নেশ্যনেল ডেস্ক, 30 জুলাই : ভূত ওলাইছে ৷ কোনো শ্মশান বা কোনো ভূত বাংলাত নহয় ৷ এইবাৰ দিন দুপৰতে ভূত বিদ্যালয়ত ৷ বিদ্যালয়ৰ এটা চুকত বহি যদি এগৰাকী শিক্ষাৰ্থীয়ে কান্দিছে, তেন্তে আন এগৰাকীয়ে আকৌ বিদ্যালয়ক খেলপথাৰতে বহি কিবা-কিবি অবুজ ভাষাৰে চিঞৰি চিঞৰি কথা কৈছে ৷
কেৱল এগৰাকী বা দুগৰাকী নহয়, বিদ্যালয়খনৰ কেইবাগৰাকীও শিক্ষাৰ্থীয়ে মাটিত বাগৰি বাগৰি কান্দিছে ৷ ক’ত কি হৈছে কোনোৱে যেন একো ধৰিবই পৰা নাই ৷ চিকিৎসকলেও ধৰিব পৰা নাই প্ৰকৃত ঘটনাৰ কাৰণ ৷ বিদ্যালয়লৈ অনা হৈছে ভূত খেদা বেজো ৷ কিন্তু কোনোও যেন একো ধৰিবই পৰা নাই ৷ বৰ্তমান সামাজিক মাধ্যমত ভাইৰেল হৈ পৰিছে এই বিদ্যালয়ত ভূত ওলোৱাৰ সমগ্ৰ দৃশ্যাংশ ৷
আমি কৈ থকা ভূত ওলোৱা বিদ্যালয়খন হৈছে উত্তৰাখণ্ডৰ (Ghost at Uttakhand school) ৷
তথ্য অনুসৰি, বুধবাৰৰ পৰা উত্তৰাখণ্ডৰ ৰাইখোলী চৰকাৰী জুনিয়ৰ হাই স্কুল হঠাৎ ছাত্ৰীসকল অচেতন হৈ পৰে ৷ কেৱল ছাত্ৰীসকল অচেতন হোৱাই নহয়, বেলেগ বেলেগ শ্ৰেণী কোঠাৰ পৰা আদি কৰি বিদ্যালয়ৰ খেলপথাৰত প্ৰায় 15 গৰাকী ছাত্ৰী বিভিন্ন সময়ত চিঞৰ-বাখৰ কৰি উগ্ৰ হৈ পৰে ৷
উত্তেজিত ছাত্ৰীসকল শান্ত কৰিব নোৱাৰি চিকিৎসক, কবিৰাজ সকলোৰে সহায় লয় বিদ্যালয় কৰ্তৃপক্ষই ৷ কিন্তু কোনো বিশেষ পাৰ্থক্য দেখিবলৈ পোৱা নগ’ল উত্তেজিত ছাত্ৰীসকলৰ স্বভাৱত (Health department called the screaming of the girl students as mass hysteria in bageshwars school)৷ বুধবাৰে সংঘটিত হোৱা এই ঘটনাক কেন্দ্ৰ কৰি গাঁওবাসীও অধিক শংকিত হৈ পৰিছে ৷
বুধবাৰৰ পৰা শনিবাৰলৈকে বিদ্যালয় বন্ধ ৰখাৰ নিৰ্দেশনা জাৰি কৰিছে জিলা প্ৰশাসনে ৷ জানিব পৰা মতে, বিগত তিনিদিন ধৰি স্বাস্থ্য বিভাগৰ এটা দলে বাহৰ পাতি আছে উক্ত বিদ্যালয়ত ৷ ইফালে গাঁওবাসীয়ে উক্ত বিদ্যালয়ত পূজা-পাতল কৰাৰহে চিন্তা-চৰ্চা কৰিছে ৷ গাঁৱৰ একাংশ লোকৰ মতে, বিদ্যালয়খনত কোনো অশুভ শক্তিয়ে বিৰাজ কৰিছে ৷
যাৰ ফলত এনে ঘটনা সংঘটিত হৈছে ৷ উল্লেখ্য যে, উত্তৰাখণ্ডৰ ৰাইখোলী চৰকাৰী জুনিয়ৰ হাই স্কুলৰ ওপৰত তীক্ষ্ন নজৰ ৰাখিছে জিলা প্ৰশাসন আৰু জিলা স্বাস্থ্য বিভাগে ৷ অৱশ্যে এই ঘটনা এতিয়া সৰ্বত্ৰে চৰ্চিত হৈ পৰিছে ৷
লগতে পঢ়ক : Child abuse case : টিংখাঙত মামীয়েকৰ নিৰ্যাতনৰ বলি ৫ বছৰীয়া কণমানি
