নিউজ ডেস্ক, 10 আগষ্ট : কেৰালাৰ চেৰুকুন্নিল মনেশে সৰ্বাধিক পৰ্বতাৰোহণ কৰি অধিক পাহাৰৰ শিখৰ বগাই বিশ্বৰেকৰ্ড গঢ়াৰ সপোন দেখিছে ৷
40 বৰ্ষীয় পৰ্বতাৰোহীগৰাকীয়ে বিগত 16 বছৰত 13 টা পাহাৰৰ শিখৰলৈ বগাইছে আৰু আগন্তুক সময়ত আৰু অধিক পাহাৰৰ শিখৰ বগোৱাৰ সপোন পুহি ৰাখিছে ৷
পৰ্বতাৰোহী চেৰুকুন্নিল মনেশে মাউন্ট এভাৰেষ্ট বগোৱাৰ বাবে প্ৰস্তুতি অব্যাহত ৰাখিছিল যদিও কৰ'ণা মহামাৰীৰ ভয়াৱহতাৰ ফলত তেখেতৰ পৰিকল্পনা সমূহ ব্যৰ্থ হয় ৷
মনেশ, এজন ইতিহাস বিভাগৰ স্নাতক আছিল ৷ যেতিয়া সৰুৰে পৰা পাঠ্যপুথিত মাউন্ট এভাৰেষ্ট আৰু আল্পচৰ বিষয়ে পঢ়িছিল, তেতিয়াৰে পৰা পাহাৰৰ প্ৰতি আকৰ্ষণ বাঢ়ি গৈছিল পৰ্বতাৰোহীগৰাকীৰ ৷
পৰ্বতৰ শিখৰ সমূহক জুখিবলৈ দেখা নিজৰ সপোনক বাস্তৱত ৰূপায়িত কৰিবলৈ 2004 চনত মনেশে দিল্লীলৈ বুলি টিকট বুকিং কৰে ৷ সেই সময়ত তেওঁ দিন হাজিৰা কৰি টকা উপাৰ্জন কৰিছিল ৷ সেই টকাৰেই টিকট বুকিং কৰি ওলাই পৰিছিল পাহাৰৰ শিখৰ বগোৱাৰ নিজৰ সপোন পূৰণ কৰিবলৈ ৷
মানালিত অটল বিহাৰী পৰ্বতাৰোহণ সংস্থাৰ পৰা পৰ্বতাৰোহণৰ প্ৰাথমিক শিক্ষা লাভৰ পাছত তেখেতে 20 দিনৰ ভিতৰত মানালিত 17,346 ফুট উচ্চতাৰ পৰ্বতাৰোহণ কৰে ৷ য‘ত মনেশ 35 জনীয়া পৰ্বতাৰোহীৰ ভিতৰত একমাত্ৰ দক্ষিণ ভাৰতীয় আছিল ৷
বহু ক্ষেত্ৰত বাধা বিঘিনিৰ পাছত নিৰোৎসাহিত নহৈ মনেশে সৰ্বাধিক উচ্চতাত উপস্থিত হোৱাৰ বাবে নিজৰ মনোবল দৃঢ় কৰি লৈছে ৷ তেখেতৰ বিশ্বাস যে, এদিন হলেও তেওঁ নিজৰ সপোন পূৰণ কৰিবলৈ সক্ষম হ‘ব ৷
লগতে পঢ়ক : সুশান্ত কাণ্ডঃ EDৰ কাৰ্যালয়ত উপস্থিত ৰিয়া চক্ৰৱৰ্তী সহ 4 গৰাকী
