নেশ্যনেল ডেস্ক, ১০ মে': ক'ভিড-১৯ মহামাৰীৰ কবলত পৰিছে যোধপুৰস্থিত আই আই টিৰ এজনৰ পিছত আনজন শিক্ষাৰ্থী । যোৱা সপ্তাহত শিক্ষানুষ্ঠানখনত পাঠ গ্ৰহণ কৰিবলৈ অহাৰ পিছতে ২৮ গৰাকী শিক্ষাৰ্থী কৰ'ণা আক্ৰান্ত হয় । মহামাৰীত আক্ৰান্ত শিক্ষাৰ্থীসকলক বৰ্তমান শিক্ষানুষ্ঠান চৌহদৰ ভিতৰৰে এটা ছাত্ৰাবাসত থাকিবলৈ দিয়া হৈছে ।
জানিব পৰা মতে, ক'ভিড-১৯ৰ বিৰুদ্ধে যুঁজ দিয়াৰ বাবে শিক্ষানুষ্ঠানখনত সকলো সাৱধনতা অৱলম্বন কৰা হৈছে । মহমাৰীত আক্ৰান্ত শিক্ষাৰ্থীসকলৰ সম্পৰ্কলৈ অহা আন শিক্ষাৰ্থীৰ লগতে শিক্ষক-শিক্ষয়িত্ৰী আৰু কৰ্মচাৰীসকলৰ বাবে ছাত্ৰাবাসত পৃথককৈ থকাৰ ব্যৱস্থা কৰা হৈছে ।
লকডাউনৰ বাবে বহিঃৰাজ্যৰ শিক্ষাৰ্থীসকল নিজ নিজ ৰাজ্যলৈ উভতি যাব পৰা নাই । ব্যৱহাৰিক পাঠক্ৰম অধ্যয়নৰ বাবে শিক্ষাৰ্থীসকল ছাত্ৰাবাসত থকা বাবে শিক্ষানুষ্ঠান কৰ্তৃপক্ষই পৰিস্থিতি নিয়ন্ত্ৰণত ৰখাৰ বাবে চেষ্টা অব্যাহত ৰাখিছে । পূৰ্বে শিক্ষানুষ্ঠানখনত ৫২টা আক্ৰান্তৰ ঘটনা পোহৰলৈ আহিছিল ।
এতিয়ালৈকে শিক্ষাৰ্থী, শিক্ষক-শিক্ষয়িত্ৰী আৰু আন কৰ্মচাৰীসহ ১৫২ জন মহামাৰীৰ কবলত পৰিছে । আনহাতে, ৰাজস্থানত যোৱা ৯ মে'ত ১৫৯ জন লোকে প্ৰাণ হেৰুৱাইছে আৰু ১৭,৯২১ জন নতুনকৈ মহামাৰীত আক্ৰান্ত হৈছে । চৰকাৰী তথ্য অনুসৰি, এতিয়ালৈকে ৫,৫০,৮৫৩ জন লোক আৰোগ্য হৈ উঠিছে আৰু বৰ্তমান সক্ৰিয় ৰোগীৰ সংখ্যা হৈছে ২,০০,২৮৯ জন ।
লগতে পঢ়ক:ক'ভিডত আক্ৰান্ত দিল্লীৰ সৰোজ হাস্পতালৰ চিকিৎসকসহ ৮০ গৰাকী স্বাস্থ্য কৰ্মী
