নেশ্যনেল ডেস্ক, ৯ এপ্ৰিল: ভাৰত আৰু নিউজিলেণ্ডৰ মাজত যাতায়াত স্বাভাৱিক কৰাৰ বাবে প্ৰয়াস অব্যাহত ৰাখিছে ভাৰতৰ বৈদেশিক পৰিক্ৰমা মন্ত্ৰালয়ে । ভাৰতীয় যাত্ৰীৰ প্ৰৱেশৰ ক্ষেত্ৰত নিউজিলেণ্ড চৰকাৰে জাৰি কৰা নিষেধাজ্ঞা অহা ২৮ এপ্ৰিলৰ পৰা প্ৰত্যাহাৰ কৰা হ'ব বুলি বৃহস্পতিবাৰে আশা ব্যক্ত কৰে বৈদেশিক পৰিক্ৰমা মন্ত্ৰালয়ৰ মুখপাত্ৰ অৰিন্দম বাগচীয়ে ।
COVID-১৯ সংক্ৰমণ বৃদ্ধি হোৱাৰ বাবে প্ৰথমবাৰৰ বাবে নিউজিলেণ্ডে নিজ দেশৰ নাগৰিকসহ ভাৰতৰ পৰা যোৱা লোকৰ প্ৰৱেশ অস্থায়ীভাৱে নিষিদ্ধ কৰিছে । অহা ১১ ৰ পৰা ২৮ এপ্ৰিললৈ এই নিৰ্দেশ প্ৰযোজ্য হ'ব বুলি ইতিমধ্যে ঘোষণা কৰিছে নিউজিলেণ্ডৰ প্ৰধানমন্ত্ৰী জেচিণ্ডা আৰ্ডাৰ্ণে । স্বাস্থ্য সঞ্চালক প্ৰধান এছলে ব্লুমফিল্ডৰ প্ৰতিবেদনত প্ৰকাশ কৰা হৈছে যে, নিউজিলেণ্ডত নতুনকৈ ২৩ জন লোক মহামাৰীৰ কবলত পৰিছে ।
ইয়াৰ ভিতৰত ভাৰতৰ পৰা দেশখনলৈ যোৱা ১৭ জন লোক আছে । এই সন্দৰ্ভত বৈদেশিক পৰিক্ৰমা মন্ত্ৰালয়ৰ মুখপাত্ৰ অৰিন্দম বাগচীয়ে কয় যে, বিভাগটোৱে নিউজিলেণ্ড চৰকাৰৰ পৰা জানিব পাৰিছে যে দেশখনে অহা ১১ এপ্ৰিলৰ পৰা ২৮ এপ্ৰিলৰলৈ ভ্ৰমণৰ ক্ষেত্ৰত অস্থায়ী নিষেধাজ্ঞা আৰোপ কৰিছে । এই নিষেধাজ্ঞা কেৱল ভাৰতীয়সকলৰ বাবেই নহয়, নিউজিলেণ্ডৰ নাগৰিকসকলৰ ক্ষেত্ৰতো প্ৰযোজ্য হ'ব ।
লগতে অহা ২৮ এপ্ৰিলৰ পৰা এই নিষেধাজ্ঞা প্ৰত্যাহাৰ কৰি যাতায়াত স্বাভাৱিক হোৱাৰ আশা ব্যক্ত কৰে মুখপাত্ৰগৰাকীয়ে । আনহাতে, ম্যানমাৰৰ পৰিস্থিতি সন্দৰ্ভত বাগচীয়ে কয় যে, যোৱা সপ্তাহত তেওঁ ভাৰতৰ স্থিতি বিষদভাৱে দাঙি ধৰিছে । ভাৰতে হিংসাৰ প্ৰতি গৰিহনা দিয়াৰ লগতে আৰু ম্যানমাৰত গণতন্ত্ৰৰ পুনৰুদ্ধাৰৰ বাবে সমৰ্থন আগবঢ়াইছে বুলিও মন্তব্য কৰে মুখপাত্ৰগৰাকীয়ে । ৰাইছিনা আলোচনাত বিদেশৰ বিশিষ্টলোকৰ অংশগ্ৰহণ সন্দৰ্ভত তেওঁ কয় যে, কেইবাগৰাকীও বিশিষ্ট ব্যক্তিয়ে ভাৰতলৈ অহাৰ পৰিকল্পনা কৰিছে ।
লগতে পঢ়ক:ভোট গণনা প্ৰতিনিধিক স্বায়ত্ব শাসনৰ বাহিৰৰ অঞ্চলৰ পৰা বাচনি কৰাৰ আহ্বান টিপ্ৰাৰ
