আগৰতলা,১৫ আগষ্ট : পশ্চিমবংগৰ বিধানসভা নিৰ্বাচনৰ (West Bengal Assembly Election) সময়ত 'খেলা হবে' (Khela Hobe) শ্ল'গানটোৱে যথেষ্ট চৰ্চা লাভ কৰিছিল । তৃণমূল কংগ্ৰেছে (Trinamool Congress) এই শ্ল'গানৰ জৰিয়তে এক প্ৰকাৰ আলোড়নৰ সৃষ্টি কৰিছিল । শেহতীয়াকৈ ত্ৰিপুৰাতো টিএমচিয়ে (TMC) নিজৰ শক্তি প্ৰদৰ্শনৰ বাবে আগবাঢ়িছে ।
যাৰ বাবে ৰাজ্যখনলৈ শেহতীয়াকৈ একাংশ টিএমচি নেতাৰ আগমন ঘটিছে । আগন্তুক বিধানসভা নিৰ্বাচনৰ বাবে ইতিমধ্যে দলটোৱে প্ৰস্তুতি চলাইছে ত্ৰিপুৰাত । এনে পৰিৱেশৰ মাজতে টিএমচিক সমালোচনা কৰিলে ত্ৰিপুৰাৰ উপমুখ্যমন্ত্ৰী জিষ্ণু দেৱবৰ্মাই (Jishnu Dev Varma) ।
তৃণমূল কংগ্ৰেছৰ খেলা হবে আহ্বানক তীব্ৰ সমালোচনা কৰি বিজেপি নেতাগৰাকীয়ে কয় যে এখন গণতান্ত্ৰিক দেশত নিৰ্বাচনৰ দৰে গুৰুত্বপূৰ্ণ অনুশীলনক খেলৰ সৈতে তুলনা কৰা উচিত নহয় । নিৰ্বাচনৰ এক নিজা শালীনতা আছে । ইয়াক সকলোৱে বজাই ৰখাটো প্ৰয়োজন । যেতিয়া লাখ লাখ লোকে তেওঁলোকৰ নেতা বাছনি কৰে সেই ক্ষেত্ৰত নিৰ্বাচন হৈছে আটাইতকৈ শুভ অনুশীলন ।
সেয়ে টিএমচিলৈ উপ মুখ্যমন্ত্ৰীগৰাকীৰ আহ্বান যাতে তেওঁলোকে ন্যূনতম শালীনতা বজাই ৰাখে । আনকি টিএমচিক উদ্দেশ্যি নেতাগৰাকীয়ে কয় যে নিৰ্বাচনক খেলৰ লগত তুলনা কৰি তেওঁলোকে ইমান তললৈ যাব নালাগে ।
কৰ আয়ুক্তৰ কাৰ্যালয়ত এক ৰক্তদান শিবিৰত (Blood donation camp) অংশ গ্ৰহণ কৰি দেৱবৰ্মাই সাংবাদিকৰ আগত এই মন্তব্য কৰে । লোকসকলক ৰক্তদান কৰিবলৈ উৎসাহিত কৰি মন্ত্ৰীগৰাকীয়ে কয় যে ৰক্তদানৰ দৰে মহৎ উদ্দেশ্যৰ বাবে অধিক লোকৰ প্ৰয়োজন । তেজ হৈছে শৰীৰৰ এটা উপাদান যাক নিৰ্মাণ বা ক্ৰয় কৰিব নোৱাৰি । ইফালে ৰক্তদান শিবিৰত বহুতো যুৱক-যুৱতীয়ে অংশগ্ৰহণ কৰিছে সেয়ে তেওঁ উল্লেখ কৰে যে ই সমাজৰ বাবে এক ভাল লক্ষণ ।
ইয়াৰ পূৰ্বে মন্ত্ৰীগৰাকীয়ে ৰাজ্যখনৰ গোৰ্খাবস্তিত নতুনকৈ স্থাপন কৰা পেঞ্চনাৰ হেল্প ডেস্ক (Pensioner help desk) উদ্বোধন কৰে । তেওঁ এই উদ্বোধনী অনুস্থানত ৰাইজক উদ্দেশ্যি কয় যে, দীঘলীয়া সময় ধৰি চৰকাৰী বিভাগত সেৱা আগবঢ়োৱাৰ পিছত কৰ্মচাৰীসকলে অৱসৰ লয় । কিন্তু অৱসৰৰ পিছত তেওঁলোকে পেঞ্চনৰ কামৰ বাবে এটা কাৰ্যালয়ৰ পৰা আন এটা কাৰ্যালয়লৈ যাবলগীয়া হয় আৰু বিশেষকৈ সচিবালয়ত তেওঁলোকে কঠোৰ নিৰাপত্তা প্ৰট'কলৰ বাবে কেইবাটাও বাধাৰ সন্মুখীন হয় । সেয়ে চৰকাৰে হেল্প ডেস্কৰ জৰিয়তে পেঞ্চনাৰসকলক সহায় কৰিব বিচাৰিছে ।
লগতে পঢ়ক :বিপ্লৱ কুমাৰেই হ'ব ত্ৰিপুৰাৰ পৰৱৰ্তী মুখ্যমন্ত্ৰীৰ প্ৰাৰ্থী !
