নিউজ ডেস্ক, 26 জুলাই : পাকিস্তানৰ অনুপ্ৰৱেশৰ বিষয়ে সৰ্ব প্ৰথমে তাশি নামগ্যাল নামৰ এগৰাকী স্থানীয় ভেড়াৰখীয়াই সকলোকে খবৰ দিছিল ৷ তাশি নামগ্যালে তেওঁৰ হেৰোৱা য়াকটো বিচাৰি যোৱাৰ সময়তে পাকিস্তানী সেনাৰ সামৰিক বাহিনীক প্ৰত্যক্ষ কৰিছিল ৷ তেওঁ লগে লগে ভাৰতীয় সেনাক এই বিষয়ে খবৰ দিছিল আৰু ভাৰতীয় সেনাই ইয়াক পৰীক্ষা কৰি সঁচা বুলি প্ৰমাণিত কৰিছিল ৷ তাশি নামগ্যাল, মৰুপ ছেৰিং আৰু আলি ৰাজা ষ্টানবাই গাৰখুনৰ পৰা বাণজু হিললৈ নিজৰ ভেড়া চৰাবলৈ গৈছিল ৷ কাৰ্গিলত ভেড়াপালকসকলে সদায়ে জুম বান্ধি বহুকেইখন গাঁৱৰ ভেড়াসমূহ একেলগে চৰাবলৈ নিয়ে ৷ নামগ্যাল আৰু তেওঁৰ বন্ধুসকল অতিকৈ কমবয়সীয়া আছিল, আৰু জুবেৰ উচ্চতালৈ গৈ বনৰীয়া ছাগলী চিকাৰ কৰা খেলত অংশগ্ৰহণ কৰিছিল ৷ ছেৰিঙে নিজৰ লগত এযোৰ শক্তিশালী ফিল্ড বায়নোকুলাৰ লৈ গৈছিল, যাক চিকাৰত ব্যৱহাৰ কৰাৰ বাবে লেহৰ পৰা ক্ৰয় কৰিছিল ৷ 3 মে'ৰ ৰাতিপুৱালৈ নামগ্যালে জুবেৰ লাংপাৰ 5 কিলোমিটাৰলৈ যাবলৈ সক্ষম হৈছিল ৷ ছেৰিঙৰ বায়নোকুলাৰেৰে ওচৰৰ পৰ্বত পৰীক্ষা কৰাত পাঠান পোচাক পৰিহিত মানুহৰ জুম দেখিছিল আৰু তেওঁলোকে বাংকাৰ বনাবৰ বাবে সেই ঠাই মাটি খান্দি আছিল ৷ যদিও তেওঁলোকৰ সংখ্যা আৰু শক্তিৰ বিষয়ে কোনো গম পোৱা হোৱা নাছিল, নামগ্যালে ততালিকে সেই স্থানত থকা 3য় পাঞ্জাৱ ৰেজিমেন্টক এই বিষয়ে উল্লেখ কৰিছিল ৷
নামগ্যালৰ শব্দৰে এই কাহিনী :
" 3 মে'ৰ ৰাতিপুৱা মই মোৰ এগৰাকী বন্ধুৰ সৈতে মোৰ হেৰুওৱা য়াকটো বিচাৰি জুবেৰ নলালৈ গৈছিলো ৷ মই বায়নোকুলাৰৰ সহায়ত পাহাৰত চাই আছিলো, আৰু সেইসময়তে মই পাঠান পোচাক পৰিহিত আৰু সামৰিক পোচাক পৰিহিত পাকিস্তানী সৈনিকক বাংকাৰ বনাই থকা দেখিছিলো ৷ তেওঁলোকৰ কিছুসংখ্যকৰ হাতত অস্ত্ৰও আছিল ৷ অৱশ্যে মোৰ বাবে তেওঁলোকৰ সংখ্যা কিমান আছিল তাক চোৱাটো সম্ভৱপৰ নাছিল ৷ কিন্তু মই নিশ্চিত আছিলো যে, তেওঁলোক নিয়ন্ত্ৰণৰেখাৰ সিপাৰৰ পৰা আহিছিল ৷ "
"মই সাৱধানেৰে তললৈ নামি আহিছিলো আৰু ভাৰতীয় সেনাৰ নিকটৱৰ্তী চকীত খবৰ দিছিলো ৷ মোৰ তথ্যই ভাৰতীয় স্থলসেনাক সাৱধান কৰি দিছিল আৰু তেওঁলোকে ইয়াক পুনৰ পৰীক্ষা কৰিছিল আৰু মোৰ দ্বাৰা প্ৰদান কৰা তথ্য নিৰ্ভুল আছিল পাকিস্তানী সৈনিকৰ প্ৰৱেশ ধৰা পৰিছিল ৷ "
লগতে পঢ়ক : কাৰ্গিল বিজয় দিৱস : পুত্ৰক হেৰুওৱাৰ দুখ আছে যদিও তেওঁৰ বীৰত্বত আজিও আমি সুখী
