নেশ্যনেল ডেস্ক, 10 জানুৱাৰী : অনুচ্ছেদ 370 বাতিলৰ পাচতে জম্মু-কাশ্মীৰত প্ৰতিবন্ধকতা আৰোপ কৰাৰ বিৰুদ্ধে কংগ্ৰেছ নেতা গুলাম নবী আজাদে দৰ্শোৱা আপত্তি আৰু বহুকেইটা আৰোপৰ অতি সোনকালে উচ্চতম ন্যায়ালয়ে ৰায়দান কৰিব ৷
যোৱা বছৰৰ 27 নৱেম্বৰত তিনিজনীয়া বিচাৰকৰ দলে এই গোচৰসমূহৰ ৰায়দান সংৰক্ষিত কৰি ৰাখিছিল ৷ এই বিচাৰকৰ দলটোত আছিল এন. ভি. ৰামানা, আৰ সুভাষ ৰেড্ডী আৰু বি. আৰ. গাভাই ৷
21 নৱেম্বৰত কেন্দ্ৰই জম্মু-কাশ্মীৰত প্ৰতিবন্ধকতা আৰোপ সন্দৰ্ভত নিজৰ যুক্তি প্ৰদৰ্শন কৰি কৈছিল যে, এই প্ৰতিবন্ধকতাৰ ফলতেই কোনো লোকৰ প্ৰাণ হানি হোৱা নাই আৰু এটাও গুলীচালনা কৰাৰ প্ৰয়োজন হোৱা নাই ৷
আজাদৰ উপৰি সৰ্বোচ্চ ন্যায়ালয়খনে অনুৰাধা ভাছিন, কাশ্মীৰ টাইমছৰ কাৰ্যকৰী সম্পাদক আৰু বহুকেইজন ব্যক্তিৰ উপত্যকাটোত প্ৰতিবন্ধকতা সম্পৰ্কত শুনানি গ্ৰহণ কৰে৷
কাশ্মীৰত সন্ত্ৰাসবাদ সম্পৰ্কত কেন্দ্ৰই কৈছিল যে, বহু বছৰ ধৰি সন্ত্ৰাসবাদীয়ে সীমান্তৰ পৰা সন্ত্ৰাসবাদী কাৰ্যকলাপ চলাই অহাৰ লগতে বিচিন্নতাবাদী আৰু স্থানীয় উগ্ৰপন্থী সংগঠনে নিজৰ কূটাঘাত সংঘটিত কৰি আহিছে ৷ ইয়াৰোপৰি, সাধাৰণ নাগৰিকসকলকো সন্ত্ৰাসবাদীয়ে বন্দী কৰি ৰাখিছে ৷ এনে ক্ষেত্ৰত নাগৰিকৰ জীৱন সুৰক্ষিত কৰিবৰ বাবে কোনো পদক্ষেপ গ্ৰহণ নকৰা হ'লে 'মূৰ্খামি' বুলি গণ্য কৰা হ'লহেঁতেন ৷
উল্লেখ্য যে, যোৱা বছৰৰ 5 আগষ্টত অনুচ্ছেদ 370 বাতিলকৰণৰ জৰিয়তে জম্মু-কাশ্মীৰক প্ৰদান কৰা বিশেষ ৰাজ্যৰ অধিকাৰ খৰ্ব কৰা হৈছিল ৷
আৰু পঢ়ক : শুকুৰবাৰে নিয়া আদালতত হাজিৰ অখিল গগৈক
