নেশ্বনেল ডেক্স, 29 ডিচেম্বৰঃ নিজৰ বিতৰ্কিত ভাষ্যৰ বাবে প্ৰায়ে চৰ্চিত বিজেপি নেত্ৰী সাধ্বী প্ৰাচীয়ে পুনৰ আৰু এক বিবাদিত মন্তব্য কৰে ৷ বিজেপি নেত্ৰীগৰাকীয়ে প্ৰিয়ংকা গান্ধীক ড্ৰাগছ আসক্ত বুলি মন্তব্য কৰে ৷ তেখেতে কয় যে, ৰাহুল আৰু প্ৰিয়ংকাই কোকেইনৰ নিচা কৰে যাৰ বাবে তেঁওলোকে সকলো সময়তেই পাতলীয়া মন্তব্য কৰে ৷
উল্লেখ্য যে, নিজৰ দুদিনীয়া লক্ষ্নৌ ভ্ৰমণত প্ৰিয়ংকা গান্ধীয়ে উত্তৰ প্ৰদেশৰ আৰক্ষীৰ ওপৰত এক গুৰুতৰ অভিযোগ উত্থাপিত কৰিছিল ৷ শনিবাৰে কংগ্ৰেছৰ মহাসচিবগৰাকীয়ে প্ৰাক্তন আইপিএচ বিষয়া আৰ দ্বাৰাপুৰীৰ পৰিয়ালক সাক্ষাৎ কৰাৰ বাবে লক্ষ্নৌত উপস্থিত হৈছিল ৷ কিন্তু ৰাস্তাত আৰক্ষীয়ে কিছু সময়ৰ বাবে তেখেতৰ বাহনখন ৰখাই থৈ দিয়ে ৷ ইয়াৰ পিছতে প্ৰিয়ংকা গান্ধীয়ে আৰক্ষীয়ে তেখেতৰ লগত দুৰ্ব্যৱহাৰ কৰা বুলি অভিযোগ উত্থাপিত কৰে ৷ আনহাতে, প্ৰিয়ংকা গান্ধীৰ এই মন্তব্যৰ বিৰোধীতা কৰি সাধ্বী প্ৰাচীয়ে কয় যে, প্ৰিয়ংকা আৰু ৰাহুলে নিচাত থাকি এনেধৰণৰ মন্তব্য কৰে ৷ তেখেতে কয় যে, দুয়ো ভাতৃ-ভগ্নী নিচাসক্ত ৷ যাৰ বাবে প্ৰিয়ংকাই বুজি পোৱা নাই তেখেতে কি অভিযোগ উত্থাপন কৰিছে ৷
ইয়াৰ উপৰিও বিজেপি নেত্ৰীগৰাকীয়ে কংগ্ৰেছ দলক আক্ৰমণৰ লক্ষ্য কৰি কয় যে, কংগ্ৰেছে ‘সংবিধান ৰক্ষা কৰক, দেশ ৰক্ষা কৰক’ অভিযানৰ আয়োজন কৰিছে ৷ কিন্তু বিগত 70 বছৰ ধৰি কংগ্ৰেছ আৰু নেহৰু পৰিয়ালে দেশৰ জনতাক পথভ্ৰস্ত কৰি আহিছে ৷ তেখেতে উত্তৰ প্ৰদেশত নাগৰিকত্ব সংশোধনী বিধেয়কৰ বিৰুদ্ধে হোৱা প্ৰতিবাদক কংগ্ৰেছৰ ষড়যন্ত্ৰ বুলিও মন্তব্য কৰে ৷
লগতে পঢ়ক-চুঙাজানত নাগৰিকত্ব সংশোধনী আইনৰ বিৰুদ্ধে বজ্ৰ হুংকাৰ
