নিউজ ডেস্ক, 27 জুন : সংঘাতপূৰ্ণ মণিপুৰ ভ্ৰমণৰ বাবে সৰ্বদলীয় সংসদীয় প্ৰতিনিধি দল বিচাৰি কেইবাটাও ৰাজনৈতিক দলে উত্থাপন কৰা প্ৰস্তাৱ নাকচ কৰিছে গৃহ পৰিক্ৰমা মন্ত্ৰালয়ে ।
সূত্ৰই জনোৱা মতে, শেহতীয়াকৈ অনুষ্ঠিত হোৱা সৰ্বদলীয় বৈঠকত গৃহমন্ত্ৰী অমিত শ্বাহে আহ্বান কৰা প্ৰস্তাৱটো নাকচ কৰা হৈছে । সূত্ৰৰ অনুসৰি, "চৰকাৰে এতিয়া সৰ্বদলীয় সংসদীয় প্ৰতিনিধিৰ দল পঠোৱাৰ উপযুক্ত সময় বুলি নাভাবে । হিংসাত্মক পৰিস্থিতিত আক্ৰান্ত মণিপুৰলৈ স্বাভাৱিক অৱস্থা ঘূৰাই আনিবৰ বাবে কেন্দ্ৰীয় আৰু ৰাজ্য দুয়োখন চৰকাৰে কঠোৰ পৰিশ্ৰম কৰি আছে" ৷
যোৱা 24 জুনত কেন্দ্ৰীয় গৃহমন্ত্ৰী অমিত শ্বাহে আহ্বান কৰা বৈঠকত কেইবাটাও বিৰোধী দলে উত্তৰ-পূবৰ ৰাজ্যখনলৈ সৰ্বদলীয় প্ৰতিনিধি দল ভ্ৰমণৰ বাবে অনুৰোধ জনাইছিল । আনহাতে কংগ্ৰেছে মুখ্যমন্ত্ৰী এন বীৰেণ সিঙক শীঘ্ৰে বৰ্খাস্ত কৰাৰ দাবী জনোৱাৰ বিপৰীতে সমাজবাদী পাৰ্টী আৰু আন কেইবাটাও দলে ৩ মে’ৰ পৰা হিংসাত্মক পৰিস্থিতিৰ সাক্ষী হৈ থকা ৰাজ্যখনত শীঘ্ৰেই ৰাষ্ট্ৰপতিৰ শাসন প্ৰৱৰ্তন কৰাৰ দাবী তুলিছে ।
চৰকাৰে মণিপুৰত স্বাভাৱিক অৱস্থা ঘূৰাই অনাৰ বাবে যৎপৰোনাস্তি চেষ্টা কৰি আছে বুলি দৃঢ়তাৰে কয় বুলি সূত্ৰই জনায় । গৃহমন্ত্ৰী অমিত শ্বাহে কয় যে প্ৰধানমন্ত্ৰী নৰেন্দ্ৰ মোদীৰ নিৰ্দেশত মণিপুৰত শান্তি ঘূৰাই অনাৰ বাবে সকলো প্ৰচেষ্টা চলোৱা হৈছে । গৃহমন্ত্ৰীগৰাকীয়ে এই বৈঠকত কয় যে ৰাজ্যখনত হিংসাত্মক ঘটনা আৰম্ভ হোৱাৰ পিছৰে পৰা এনে এটা দিনো নাই, যেতিয়া তেওঁ মণিপুৰৰ পৰিস্থিতি সন্দৰ্ভত পি এম মোদীৰ সৈতে কথা পতা নাই বা প্ৰধানমন্ত্ৰীয়ে তেওঁক নিৰ্দেশ দিয়া নাই ।
ৰাজ্যখনৰ প্ৰচলিত পৰিস্থিতিৰ বিষয়ে আলোচনা কৰিবলৈ গৃহমন্ত্ৰীয়ে আহ্বান কৰা বৈঠকত বিজেপি, কংগ্ৰেছ, তৃণমূল কংগ্ৰেছ, ডিএমকে, এআইএডিএমকে, আম আদমী পাৰ্টী, বাওঁপন্থীকে ধৰি বিভিন্ন ৰাজনৈতিক দলৰ নেতাসকলে অংশগ্ৰহণ কৰে। বিগত ৩ মে’ত ৰাজ্যখনত গোষ্ঠীগত হিংসা সংঘটিত হোৱাৰ পাচত প্ৰায় ১২০ জন লোকে প্ৰাণ হেৰুৱাইছে আৰু ৩ হাজাৰৰো অধিক লোক আহত হৈছে ।
লগতে পঢ়ক : Violence in Manipur: মণিপুৰত স্থাপন কৰা হৈছে আৰক্ষী নিয়ন্ত্ৰণ কক্ষ
