নিউজ ডেস্ক, 14 অক্টোবৰ : 7 নৱেম্বৰত অনুষ্ঠিত হ'ব ছত্তিশগড় বিধানসভা নিৰ্বাচনৰ প্ৰথম পৰ্যায়ৰ ভোটগ্ৰহণ ৷ মন কৰিবলগীয়া যে প্ৰথম পৰ্যায়ত অন্তৰ্ভূক্ত হোৱা ৰাজ্যখনৰ 20 টা বিধানসভা সমষ্টিৰ ভিতৰত 18 টা মাওবাদী প্ৰভাৱিত অঞ্চলত অৱস্থিত ৷ আকৰ্ষণীয় কথাটো হ'ল যে বিগত তিনিটা নিৰ্বাচনত ভোটাৰৰ সংখ্যা যথেষ্ট বৃদ্ধি পাইছে ৷ এই প্ৰৱণতাই ইংগিত দিয়ে যে, হিংসা আৰু ভাবুকি স্বত্বেও ৰাইজে সাহসেৰে উগ্ৰপন্থীৰ ভাবুকিক অস্বীকাৰ কৰিছে আৰু দৃঢ়তাৰে গণতন্ত্ৰৰ ওপৰত তেওঁলোকৰ বিশ্বাস ৰাখিছে ৷
কিছুমান তথ্যই কথা প্ৰমাণ কৰিছে ৷ বছৰ বছৰ ধৰি মাওবাদী প্ৰভাৱিত অঞ্চলসমূহত ভোটদানৰ শতকৰা হাৰ ক্ৰমাগতভাৱে বৃদ্ধি পাইছে ৷ অংশগ্ৰহণৰ এই উৰ্ধমুখী ধাৰা জনসাধাৰণৰ স্থিতিস্থাপকতাৰ প্ৰমাণ ৷ 2003 চনত ভোটদানৰ হাৰ 66.04 শতাংশ আছিল, যিটো 2008 চনত 67.05 শতাংলৈ লৈ বৃদ্ধি পায় ৷ 2013 চনত এই সংখ্যা আৰু অধিক বৃদ্ধি পাই 76 শতাংশ হয় আৰু 2018 চনত 76.37 হয় ৷ উদাহৰণস্বৰূপে বিজাপুৰত ভোটাৰৰ ভোটদানৰ হাৰ 2008 চনত মাত্ৰ 29.19ৰ পৰা 2018 চনত আশাব্যঞ্জকভৱে 48.18 শতাংশলৈ বৃদ্ধি পায় ৷
প্ৰকৃততে নক্সালবাদে দীৰ্ঘদিন ধৰি অঞ্চলটোক পীড়িত কৰি আহিছে, বিক্ষিপ্ত ঘটনাই এতিয়াও শান্তিক প্ৰত্যাহ্বান জনাই আছে ৷ নিৰ্বাচনৰ পূৰ্বে মাওবাদীসকলে সাধাৰণতে নিৰ্বাচন বৰ্জনৰ আহ্বান জনাই পত্ৰিকা আৰু পোষ্টাৰ প্ৰচাৰ কৰে ৷ ফলত প্ৰায়ে স্থানীয় লোকসকলৰ মাজত আতংকৰ সৃষ্টি হয় ৷ অৱশ্যে চৰকাৰ আৰু নিৰ্বাচন আয়োগে শান্তিপূৰ্ণ নিৰ্বাচন অনুষ্ঠিত কৰাৰ বাবে গুৰুত্বপূৰ্ণ ব্যৱস্থা গ্ৰহণ কৰিছে ৷
মাওবাদী প্ৰভাৱিত অঞ্চলসমূহত ভোটাৰৰ হাৰ কম হোৱাত অৰিহণা যোগোৱা এটা ডাঙৰ প্ৰত্যাহ্বান হৈছে ভোটগ্ৰহণ কেন্দ্ৰৰ মাজৰ বিশাল দূৰত্ব ৷ তথাপিও 2023 চনৰ নিৰ্বাচনত ভাৰতে স্বাধীনতা লাভ কৰাৰ পিছত প্ৰথমবাৰৰ বাবে নিজ নিজ সমষ্টিত ভোটদান কৰিব পৰা 120 খনতকৈও অধিক গাঁও অন্তৰ্ভুক্ত হোৱাটো এটা উল্লেখযোগ্য পৰিঘটনা ৷
এই অঞ্চলসমূহৰ নিৰাপত্তা পৰিস্থিতি শীৰ্ষ অগ্ৰাধিকাৰৰ বিষয় হৈয়ে আছে ৷ বাস্তাৰৰ বিভিন্ন বিধানসভা সমষ্টিৰ 24 গৰাকী নেতাক ‘এক্স’ শ্ৰেণীৰ নিৰাপত্তা দিছে চৰকাৰে ৷ এই নেতাসকলৰ নিৰ্বাচনী প্ৰচাৰৰ সময়ত দুজন সশস্ত্ৰ প্ৰহৰী লগত থাকিব ৷ বৰ্তমান মাওবাদীসকলৰ প্ৰধান লক্ষ্য হৈছে স্থানীয় নেতৃত্বক নিৰ্মূল কৰা, কিয়নো তেওঁলোকে স্বীকাৰ কৰে যে নেতৃত্ব বৃদ্ধিৰ লগে লগে অঞ্চলটোৰ ওপৰত আকৰ্ষণ হ্ৰাস পায় ৷ দুখৰ বিষয় যে তেওঁলোকে নিজৰ উদ্দেশ্য সাধন কৰিবলৈ হিংসাৰ আশ্ৰয় ল’বলৈয়ো কুণ্ঠাবোধ নকৰে ৷
