কলম্বো, 17 নৱেম্বৰঃ সমাপ্ত হ'ল শ্ৰীলংকাৰ ৰাষ্ট্ৰপতি নিৰ্বাচনৰ ভোটগ্ৰহণ প্ৰক্ৰিয়া ৷ দেশখনৰ 12,845 টা ভোটকেন্দ্ৰৰ 15.9 মিলিয়ন ভোটাৰে সাব্যস্ত কৰিলে 35 গৰাকী প্ৰাৰ্থীৰ ভাগ্য ৷ পুৱা 7 বজাৰ পৰা আৰম্ভ হোৱা ভোটগ্ৰহণ প্ৰক্ৰিয়া বিয়লি 5 বজাত সমাপ্ত হয় ৷ দেশখনৰ এইবাৰৰ ৰাষ্ট্ৰপতি নিৰ্বাচনত সৰ্বাধিক 35 গৰাকীকৈ প্ৰাৰ্থীয়ে প্ৰতিদ্বন্দিতা আগবঢ়াইছিল ৷
দেশখনৰ ৰাজনৈতিক মহলত চলা চৰ্চা অনুসৰি, মূল যুঁজখন এচ এল পি পিৰ নেতা গোটাবায়া ৰাজাপাকসা আৰু শাসনাধিষ্ঠ ইউনাইটেড নেশ্বনেল দলৰ নেতা সাজিথ প্ৰেমাদাসাৰ মাজত হ'ব বুলি অনুমান কৰা হৈছে ৷ এওঁলোকৰ উপৰিও অনুৰা কুমাৰ দিছানায়কে হৈছে অন্যতম এজন শক্তিশালী প্ৰতিদ্বন্দী ৷
ইপিনে, নিৰ্বাচনৰ মাজতে পূৱ শ্ৰীলংকাৰ মান্নাৰত ভোটদাতা কঢ়িওৱা এখন বাছৰ ওপৰত আক্ৰমণ চলালে দুৰ্বৃত্তৰ এটা দলে ৷ অচিনাক্ত দুৰ্বৃত্তৰ দলটোৱে প্ৰথমে দুখন বাছলৈ শিলগুটি দলিয়াই আৰু তাৰ পাচতেই বাছ দুখনৰ ওপৰত অতৰ্কিতে গুলিবৰ্ষণ কৰে ৷ এই ঘটনাত কোনো লোক হতাহত হোৱা নাই বুলি জানিবলৈ দিয়ে আৰক্ষীয়ে ৷ ইয়াৰ উপৰিও দুৰ্বৃত্তই পথত টায়াৰ জ্বলাই 100 খন গাড়ীৰ কনভয়ৰ ওপৰত আক্ৰমণ সংঘটিত কৰে ৷ আৰক্ষীয়ে জানিবলৈ দিয়া অনুসৰি এম্বুশ্বৰ লক্ষ আছিল দুৰ্বৃত্তৰ ৷
লগতে পঢ়কঃ নিৰ্বাচনৰ প্ৰাকক্ষণত ভুৱা বাতৰি আৰু ভুল তথ্যক লৈ শংকিত শ্ৰীলংকা
ইপিনে,নিৰ্বাচনত যাতে কোনো ধৰণৰ কূটাঘাতমূলক কাৰ্যকলাপ সংঘটিত নহয় তাৰ বাবে প্ৰায় 60 হাজাৰ নিৰাপত্তা ৰক্ষীক নিয়োগ কৰা হৈছিল ৷ দেশখনত সংঘটিত বোমা বিস্ফোৰণৰ প্ৰায় 7 মাহৰ অন্তত অনুষ্ঠিত কৰা হৈছে নিৰ্বাচন ৷ বিগত 21 নৱেম্বৰত ইছলামিক সন্ত্ৰাসবাদী সংগঠনৰ দ্বাৰা সংঘটিত বোমা বিস্ফোৰণত প্ৰায় 269 গৰাকীকৈ লোকৰ প্ৰাণ গৈছিল ৷
জনসাধাৰণক নিৰ্বাচনৰ সময়ছোৱাত শান্তি আৰু শৃংখলা বজাই ৰখাৰ আহ্বান জনাইছিল প্ৰধানমন্ত্ৰী ৰণিল বিক্ৰেমসিঙহে ৷ আৰক্ষীয়ে জনোৱা মতে, দেশখনত নিৰ্বাচনী আচৰণ বিধি বলবৎ হোৱাৰ পাচৰে পৰা এই পৰ্যন্ত প্ৰায় 84 গৰাকীকৈ লোকক গ্ৰেপ্তাৰ কৰা হৈছে৷
লগতে পঢ়কঃ অযোধ্যা ৰায়দানৰ বিৰুদ্ধে পুনৰীক্ষণৰ আৱেদনৰ বাবে সাজু 'অল ইণ্ডিয়া মুছলিম পাৰ্চনেল ল' ব’ৰ্ড' !
নিৰ্বাচনৰ সময়ছোৱাত দেশী-বিদেশী পৰ্যবেক্ষকৰ দলে পৰ্যবেক্ষণ কৰিছিল পৰিস্থিতিৰ ৷ নিৰ্বাচনী বিধি উলংঘা কমিটিৰ দ্বাৰা প্ৰকাশিত তথ্য অনুসৰি প্ৰায় বিভিন্ন ভোটগ্ৰহণ কেন্দ্ৰসমূহ 3000 লোকে পৰ্যবেক্ষণ কৰি আছে ভোটগ্ৰহণ প্ৰক্ৰিয়া ৷
