নেশ্যনেল ডেস্ক,১৫ অক্টোবৰ : উত্তৰ প্ৰদেশৰ শ্বাহজাহানপুৰত চাঞ্চল্যকৰ ঘটনা সংঘটিত হৈছে । এগৰাকী প্ৰভাৱশালী বিজেপি নেত্ৰীৰ বাহনত আক্ৰমণ দুৰ্বৃত্তৰ । বাহনৰ ভিতৰত শিলৰ টুকুৰা উদ্ধাৰ হৈছে ।
তিলহাৰৰ বিজেপি বিধায়িকা সলোনা কুশৱাহাৰ বাহনত শনিবাৰে নিশা দুৰ্বৃত্তই আক্ৰমণ কৰে । বিজেপিৰ বিধায়িকাগৰাকীয়ে তেওঁৰ বাহনত গুলীচালনাৰ আশংকা প্ৰকাশ কৰিছে । অৱশ্যে আৰক্ষীয়ে বাহনখনৰ ভিতৰত এটা শিলৰ টুকুৰা উদ্ধাৰ কৰিছে । ঘটনাটোত বিধায়িকাগৰাকীৰ এগৰাকী নিৰাপত্তাকৰ্মী আঘাতপ্ৰাপ্ত হয় । বাহনখনৰ পিছফালে বহি থকা নিৰাপত্তাকৰ্মীজনৰ মুখত আঘাত পায় । বৰ্তমান আৰক্ষীয়ে ঘটনাটোৰ তদন্ত অব্যাহত ৰাখিছে ।
তিলহাৰৰ বিজেপি বিধায়িকাগৰাকীয়ে এক ধৰ্মীয় অনুষ্ঠানত অংশ লৈ উভতি আহি আছিল । নিগোহি আৰক্ষী থানাৰ অন্তৰ্গত গিৰ্গিচা গাঁৱৰ সমীপত তেওঁৰ বাহনখনৰ পিছফালৰ গ্লাচত দুৰ্বৃত্তই আক্ৰমণ কৰে । লগে লগে চালকজনে বাহনখন দ্ৰুতগতিৰে চলাই আৰু সেই স্থানৰ পৰা পলায়ন কৰে । সুৰক্ষিত স্থানত উপস্থিত হৈ তেওঁলোকে আৰক্ষীক অৱগত কৰে । খবৰ পোৱাৰ পাছতে স্থানীয় আৰক্ষী থানাৰ বিষয়া আৰু আৰক্ষী অধীক্ষক ঘটনাস্থলীত উপস্থিত হয় ।
বিজেপি বিধায়িকা সলোনা কুশৱাহাই কোৱা মতে তেওঁৰ বাহনত গুলীচালনা কৰা হৈছিল । অৱশ্যে আৰক্ষীয়ে ঘটনাটো সন্দৰ্ভত তদন্ত অব্যাহত ৰাখিছে । আৰক্ষীৰ তদন্তৰ পাছত হে পোহৰলৈ আহিব কোনে আৰু কি উদ্দেশ্যে এই আক্ৰমণ কৰিছিল । ইফালে এই ঘটনাক লৈ অঞ্চলটোত তীব্ৰ উত্তেজনাৰ সৃষ্টি হৈছে । বিধায়িকাগৰাকীৰ সমৰ্থকসকলে এই ঘটনাক গৰিহণা দিয়াৰ লগতে ইয়াৰ আঁৰত থকা লোকক শীঘ্ৰে আটক কৰিবলৈ দাবী জনাইছে ।
লগতে পঢ়ক :Mukhtar Ansari and Abbas in money laundering case : মুখতাৰ আনছাৰী আৰু আব্বাছৰ লাখ টকাৰ সম্পত্তি জব্দ
