ৱেলিঙটন, 26 নৱেম্বৰ: নিউজিলেণ্ড সংসদলৈ সদস্য হিচাপে নিৰ্বাচিত হৈ ইতিহাস ৰচনা ভাৰতীয় মূলৰ ডঃ গৌৰৱ শৰ্মাৰ ৷ প্ৰথমগৰাকী ভাৰতীয় মূলৰ সাংসদ হিচাপে নিৰ্বাচিত হোৱাৰ গৌৰৱ অৰ্জন কৰি বিদেশৰ মাটিত সংস্কৃতত শপত গ্ৰহণ কৰিলে জন্মসূত্ৰে হিমাচল প্ৰদেশৰ ডঃ গৌৰৱ শৰ্মাই ৷ নিউজিলেণ্ডৰ শ্ৰমিক পাৰ্টীৰ পৰা সংসদলৈ নিৰ্বাচিত হোৱা ডঃ শৰ্মাই বুধবাৰে সংস্কৃতত শপত লৈ নিজৰ দায়িত্বভাৰ গ্ৰহণ কৰে ৷
নিউজিলেণ্ডৰ উচ্চ আয়ুক্ত মুক্তেশ পাৰদেশীয়ে এক টুইটযোগে এই কথা জনাই যে ভাৰতৰ লগতে নিউজিলেণ্ডৰ সাংস্কৃতিক পৰম্পৰাৰ প্ৰতি সন্মান জনাই নিউজিলেণ্ডৰ সংসদলৈ নৱনিৰ্বাচিত গৌৰৱ শৰ্মাই সংস্কৃতত শপত গ্ৰহণ কৰে ৷
হিন্দীৰ পৰিৱৰ্তে তেওঁ কিয় সংস্কৃতত শপত গ্ৰহণ কৰিলে বুলি ডঃ শৰ্মাক সোধা প্ৰশ্নৰ উত্তৰত তেওঁ কয় যে মই এই বিষয়ে বিশেষ একো ভৱা নাছিলো ৷ প্ৰথমে মই মোৰ নিজৰ প্ৰথম ভাষা পাহাৰী বা পঞ্জাৱী ভাষাত শপত লোৱাৰ কথা ভাৱিছিলো ৷ সকলোকে একে সময়তে সুখী কৰাটো কঠিন ৷ সংস্কৃত ভাষাই সকলো ভাৰতীয় ভাষাক প্ৰতিনিধিত্ব কৰে, সেয়ে মই সংস্কৃততে শপত লোৱাৰ কথা ভাৱিলো ৷
পেচাত এগৰাকী ডাক্টৰ শৰ্মাই হেমিল্টন ৱেষ্টত তেওঁৰ প্ৰতিদ্বন্দীক 4,386 টা ভোটত পৰাজিত কৰি সংসদত নিজৰ আসন সুনিশ্চিত কৰে ৷ ইয়াৰ পূৰ্বে তেওঁ 2017 টো প্ৰতিদ্বন্দিতা আগবঢ়াইছিল যদিও বিফল হয় ৷ সংস্কৃত ভাষাত শপতগ্ৰহণ কৰা তেওঁ দ্বিতীয়গৰাকী ভাৰতীয় মূলৰ নেতা ৷
