নিউজ ডেস্ক, ২ মে' : ১০ মে'ত অনুষ্ঠিত হ'বলগা কৰ্ণাটক বিধানসভা নিৰ্বাচনৰ পূৰ্বে মঙলবাৰে কংগ্ৰেছে 'সৰ্ব জনংগদা শান্তিয়া থোটা' (সকলো সম্প্ৰদায়ৰ শান্তিপূৰ্ণ বাগিচা) নামৰ কৰ্ণাটকৰ নিৰ্বাচনী ইস্তাহাৰ প্ৰকাশ কৰে (Sarva Janangada Shanthiya Thota) । নিৰ্বাচনী ইস্তাহাৰ প্ৰকাশৰ অনুষ্ঠানটোত কংগ্ৰেছৰ সভাপতি মল্লিকাৰ্জুন খাৰ্গে, কৰ্ণাটকৰ প্ৰাক্তন মুখ্যমন্ত্ৰী সিদ্দাৰামাইয়া, দলৰ ৰাজ্যিক সভাপতি ডি কে শিৱকুমাৰ আৰু অন্যান্য নেতাসকল উপস্থিত থাকে (Congress released Karnataka poll manifesto) ।
নিৰ্বাচনী ইস্তাহাৰ প্ৰকাশ কৰি দলটোৱে ঘোষণা কৰে যে যদি কংগ্ৰেছ ক্ষমতালৈ আহে তেন্তে প্ৰতিটো পৰিয়ালক 200 ইউনিট বিনামূলীয়া বিদ্যুৎ প্ৰদান কৰিব (karnataka election 2023) । লগতে পৰিয়ালৰ প্ৰতিগৰাকী মহিলা মুৰব্বীক প্ৰতিমাহে 2,000 টকা, নিবনুৱা স্নাতকসকলক দুবছৰৰ বাবে প্ৰতিমাহে 3,000 টকা আৰু নিবনুৱা ডিপ্ল'মাধাৰীসকলক প্ৰতিমাহে 1,500 টকাকৈ প্ৰদান কৰিব । লগতে নিয়মীয়া কেএছআৰটিচি/বিএমটিচি বাছত সকলো মহিলাক বিনামূলীয়া ভ্ৰমণৰো প্ৰতিশ্ৰুতি দিছে (KSRTC BMTC buses free declared by congress) ।
আনহাতে, দলটোৱে 2006 চনৰ পৰা কৰ্মত যোগদান কৰা পেঞ্চনযোগ্য চৰকাৰী কৰ্মচাৰীসকলৰ বাবে পুৰণি পেঞ্চন নীতি (ওপিএছ) প্ৰৱৰ্তনৰ বিষয়েও 'সহানুভূতিৰে' বিবেচনা কৰিব বুলি প্ৰকাশ কৰিছে । ইয়াৰ উপৰি এবছৰৰ ভিতৰত সকলো চৰকাৰী বিভাগত অনুমোদিত খালী পদ পূৰণ কৰাৰো প্ৰতিশ্ৰুতি প্ৰদান কৰা হৈছে ।
"আমি বিশ্বাস কৰো যে আইন আৰু সংবিধান পবিত্ৰ আৰু বজৰং দল, পিএফআই বা আন কোনো ব্যক্তি তথা সংগঠনে ইয়াক উলংঘা কৰিব নোৱাৰে আৰু শত্ৰুতা বা ঘৃণা বিয়পাব নোৱাৰে । সেয়া লাগিলে সংখ্যাগৰিষ্ঠ বা সংখ্যালঘু সম্প্ৰদায়ৰ মাজতে নহওক কিয় । আমি এনে যিকোনো সংগঠনৰ ওপৰত নিষেধাজ্ঞা আৰোপ কৰাকে ধৰি আইন অনুসৰি নিৰ্ণায়ক পদক্ষেপ গ্ৰহণ কৰিম ।" দেশৰ সবাতোকৈ পুৰণি ৰাজনৈতিক দলটোৱে কৰ্ণাটকত নিজৰ ইস্তাহাৰত এই কথা উল্লেখ কৰিছে ।
ইয়াৰ উপৰি কংগ্ৰেছে অনুসূচিত জাতিৰ বাবে সংৰক্ষণ ১৫ শতাংশৰ পৰা ১৭ শতাংশলৈ বৃদ্ধি কৰাৰ প্ৰতিশ্ৰুতিও দোহাৰে । অনুসূচিত জনজাতিৰ বাবে তিনি শতাংশৰ পৰা সাত শতাংশলৈ, সংখ্যালঘুৰ সংৰক্ষণ চাৰি শতাংশলৈ পুনৰ বাহাল কৰা আৰু লিংগায়ত, ভককালিগ্গাছ আৰু অন্যান্য সম্প্ৰদায়ৰ বাবে সংৰক্ষণ বৃদ্ধি কৰাৰো প্ৰতিশ্ৰুতি প্ৰদান কৰা হৈছে ।
উল্লেখ্য যে, কৰ্ণাটকত ভোটদানৰ তাৰিখ ওচৰ চাপি অহাৰ লগে লগে কংগ্ৰেছে বৰ্তমানৰ শাসনাধিষ্ঠিত বিজেপিৰ বিৰুদ্ধে আক্ৰমণ তীব্ৰ কৰি তুলিছে আৰু চৰকাৰখনক '৪০ শতাংশ' কমিছনৰ চৰকাৰ বুলি কটাক্ষ কৰিছে । আনহাতে, কংগ্ৰেছে দলৰ প্ৰাৰ্থী তালিকাত বহুতো বিজেপিৰ পৰা কংগ্ৰেছলৈ অহা প্ৰাৰ্থীকো অন্তৰ্ভুক্ত কৰিছে । তেওঁলোকৰ ভিতৰত মুখ্য হৈছে কৰ্ণাটকৰ প্ৰাক্তন মুখ্যমন্ত্ৰী জগদীশ শ্বেট্টাৰ । কৰ্ণাটক বিধানসভাৰ নিৰ্বাচন অহা ১০ মে'ত অনুষ্ঠিত হ'ব আৰু ভোটগণনা অনুষ্ঠিত হ'ব ১৩ মে'ত ।
লগতে পঢ়ক : Karnataka Polls 2023 : কৰ্ণাটক নিৰ্বাচনৰ প্ৰচাৰত আজি মোডীৰ ব্যস্ত কাৰ্যসূচী, ৰাহুল-প্ৰিয়ংকাৰো প্ৰচাৰ অভিযান
