‘ছাইলেণ্ট কিলাৰ’তকৈ কম নহয় আয়’ডিনৰ অভাৱ, চিকিৎসকে দিলে এই সতৰ্কবাণী

আয়’ডিনে আমাৰ শৰীৰত কেনেধৰণৰ ভূমিকা পালন কৰে তাৰ বিষয়ে নতুনকৈ কোৱাৰ কোনো প্ৰয়োজন নাই কিন্তু ইয়াৰ অভাৱ হ’লে আমাৰ শৰীৰত কেনে সমস্যা হ’ব পাৰে জানেনে-

আধুনিক জীৱনশৈলী আৰু ভাৰসাম্যহীন খাদ্যাভ্যাসৰ বাবে আয়’ডিনৰ অভাৱ আকৌ এবাৰ গুৰুতৰ স্বাস্থ্যজনিত সমস্যাত পৰিণত হৈছে ৷ চিকিৎসক আৰু বিশেষজ্ঞৰ মতে আয়’ডিনৰ অভাৱক ‘ছাইলেণ্ট কিলাৰ’ বুলি ক’ব পাৰি কাৰণ ইয়াৰ লক্ষণ ক্ৰমান্বয়ে দেখা দিয়ে আৰু কেতিয়াবা ইয়াৰ লক্ষণো দেখা নাযায় ৷ আয়’ডিনৰ অভাৱত থাইৰয়ড গ্ৰন্থিৰ ওপৰত প্ৰত্যক্ষ প্ৰভাৱ পৰে, যাৰ ফলত শৰীৰৰ বহু গুৰুত্বপূৰ্ণ কামত প্ৰভাৱ পৰে ৷

আয়’ডিন শৰীৰৰ বাবে অতি গুৰুত্বপূৰ্ণ খনিজ পদাৰ্থ, যিয়ে বিশেষকৈ থাইৰয়ড হৰম’ন উৎপাদনত সহায় কৰে ৷ যদি শৰীৰত ইয়াৰ অভাৱ হয়, তেন্তে থাইৰয়ড বিকাৰ, হাইপ’থাইৰয়ডিজম, গ’ইটাৰ, ওজন বৃদ্ধি, ক্লান্তি আৰু মানসিক বিকাশত বাধাৰ দৰে গুৰুতৰ সমস্যাৰ সৃষ্টি হ’ব পাৰে ৷ বিশেষকৈ গৰ্ভৱতী মহিলা আৰু শিশুৰ আয়’ডিনৰ অভাৱে বৃদ্ধিত বাধাৰ সৃষ্টি কৰিব পাৰে আৰু মানসিক বিকাশত নেতিবাচক প্ৰভাৱ পেলাব পাৰে ৷

আয়’ডিনৰ অভাৱ কিয় বৃদ্ধি পাইছে ?

বিশেষজ্ঞসকলে কয় যে, আয়’ডিনৰ অভাৱ বৃদ্ধিৰ মূল কাৰণ হৈছে মানুহৰ অসন্তুলিত খাদ্য আৰু আয়’ডিন সমৃদ্ধ নিমখৰ ব্যৱহাৰ কম ৷ আয়’ডিনৰ অভাৱ দূৰ কৰিবলৈ আয়’ডিন সমৃদ্ধ নিমখ বাধ্যতামূলক কৰা হৈছিল যদিও শেহতীয়া বছৰবোৰত মানুহে সাধাৰণ আৰু হিমালয়ৰ নিমখ বেছিকৈ ব্যৱহাৰ কৰিছে, যাৰ বাবে শৰীৰে প্ৰয়োজনীয় আয়’ডিন লাভ কৰিবলৈ সক্ষম হোৱা নাই ৷

আয়’ডিনৰ অভাৱৰ লক্ষণ

চিকিৎসকৰ মতে আয়’ডিনৰ অভাৱৰ প্ৰাৰম্ভিক লক্ষণসমূহ হ’ল ক্লান্তি, শুকান ছাল, চুলি সৰা, ঠাণ্ডা সহ্য কৰিব নোৱাৰা আৰু অলস অনুভৱ ৷ যদি এই সমস্যাৰ সময়মতে চিকিৎসা কৰা নহয় তেন্তে ই গুৰুতৰ হৈ পৰিব পাৰে ৷

চিকিৎসকৰ পৰামৰ্শ

বিশেষজ্ঞসকলে পৰামৰ্শ দিয়ে যে আয়’ডিনৰ অভাৱ ৰোধ কৰিবলৈ মানুহে সুষম খাদ্য গ্ৰহণ কৰিব লাগে, য’ত আয়’ডিন সমৃদ্ধ নিমখ, সাগৰীয় মাছ, দুগ্ধজাত সামগ্ৰী আৰু কণী আদি অন্তৰ্ভুক্ত কৰা হয় ৷ ইয়াৰ উপৰিও বিশেষকৈ গৰ্ভৱতী মহিলাসকলে আয়’ডিন পৰিপূৰক গ্ৰহণ কৰিব লাগে ৷

(সতৰ্কীকৰণ: এই প্ৰতিবেদনত আপোনাক দিয়া সকলো স্বাস্থ্য তথা জীৱনশৈলী সম্পৰ্কীয় যিকোনো তথ্য আৰু পৰামৰ্শ কেৱল আপোনাৰ সাধাৰণ তথ্যৰ বাবেহে আগবঢ়োৱা হৈছে । আমি এই তথ্য বৈজ্ঞানিক গৱেষণা, অধ্যয়ন, চিকিৎসা আৰু স্বাস্থ্য পেছাদাৰী পৰামৰ্শৰ ভিত্তিত প্ৰদান কৰিছো । আপুনি এই উপায় বা পদ্ধতি অনুসৰণ কৰাৰ আগতে এই বিষয়ে বিতংভাৱে জনাটো উচিত তথা আপোনাৰ ব্যক্তিগত চিকিৎসকৰ পৰামৰ্শ গ্ৰহণ কৰাটো উচিত ।)

উৎস:-https://saltcomindia.gov.in/SIP_IodineDeficiencyDisorders.aspx

লগতে পঢ়ক