নেশ্যনেল ডেস্ক, ৩১ মে': সমগ্ৰ বিশ্ব মহামাৰী কৰ'ণা ভাইৰাছৰ সৈতে মোকাবিলা কৰি থকাৰ সময়তে ৰাজস্থানৰ পালিত ৭ মহীয়া গৰ্ভৱতী মহকুমা দণ্ডাধীশ সুমিত্ৰা পাৰীক সকলোৰে বাবে এক আদৰ্শস্বৰূপ হৈ পৰিছে । ৭ মহীয়া গৰ্ভৱতী অৱস্থাতো নিজৰ স্বাস্থ্যক আওকাণ কৰি পালিৰ লোকসকলৰ সহায়ৰ অৰ্থে আগবাঢ়ি আহে মহকুমা দণ্ডাধীশগৰাকীয়ে ।
নিজ ঘৰতেই কাৰ্যালয় খুলি স্থানীয় লোকৰ সমস্যা সমাধানত গুৰুত্ব প্ৰদান কৰাৰ উপৰিও দৈনিক ১৫ ঘণ্টা কাৰ্যালয়ৰ কামত সময় অতিবাহিত কৰি আছে সুমিত্ৰা পাৰীকে । সমস্যা সমাধানৰ উপৰিও তেওঁ কিছুমান ব্যৱস্থা হাতত লৈছে, যিবোৰে কৰ'ণা ভাইৰাছৰ পৰা অঞ্চলবাসীক সুৰক্ষা দিব পাৰে । লগতে এই সন্দৰ্ভত তেওঁ এটা হেল্পলাইন নম্বৰো খুলি দিয়ে ।
আৰক্ষী বন্ধুঃ সুমিত্ৰা পাৰীকে চৰকাৰী সংগঠনৰ যোগেদি ৪ জন লোকৰ এটাকৈ দল গঠন কৰি দিয়ে যাতে দলসমূহে কৰ'ণাত আক্ৰান্তসকলক হাস্পতাললৈ নিয়াত সহায় কৰিব পাৰে । আৰক্ষী বন্ধুৰ এই দলৰ এক সুকীয়া ইউনিফৰ্ম আছে ।
মহিলা কোৱাৰেণ্টাইন কেন্দ্ৰঃ মহিলাসমূহৰ বিশেষ সুৰক্ষাৰ প্ৰতি লক্ষ্য ৰাখি মহকুমা দণ্ডাধীশগৰাকীয়ে কৰ'ণাত আক্ৰান্ত মহিলাসকলৰ বাবে সুকীয়াকৈ কোৱাৰেণ্টাইন কেন্দ্ৰ নিৰ্মাণ কৰাৰ লগতে কোৱাৰেণ্টাইন কেন্দ্ৰসমূহত একোজনকৈ গাৰ্ডো নিযুক্তি দিয়ে ।
অক্ষয় অন্নপূৰ্ণা ফাণ্ডঃ সুমিত্ৰা পাৰীকে ১০৩ খন গেলামাল দোকান আৰু ৫১ খন ঔষধৰ দোকানত অক্ষয় অন্নপূৰ্ণা নিধিৰ ব্যৱস্থা গ্ৰহণ কৰে । ৫ টা দলত ভাগ কৰি দিয়াৰ লগতে মানুহে এই ফাণ্ডৰ দ্বাৰা সাহাৰ্য আগবঢ়াব পাৰে । বৰ্তমানলৈ ১০০০ টা খাদ্যৰ পেকেট বিতৰণ কৰা হৈছে বুলি জানিব পৰা গৈছে ।
গৰ্ভৱতী মহিলাৰ বাবে বিশেষ ব্যৱস্থাঃ অহা ডিচেম্বৰ মাহলৈ প্ৰসৱ কৰিবলগা গৰ্ভৱতী মহিলাসকলৰ বাবে তেওঁ সুকীয়া যতনৰ ব্যৱস্থা কৰিছে । কমেও ৩৬০ গৰাকী মহিলাৰ বাবে পাৰিকে এই ব্যৱস্থা হাতত লৈছে ।
মেৰা গাঁও মেৰা নাকাঃ মানুহৰ হুলস্থুল দূৰ কৰিবৰ বাবে বেৰিকেদৰ ব্যৱস্থা কৰে মহকুমা দণ্ডাধীশগৰাকীয়ে । যদি অন্য গাঁৱৰ মানুহ পালিলৈ যায়, তেতিয়াহ'লে জিলা প্ৰশাসনৰ অনুমতি লোৱাতো বাধ্যতামূলক ।
ইমানতেই ক্ষান্ত নাথাকি মহকুমা দণ্ডাধীশ সুমিত্ৰা পাৰীকে কৰ'ণাৰ সৈতে যুঁজিবলৈ বিভিন্ন নমুনা, মনিটৰীং প্ৰক্ৰিয়া গ্ৰহণ কৰিছে, যাৰ বাবে ৰাজ্য চৰকাৰৰ লগতে সকলোৰে প্ৰশংসাৰ পাত্ৰ হৈ পৰিছে মহকুমা দণ্ডাধীশ সুমিত্ৰা পাৰীক ।
