নিউজ ডেস্ক, 26 আগষ্টঃ দেশৰ প্ৰাক্তন বিত্তমন্ত্ৰী তথা জ্যেষ্ঠ কংগ্ৰেছী নেতা পি. চিদাম্বৰমৰ জামিন আবেদন নাকচ কৰিছে উচ্চতম ন্যায়ালয়ে ৷ আই এন এক্স মিডিয়া গোচৰত নাম সাঙোৰ খাই পৰা প্ৰাক্তন বিত্তমন্ত্ৰীগৰাকীয়ে সৰ্বোচ্চ আদালতত দাখিল কৰা অগ্ৰিম জামিন আবেদনখন সোমবাৰে নাকচ কৰে দুজনীয়া খণ্ড বিচাৰপীঠে ৷ চিবিআইয়ে দাখিল কৰা কেলেংকাৰী গোচৰত গ্ৰেপ্তাৰ হোৱা পি. চিদাম্বৰমৰ জামিন আবেদনখন খাৰিজ কৰে ৷ ইতিমধ্যেই চিবিআইয়ে গ্ৰেপ্তাৰ কৰাৰ নেতাগৰাকীৰ জামিন আবেদনৰ কোনো বৈধতা নাই বুলিয়ে ন্যায়াধীশ আৰ ভানুমতী আৰু ন্যায়াধীশ এএছ বোপান্নাই খাৰিজ কৰে উক্ত আবেদন ৷
আনহাতে চিবিআই আদালতে প্ৰদান কৰা ৰায়দানৰ বিৰুদ্ধে উচ্চতম ন্যায়ালয়ত দাখিল কৰা আবেদনৰ শুনানি গ্ৰহণ নকৰিলে সৰ্বোচ্চ ন্যায়ালয়ে ৷ আইএনএক্স মিডিয়া কেলেংকাৰীৰ ৰায়দানত চিদাম্বৰমক পাঁচদিনৰ চিবিআইৰ জিম্মাত ৰখাৰ নিৰ্দেশ দিছিল চিবিআইৰ বিশেষ আদালতে ৷
ইফালে ইডিৰ গোচৰৰ বিৰুদ্ধে নেতাগৰাকীয়ে দাখিল কৰা অগ্ৰিম জামিন আবেদনৰ শুনানি স্থগিত ৰাখে উচ্চতম ন্যায়ালয়ে ৷ সৰ্বমুঠ তিনিখনকৈ আবেদনৰ শুনানিৰ বাবে সৰ্বোচ্চ আদালতত আলোচনা হৈছিল যদিও ইয়াৰে প্ৰথমখন আবেদন নেতাগৰাকীয়ে গ্ৰেপ্তাৰ হোৱাৰ বাবে নাকচ কৰাৰ লগতে দ্বিতীয়খন আবেদন আদালতত উত্থাপনে কৰা নহ'ল আৰু তৃতীয়খন আবেদনৰ শুনানি স্থগিত ৰাখে দেশৰ সৰ্বোচ্চ ন্যায়ালয়ে ৷
উল্লেখ্য যে, দুৰ্নীতি নিবাৰক আইন আৰু ভাৰতীয় দণ্ডবিধিৰ অধীনত প্ৰাক্তন বিত্তমন্ত্ৰীগৰাকীৰ বিৰুদ্ধে চিবিআইয়ে গোচৰ ৰুজু কৰিছিল ৷ আনহাতে অবৈধ লেনদেন নিবাৰক আইনৰ অধীনত চিদাম্বৰমৰ বিৰুদ্ধে গোচৰ তৰিছিল ইডিয়ে ৷ চিদাম্বৰমৰ হৈ অধিবক্তা কপিল চিবাল আৰু অভিষেক মানু সাংভীয়ে যুক্তি আগবঢ়ায় ৷ দুয়োগৰাকী অধিবক্তাই কয় যে,আদালতত জামিন আবেদন দাখিল কৰাৰ পিচটো তাৰ শুনানি গ্ৰহণ কৰা হোৱা নাছিল আৰু নেতাগৰাকীক অবৈধৰূপে গ্ৰেপ্তাৰ কৰা হৈছিল ৷
উল্লেখ্য যে,আইএনএক্স মিডিয়াক 305 কোটিৰ বৈদেশিক পূঁজি প্ৰদান কৰাৰ বাবে FIPBয়ে বেআইনীভাৱে অনুমতি প্ৰদান কৰিছিল ৷ 2007 চনত এই ঘটনা সংঘটিত হোৱাৰ সময়ত দেশৰ বিত্তমন্ত্ৰী আছিল পি চিদাম্বৰম ৷ ইয়াৰ বিৰুদ্ধে 2017 চনৰ 15 মে'ত গোচৰ ৰুজু কৰিছিল চিবিআইয়ে ৷ আনহাতে অবৈধ ধনৰ লেনদেনত সহায় কৰাৰ বাবে 2018 চনত পি চিদাম্বৰমৰ বিৰুদ্ধে গোচৰ ৰুজু কৰিছিল ইডিয়ে ৷ উক্ত গোচৰতে চলিত মাহৰ 21 তাৰিখত নতুন দিল্লীৰ পৰা চিবিআইয়ে গ্ৰেপ্তাৰ কৰিছিল দেশৰ প্ৰাক্তন বিত্তমন্ত্ৰী পি চিদাম্বৰমক ৷
