কেব প্ৰসংগত গুৰুত্বপূৰ্ণ মন্তব্য প্ৰাক্তন মুখ্যমন্ত্ৰী তৰুণ গগৈৰ

কেব সন্দৰ্ভত প্ৰতিক্ৰিয়া প্ৰকাশ প্ৰাক্তন মুখ্যমন্ত্ৰী তৰুণ গগৈয়ে,প্ৰাক্তন মুখ্যমন্ত্ৰী গৰাকীয়ে প্ৰধানমন্ত্ৰী মোডীক কটাক্ষ কৰি কয় যে, ডিঙিত গামোচা ললেই অসমীয়া নহয় যদিহে তেওঁৰ বাবে অসমীয়াৰ আবেগ-অনুভূতিৰ কোনো মূল্য নাই

নতুন দিল্লী,12 ডিচেম্বৰঃ কেব সন্দৰ্ভত সমগ্ৰ অসম জ্বলি থকাৰ সময়তে প্ৰতিক্ৰিয়া প্ৰকাশ কৰে প্ৰাক্তন মুখ্যমন্ত্ৰী তৰুণ গগৈয়ে ৷ গগৈয়ে কেবৰ সন্দৰ্ভত কয় যে, এই বিধেয়কখনে উত্তৰ পূৰ্বাঞ্চলকে ধৰি অসমৰ জনজীৱন, ভাষা-সংস্কৃতিৰ প্ৰতি ভাবুকি কঢ়িয়াই আনিছে ৷ নাগৰিকত্ব সংশোধনী বিধেয়কখনৰ প্ৰভাৱৰ ফলত সাধাৰণ জীৱনযাত্ৰাৰ লগতে সকলো কাম-কাজ স্থৱিৰ হৈ পৰিছে ৷ ৰাজ্যৰ ৰেলসেৱা,বিমানসেৱাকে ধৰি সকলো যোগাযোগ ব্যৱস্থা বাতিল কৰা হৈছে ৷ তদুপৰি প্ৰাক্তন মুখ্যমন্ত্ৰী গৰাকীয়ে প্ৰধানমন্ত্ৰী মোডীক কটাক্ষ কৰি কয় যে, ডিঙিত গামোচা ললেই অসমীয়া নহয় যদিহে তেওঁৰ বাবে অসমীয়াৰ আবেগ-অনুভূতিৰ কোনো মূল্য নাই ৷ প্ৰকৃতাৰ্থত মোডীয়ে গামোচাৰ অৰ্থই নাজানে বুলি গগৈয়ে আক্ষেপেৰে কয় ৷ আনহাতে, অসমীয়া লোকৰ আবেগৰ সৈতে জড়িত এই কেবৰ বিৰুদ্ধে সংগ্ৰাম অব্যাহত থাকিব বুলি নতুন দিল্লীত সংবাদ মাধ্যমৰ আগত তৰুণ গগৈয়ে উল্লেখ কৰে ৷