নিউজ ডেস্ক, 4 অক্টোবৰ : বুধবাৰে ৰায়গড়ত অনুষ্ঠিত হোৱা বিশাল জনসভাত অংশগ্ৰহণ কৰে কংগ্ৰেছৰ ৰাষ্ট্ৰীয় সভাপতি মল্লিকাৰ্জুন খাৰ্গেই ৷ এই সভাৰ মঞ্চৰ পৰাই প্ৰধানমন্ত্ৰী মোদীক হিংসাজৰ্জৰ মণিপুৰৰ প্ৰতি মনোযোগ দিবলৈ তেওঁ আহ্বান জনায়। তেওঁ কয় যে মণিপুৰ জ্বলি আছে, কিন্তু প্ৰধানমন্ত্ৰী মোদী এতিয়াও তালৈ যোৱা নাই ৷ প্ৰধানমন্ত্ৰীক অনুৰোধ জনাইছো, মণিপুৰৰ প্ৰতি তেওঁ চকু দিয়ক ৷
প্ৰধানমন্ত্ৰীলৈ খাৰ্গেৰ আবেদন :
ৰায়গড়ত অনুষ্ঠিত হোৱা বিশাল জনসভাত মল্লিকাৰ্জুন খাৰ্গেই কয়, "মই প্ৰধানমন্ত্ৰী মোদীক মণিপুৰলৈ যাবলৈ অনুৰোধ কৰিছোঁ ৷ ৰাজ্যখনৰ ৰাইজক তেওঁ লগ কৰক ৷ মণিপুৰত হিংসাত্মক সংঘৰ্ষ চলি আছে ৷ তাত মানুহক হত্যা কৰা হৈছে ৷ মহিলাক উলংগ কৰা হৈছে ৷ কিন্তু মোদী জী তালৈ যোৱা নাই ৷ তেওঁ ছত্তিশগড়লৈহে আহিছে ৷ তেওঁ ৰাজস্থানলৈ গৈছে, তেওঁ কৰ্ণাটকলৈ গৈছে ৷ কিন্তু মণিপুৰলৈ যোৱা নাই ৷ প্ৰধানমন্ত্ৰী মোদীয়ে মণিপুৰ সন্দৰ্ভত সাহস হেৰুৱাইছে ৷ আমাৰ নেতা ৰাহুল গান্ধীয়ে মণিপুৰ পৰিদৰ্শন কৰি আহিল ৷ বহুত সাংসদ গৈছে আৰু আহিছে ৷ আপোনাৰ কাষত নিৰাপত্তাও আছে ৷ কিন্তু আপুনি মণিপুৰলৈ যোৱা নাই ৷ ভয় কিয়? আপুনি ছত্তিশগড়, তেলেংগানা আৰু ৰাজস্থানত এখন সভা কমকৈ পাতি মণিপুৰ গৈ আহক।"
মে’ মাহৰ পৰা মণিপুৰত অব্যাহত আছে হিংসা :
৩ মে’ৰ পৰা হিংসাত্মক ঘটনাত জ্বলি আছে মণিপুৰ ৷ মেইটেই আৰু কুকি নামৰ দুটা সম্প্ৰদায়ৰ মাজত হিংসাত্মক সংঘৰ্ষ চলি আছে ৷ মাত্ৰ কেইদিনমানৰ আগতে মেইটেই সম্প্ৰদায়ৰ পুৰুষৰ মাজত কুকি সম্প্ৰদায়ৰ দুগৰাকী মহিলাক উলংগ কৰি পেৰেড কৰা হৈছিল ৷ যেতিয়া এই ঘটনাৰ ভিডিঅ’ ছ’চিয়েল মিডিয়াত প্ৰচাৰ হৈছিল, তেতিয়া সমগ্ৰ দেশতে এই হিংসাত্মক পৰিস্থিতিৰ বিৰুদ্ধে ক্ষোভ দেখা গৈছিল ৷ সেই শিহঁৰণকাৰী ভিডিঅ’ চাই প্ৰতিটো শ্ৰেণীৰ মানুহেই অসন্তুষ্টি তথা ক্ষোভ প্ৰকাশ কৰিছিল ৷ মণিপুৰৰ মেইটেই জনগোষ্ঠীয়ে তেওঁলোকক কুকি জনগোষ্ঠীৰ দৰে ৰাজ্যত জনজাতিকৰণৰ মৰ্যাদা দিবলৈ দাবী জনাইছে ৷
লগতে পঢ়ক : Bihar Land For Job Scam : ভূমিৰ বিনিময়ত চাকৰি কেলেংকাৰী; লালু, ৰাবৰী আৰু তেজস্বী যাদৱক জামিন প্ৰদান
