু
