নিউজ ডেস্ক, 26 এপ্ৰিল: 64 সংখ্যক "মন কি বাত" অনুষ্ঠানৰ জৰিয়তে দেওবাৰে দেশবাসীক সম্বোধন প্ৰধানমন্ত্ৰী নৰেন্দ্ৰ মোডীৰ ৷ এই অনুষ্ঠান জৰিয়তে কোভিড-19 আৰু দেশৰ সাম্প্ৰতিক পৰিস্থিতি সন্দৰ্ভত মত প্ৰকাশ কৰে প্ৰধানমন্ত্ৰীগৰাকীয়ে ৷ কৰ'ণা ভাইৰাছৰ ফলত সলনি হৈছে মানুহৰ জীনৱ শৈলী,মানুহৰ চেতনা আৰু সংবেদনশীলতা৷ লগতে, সাম্প্ৰতিক সময়ত সভ্য সমাজৰ প্ৰতীক হিচাপে পৰিগণিত হৈছে মাক্স ৷ মন কি বাত অনুষ্ঠানত এই মন্তব্য কৰে প্ৰধানমন্ত্ৰী মোডীয়ে ৷ ৰাজহুৱা স্থানত থু পেলোৱা বন্ধ কৰিবলৈ দেশবাসীক আহ্বান প্ৰধানমন্ত্ৰী মোডীৰ ৷ এই কাৰ্য বন্ধ হ'লে প্ৰাথমিক স্বচ্ছতা বৃদ্ধি পোৱাৰ লগতে কোভিড 19 ৰ বিৰুদ্ধে চলি থকা যুঁজখন অধিক শক্তিশালী হ'ব বুলিও উল্লেখ কৰে প্ৰধানমন্ত্ৰী গৰাকীয়ে ৷
লক ডাউনৰ ফলত সৰ্বাধিক প্ৰভাৱান্বিত হোৱা দেশৰ দৰিদ্ৰ শ্ৰেণীৰ লোকসকলৰ বেংক একাউন্টত 'প্ৰধানমন্ত্ৰী গৰীৱ কল্যাণ যোজনা'ৰ অধীনত পোনপেটীয়াকৈ আৰ্থিক সাহাৰ্য পঠিওৱা হৈছে ৷ বৃদ্ধ পেঞ্চন প্ৰদানৰ প্ৰক্ৰিয়াও আৰম্ভ হৈছে ৷ তদুপৰি দৰিদ্ৰ লোকসকলক তিনিমাহৰ বাবে ৰন্ধন গেছৰ চিলিণ্ডাৰো বিনামূলীয়াকৈ যোগান ধৰা হ‘ব বুলিও মন্তব্য কৰে প্ৰধানমন্ত্ৰী গৰাকীয়ে ৷
কোভিড 19ৰ বিৰুদ্ধে অব্যাহত থকা যুঁজত ৰাজ্য চৰকাৰ আৰু স্থানীয় প্ৰশাসনসমূহে আগবঢ়োৱা অৱদানৰ বাবে সকলোকে ধন্যবাদ জনায় প্ৰধানমন্ত্ৰীয়ে ৷ লগতে,এইক্ষেত্ৰত ৰাজ্য চৰকাৰে অত্যন্ত সক্ৰিয় ভূমিকা পালন কৰিছে বুলিও উল্লেখ কৰে মোডীয়ে ৷
কৰ'ণা ভাইৰাছ ৰোধৰ বাবে ভাৰতবাসীয়ে যি দৰে একত্ৰিতভাৱে চৰকাৰক সহায় কৰিছে তাৰ বাবে দেশবাসীক এই মন কি বাত অনুষ্ঠানৰ জৰিয়তে ধন্যবাদ জ্ঞাপন কৰে প্ৰধানমন্ত্ৰী নৰেন্দ্ৰ মোডীয়ে ৷
তদুপৰি বিশ্বৰ সংকটৰ সময়ত এজনে আনজনক সহায়ৰ বাবে আগবাঢ়ি আহিছে ৷ লগতে,এই যুঁজখন জনগণৰ দ্বাৰা চালিত হৈছে বুলি 'মন কি বাত' অনুষ্ঠানত উল্লেখ কৰে প্ৰধানমন্ত্ৰীয়ে ৷
লগতে পঢ়ক : কৰ'ণা ভাইৰাছঃ আজিৰ দিনটোত বিশ্বৰ সমীক্ষা
