নিউজ ডেস্ক, ৭ অক্টোবৰ : মুম্বাই গে'টৱেৰ ৰাজপথ এক আশ্চৰ্যকৰ ঘটনাৰ মঞ্চ হৈ পৰে । নগদ ধনভৰ্তি এখন ট্ৰাক ৰাজপথত বিকল হৈ পৰাৰ পিছত তাৰ পৰা ২০০০ টকীয়া নোট বতাহত উৰিবলৈ আৰম্ভ কৰে । যাৰ ফলত চহৰখনৰ ব্যস্ত জনজীৱন হঠাৎ বাধাগ্ৰস্ত হৈ পৰে । কোনো ছবিৰ দৃশ্যৰ দৰে নোটবোৰ বতাহত নাচি আছিল । প্ৰথমতে ওচৰ-পাজৰৰ লোকসকল স্তম্ভিত হৈ মূক দৰ্শক হৈ থাকে । কিন্তু লগে লগে তেওঁলোকে সম্বিত ঘূৰাই পায় আৰু অপ্ৰত্যাশিত আনন্দত মতলীয়া হৈ পৰে ।
চহৰখনৰ ৰাজপথত হঠাতে হোৱা নোটৰ বৰষুণত স্বাভাৱিক গতি স্থবিৰ হৈ পৰে আৰু তাৰ পৰিৱৰ্তে উত্তেজনা আৰু বিস্ময়ৰ পৰিৱেশৰ সৃষ্টি হয় । ইউটিবত প্ৰকাশিত ভিডিঅ' অনুসৰি, এই নোটৰ অপ্ৰত্যাশিত বৰষুণত তাত একত্ৰিত হোৱা দৰ্শকসকলে নোট ধৰিবলৈ হাহাকাৰ কৰে । যাৰ বাবে সকলোৱে অপ্ৰত্যাশিতভাৱে নিজৰ কাম-কাজ এৰি নোটৰ পিছে পিছে দৌৰিবলৈ আৰম্ভ কৰে । জনসাধাৰণৰ মাজত বিয়পি পৰা এই আনন্দৰ ঢৌৱে চহৰখনৰ ব্যস্ততাপূৰ্ণ গতিৰ মাজতে সুখ আৰু আশ্চৰ্যৰ এক বিৰল দৃশ্য অংকিত কৰে ।
কিন্তু এই দৃশ্যৰ মাজতে বহু প্ৰশ্নও উত্থাপন হয় । ফ্লিপকাৰ্টৰ ট্ৰাক এখনত ইমান পৰিমাণৰ নগদ ধন কিয় ভৰোৱা হৈছিল ? এইটো এটা সাধাৰণ বিজুতি আছিল নে চকুৰ আগত দেখা পোৱা ঘটনাতকৈ আন কিবা বেলেগ আছিল ? ঘটনাটোৰ সময়, বিশেষকৈ অতি প্ৰত্যাশিত ফ্লিপকাৰ্ট বিগ বিলিয়ন ডেজ ছেলৰ সময়ত এই অনুমানক ইন্ধন যোগাইছে । এই 'দুৰ্ঘটনা'টো পূৰ্বপৰিকল্পিত নেকি ? নে ফ্লিপকাৰ্টৰ প্ৰচাৰৰ কৌশলগত পদক্ষেপ তাকে লৈ গুঞ্জন উঠিছে ।
ট্ৰাকখনৰ এই ভিডিঅ' ইনষ্টাগ্ৰাম আৰু টুইটাৰত ভাইৰেল হৈ পৰিছে । তাত মানুহে ফ্লিপকাৰ্টক প্ৰশ্ন কৰিছে যে প্ৰকৃততে কি হৈছিল আৰু আন কিছু ইউজাৰে প্ৰশ্ন কৰিছে যে তেওঁলোকে পৰৱৰ্তী ট্ৰাকখন ক'ত পাব পাৰে । এই সন্দৰ্ভত স্পষ্টীকৰণ বিচাৰি ফ্লিপকাৰ্টৰ ওচৰলৈও যোৱা হয় । এইটো এটা কাকতালীয় বিজুতি নে আগন্তুক বিবিডি বিক্ৰীত কোনো অন্তৰ্নিহিত উদ্দেশ্যত হৈছে ? অৱশ্যে এই সন্দৰ্ভত কোনো স্পষ্ট সঁহাৰি লাভ কৰা হোৱা নাই আৰু তাৰ বাবে অপেক্ষা কৰা হৈছে ।
কিন্তু চহৰখনৰ মানুহৰ মাজত এতিয়া কেৱল এইটোৱেই আলোচনাৰ বিষয় । বিভিন্ন লোকে বিভিন্ন অনুমান কৰাৰ লগতে ফ্লিপকাৰ্ট ট্ৰাকৰ পৰা ধন উৰি ফুৰা ভিডিঅ'টোও ছ'চিয়েল মিডিয়াত ঘূৰি আছে ।
লগতে পঢ়ক :MGNREGA scheme : 'এমজিএনৰেগাৰ চাহিদা হ্ৰাস কৰিবলৈ ডিজিটেলকৰণ কেন্দ্ৰৰ'