বাস্তাৰ অঞ্চলৰ জ্যেষ্ঠ সাংবাদিক মনীষ গুপ্তাই কয়, ‘মাওবাদী প্ৰভাৱিত অঞ্চলত শান্তিপূৰ্ণ ভোটদানৰ সুবিধাৰ বাবে অলপ বেছি নিৰাপত্তাৰ ব্যৱস্থা থাকিব লাগে ৷ চৰকাৰেও এই অঞ্চলসমূহত উন্নয়নমূলক কাৰ্যসূচী ৰূপায়ণৰ চেষ্টা কৰিছে, কিন্তু উন্নয়নৰ গতি ত্বৰান্বিত কৰা উচিত আৰু ইয়াৰ দ্বাৰা এই অঞ্চলসমূহৰ পৰা নক্সালবাদক আঁতৰাই পেলাব পৰা যাব ৷”
এগৰাকী মাওবাদী বিশেষজ্ঞ বৰ্ণিকা শৰ্মাই কয়, ‘যদিও মাওবাদী প্ৰভাৱিত জিলা আৰু চহৰ অঞ্চল আৰু ইয়াৰ আশে-পাশে উন্নয়নে প্ৰতিশ্ৰুতি দেখুৱাইছে, কিন্তু এতিয়াও আকাংক্ষিত স্তৰত উপনীত হোৱা নাই ৷ তথাপিও এই অঞ্চলসমূহত ভোটাৰৰ ভোটদানৰ হাৰ বৃদ্ধি পোৱাটো সাধাৰণ জনতাৰ মাজত ক্ৰমাৎ বৃদ্ধি পোৱা সজাগতাৰ প্ৰমাণ ৷”
মাওবাদীৰ দ্বাৰা সৃষ্টি হোৱা হিংসাত্মক ঘটনাই ছত্তিশগড়ৰ ইতিহাস বিনষ্ট কৰিছে ৷ নিৰ্বাচনত ইয়াৰ প্ৰভাৱৰ এক উদাহৰণ 2013 চনত ছত্তিশগড় বিধানসভা নিৰ্বাচনৰ ঠিক পূৰ্বে ঘটিছিল ৷ বাস্তাৰ জিলাৰ ঝীৰাম উপত্যকাত ‘পৰিৱৰ্তন যাত্ৰা’ৰ সময়ত মাওবাদীয়ে কংগ্ৰেছ নেতাৰ কনভয়ক লক্ষ্য কৰি লৈছিল ৷ এই নৃশংস আক্ৰমণৰ ফলত ৰাজ্যিক কংগ্ৰেছৰ সভাপতি নন্দ কুমাৰ পেটেল, বিৰোধী দলৰ প্ৰাক্তন নেতা মহেন্দ্ৰ কৰ্ম, প্ৰাক্তন কেন্দ্ৰীয় মন্ত্ৰী বিদ্যা চৰণ শুক্লাকে ধৰি 29 জন লোকে প্ৰাণ হেৰুৱাবলগীয়া হয় ৷
যোৱা কিছু বছৰতো মাওবাদীয়ে ৰাজনৈতিক ব্যক্তিক লক্ষ্য কৰি লোৱাৰ পৰা আঁতৰি থকা নাই ৷ 2019 চনত লোকসভা নিৰ্বাচনৰ সময়ত দন্তেৱাড়াৰ বিজেপি বিধায়ক ভীমা মাণ্ডৱীক হত্যা কৰিছিল ৷ এই ঘটনা সংঘটিত হৈছিল 2019 চনৰ 9 এপ্ৰিলত ৷ মাওবাদীয়ে নকুলনাৰৰ শ্যামগিৰি গাঁৱৰ সমীপত এটা ইম্প্ৰভাইজড বিস্ফোৰক যন্ত্ৰ (আই ই ডি) স্থাপন কৰিছিল, যাৰ ফলত ভীম মাণ্ডৱী আৰু আন তিনিজন লোকৰ মৃত্যু হৈছিল ৷
2023 চনত মাওবাদীয়ে তেওঁলোকৰ দলৰ চাৰিজন নেতাক হত্যা কৰিছে বুলি বিজেপিয়ে দাবী কৰাৰ লগে লগে এই ভয়ংকৰ সংখ্যা অব্যাহত আছে ৷ এই চাৰিজন ব্যক্তি হ’ল নাৰায়ণপুৰ জিলাৰ সাগৰ সাহু, বাস্তাৰৰ বুধৰাম কৰতাম আৰু বিজাপুৰ জিলাৰ নীলকণ্ঠ কাক্কেম আৰু ৰামধন আলমী ৷
এই হতাশাজনক কাণ্ডৰ মাজতো কেন্দ্ৰীয় গৃহ বিভাগে দৃঢ়তাৰে কয় যে মাওবাদীৰ হিংসা ধাৰাবাহিকভাৱে হ্ৰাস পাইছে ৷ তেওঁলোকে 2010 চনৰ তুলনাত 2022 চনত মাওবাদী হিংসা 77 শতাংশ হ্ৰাস পোৱা আৰু মাওবাদী হিংসাৰ বাবে নিৰাপত্তাৰক্ষী আৰু সাধাৰণ নাগৰিকৰ মৃত্যু 90 হ্ৰাস পোৱা বুলি জনাইছে ৷
লগতে পঢ়ক : Sharjeel Imam Case : শ্বাৰ্জিল ইমামৰ উচটনিমূলক ভাষণ; ২ নৱেম্বৰলৈকে স্থগিত জামিন আবেদনৰ ৰায়
