নেশ্যনেল ডেস্ক, 26 মে’: দেশত সোণৰ গহনা আৰু ইয়াৰ ডিজাইনৰ ক্ষেত্ৰত ১৫ জুনৰ পৰা হলমাৰ্ক বাধ্যতামূলক কৰা হৈছে ৷ সোণৰ গহণা আৰু শিল্পকলাৰ ওপৰত ১৫ জুনত হলমাৰ্কিং বাধ্যতামূলক হ'ব। কেন্দ্ৰীয় উপভোক্তা পৰিক্ৰমা বিভাগে এই সিদ্ধান্ত গ্ৰহণ কৰিছে ৷ এই ব্যৱসায়ৰ ক্ষেত্ৰত জড়িত লোকসকলক কেৱল 14, 18, 22 কেৰেটযুক্ত সোণৰ গহনা বিক্ৰী কৰিবলৈ অনুমতি দিয়া হ'ব ৷ উল্লেখ্য যে, সোণৰ হলমাৰ্কে গ্ৰাহকক বিশুদ্ধতাৰ নিশ্চয়তা প্ৰদান কৰে ৷
এই সিদ্ধান্তই গ্ৰাহকক সোণৰ অলংকাৰ ক্ৰয় কৰাৰ ক্ষেত্ৰত নিশ্চয়তা প্ৰদান কৰিব আৰু প্ৰৱঞ্চনাৰ হাৰ হ্ৰাস কৰিব ৷ তদুপৰি চুৰি হোৱা গহণা ক্ৰয়-বিক্ৰয়ৰ ক্ষেত্ৰতো এই সিদ্ধান্তই প্ৰভাৱ পেলাব ৷ ইয়াত সন্নিৱিষ্ট থাকিব কেৰেট-ফাইনেঞ্চ, হলমাৰ্ক চেণ্টাৰ নম্বৰ, জুৱেলাৰী বিপণী অথবা ইয়াৰ লগত জড়িত লোকসকলৰ বিশেষ চিনাক্তকৰণ নম্বৰ থাকিব ৷ গহণা, সোণৰ সামগ্ৰীৰ ওপৰত এটা হলমাৰ্কৰ বাবে অতিৰিক্ত 35 টকা কৰ ধাৰ্য কৰা হৈছে ৷ আনহাতে গহণাসমূহৰ বিশুদ্ধতাৰ বাবে নিম্নতম 200 টকাৰ লগতে ওপৰঞ্চি কৰ ধাৰ্য কৰা হৈছে ৷ এই কৰসমূহে সোণৰ মূল্যবৃদ্ধিৰ ক্ষেত্ৰত কোনো প্ৰভাৱ নেপেলায় ৷
15 জুনৰ পৰা গহণা বিক্ৰীৰ এই নতুন ব্যৱস্থাৰ বাবে ইতিমধ্যে এখন সমিতি গঠন কৰা হৈছে ৷ এই সমিতিয়ে হলমাৰ্ক সম্পৰ্কীয় সমস্যাবোৰ সমাধান কৰিব ৷ ভাৰতীয় মানদণ্ড ব্যুৰো (বিআইএছ)ৰ মহানিৰ্দেশক প্ৰমোদ তিৱাৰীৰ অধ্যক্ষতাত এই সমিতিখন গঠন কৰা হৈছে ৷ সমিতিখনৰ গুৰুত্বপূৰ্ণ সদস্যসকল হৈছে কেন্দ্ৰীয় উপভোক্তা পৰিক্ৰমা বিভাগৰ সচিব নিধি খাড়ে আৰু গহণা সংস্থা আৰু হলমাৰ্ক সংস্থাৰ প্ৰতিনিধিসকল ৷
পূৰ্বে ১ জুনৰ পৰা সমগ্ৰ দেশত হলমাৰ্ক কাৰ্যকৰী কৰিব লাগিছিল যদিও ক’ভিড সৃষ্ট পৰিৱেশৰ বাবে এয়া স্থগিত কৰা হৈছিল ৷ ভাৰতীয় মানদণ্ড ব্যুৰো (বিআইএছ)য়ে এই সমগ্ৰ প্ৰক্ৰিয়া নিৰীক্ষণ কৰিব ৷ বৰ্তমান কেৱল 40 শতাংশ সোণৰ গহণা হলমাৰ্কৰ বাবে চিহ্নিত কৰা হৈছে ৷ বিআইএছে 2020 চনৰ পৰা সোণৰ গহনাৰ ওপৰত হলমাৰ্ক আঁচনি প্ৰযোজ্য কৰিছে ৷ 15 জুনৰ পৰা দেশত মাত্ৰ হলমাৰ্কযুক্ত গহণাহে বিক্ৰী কৰা হ'ব ৷
লগতে চাওকঃ ৰাজ্যত 5 জুনলৈ বৃদ্ধি সান্ধ্য আইন
