নেশ্যনেল ডেস্ক, ২০ জানুৱাৰী: মহাৰাষ্ট্ৰৰ নাগপুৰৰ পৰিৱৰ্তে এইবাৰ বাংগালুৰুত ৰাষ্ট্ৰীয় স্বয়ং সেৱক সংঘৰ বাৰ্ষিক সন্মিলন অনুষ্ঠিত হ'ব । কৰ্ণাটকৰ দক্ষিণ অভিযান গোটৰ মুৰব্বী প্ৰমুখ ই এছ প্ৰদীপে জনাইছে যে, COVID-১৯ মহামাৰীৰ বাবে বাংগালাৰুত বাৰ্ষিক সন্মিলনখন অনুষ্ঠিত কৰাৰ সিদ্ধান্ত গ্ৰহণ কৰা হৈছে । অহা ১৯ মাৰ্চৰ পৰা দুদিনীয়া কাৰ্যসূচীৰে চন্নেনাহালিস্থিত জনসেৱা বিদ্যা কেন্দ্ৰত বাৰ্ষিক সন্মিলন অনুষ্ঠিত হ'ব ।
সন্মিলনত আৰ এছ এছ প্ৰধান মোহন ভগৱট, ভ্যায়াজী যোশী, দট্টৰেয়া হোছাবালে, ড০ মোহন বৈদ্য, ড০ কৃষ্ণ গোপাল, চি আৰ মুকুন্দৰ লগতে কেইবাগৰাকীও বিশিষ্ট ব্যক্তি উপস্থিত থাকিব । দেশৰ ভিন্ন প্ৰান্তৰ ৫০০ গৰাকীৰো অধিক প্ৰতিনিধিয়ে বাৰ্ষিক সন্মিলনত অংশগ্ৰহণ কৰিব ।
