নেশ্যনেল ডেস্ক,4 জুন : ত্ৰিপুৰাৰ আগৰতলাৰ বৰ্ষা নামৰ এজনী কণমানিৰ ইচ্ছা পূৰণ কৰিলে মুখ্যমন্ত্ৰী বিপ্লব কুমাৰ দেৱে । কিছুদিন পূৰ্বে ৰাজধানী আগৰতলাৰ উপনগৰৰ উত্তম দাসৰ কন্যা তথা জৱাহৰ নবোদয় বিদ্যালয়ৰ অষ্টম শ্ৰেণীৰ ছাত্ৰী বৰ্ষা দাসে মুখ্যমন্ত্ৰী বিপ্লব কুমাৰ দেৱলৈ ফেচবুকযোগে এটি ভিডিঅ’ বাৰ্তা প্ৰেৰণ কৰিছিল । এই বাৰ্তাযোগে বৰ্ষাই কৈছিল যে, তেওঁ মাক-দেউতাক আৰু এজন ভায়েকৰ সৈতে এটি সৰু কোঠাত বাস কৰে । তেওঁৰ দেউতাকৰ আৰ্থিক অৱস্থা ইমানেই দুৰ্বল যে বৰ্ষাৰ পঢ়াৰ সুবিধাৰ্থে এখন মেজো কিনিব নোৱাৰে । ইফালে বাৰ্তা প্ৰেৰণ কৰাৰ কেইদিনমানৰ ভিতৰতে বৰ্ষাৰ মাতৃ কৰ’ণাত আক্ৰান্ত হয় ৷
ইয়াৰে পাচতে কণমানি বৰ্ষাৰ পৰিয়াললৈ যেন কাল ধুমুহা নামি আহিছিল ৷ বৰ্ষাৰ ঘৰত নূন্যতম খাদ্য-সামগ্ৰীৰো অভাৱে দেখা দিছিল । অসহায় বৰ্ষাই পুনৰ ফেচবুকযোগে মুখ্যমন্ত্ৰীলৈ এক বাৰ্তা প্ৰেৰণ কৰে । এই বাৰ্তাত মুখ্যমন্ত্ৰী বিপ্লৱ দেৱক পৰিয়ালৰ বাবে খাদ্য যোগান ধৰিবলৈ আৰু অসুস্থ মাতৃৰ চিকিৎসা কৰিবলৈ আহ্বান জনায় কণমানি বৰ্ষাই । বাৰ্তাটো মুখ্যমন্ত্ৰীৰ দৃষ্টিগোচৰ হৈছিল আৰু তেওঁ লগে লগে সংশ্লিষ্ট কৰ্তৃপক্ষক বৰ্ষাৰ পৰিয়ালটোক সহায় কৰিবলৈ নিৰ্দেশ দিয়ে ।
ভিডিঅ’ৰ বাৰ্তা পোৱাৰ পিছদিনাই সংশ্লিষ্ট কৰ্তৃপক্ষই বৰ্ষাৰ ঘৰত এখন মজ, বিভিন্ন খাদ্য সামগ্ৰী আৰু বৰ্ষাৰ মাতৃৰ বাবে ঔষধৰ যোগান ধৰে ৷ মুখ্যমন্ত্ৰীৰ পৰা দ্ৰুত আৰু প্ৰয়োজনীয় সহায় লাভ কৰি বৰ্ষাৰ পৰিয়ালটো আৱেগিক হৈ পৰে । তেওঁলোকে বিশ্বাস কৰা নাছিল যে, কণমানিজনীয়ে প্ৰেৰণ কৰা এটা ভিডিঅ’ ৰাজ্যৰ মুখ্যমন্ত্ৰীৰ দৃষ্টিগোচৰ হ’ব ৷ কণমানি বৰ্ষা আৰু তেওঁৰ পৰিয়ালে মুখ্যমন্ত্ৰীৰ সহায়ৰ বাবে মুখ্যমন্ত্ৰী বিপ্লৱ কুমাৰ দেৱক ধন্যবাদ জ্ঞাপন কৰে ৷ এই ঘটনাই প্ৰমাণ কৰিছে যে, মুখ্যমন্ত্ৰী বিপ্লৱ কুমাৰ দেৱে ত্ৰিপুৰাৰ জনসাধাৰণৰ সেৱাত নিৰন্তৰভাৱে সক্ৰিয় হৈ আছে ।
লগতে পঢ়ক : আৰম্ভ হ'ল কাগজ কলৰ নিলাম প্ৰক্ৰিয়া
