গুৱাহাটী, 30 মাৰ্চ: নিৰ্বাচনী অধিসূচনা জাৰী হোৱাৰ পাচত তুৰা লোকসভা সমষ্টিৰ অন্তৰ্গত প্ৰত্যেকটো বিধানসভা সমষ্টিত তিনিটাকৈ ফ্লাইং স্কোৱাড মোতায়েন কৰা হৈছে। ইয়াৰ লগতে নিৰ্বাচনী আয়োগে পোনপ্ৰথমবাৰৰ বাবে চিভিজিল নামৰ এটা মোবাইল এপ প্ৰস্তুত কৰি উলিয়াইছে৷ এই এপটোৰ জৰিয়তে জনতাই নিৰ্বাচনী অধিসূচনা ভংগ কৰাৰ যিকোনো অভিযোগ দাখিল কৰিব পাৰে৷ জনতাৰ অভিযোগৰ ভিত্তিত ফ্লাইং স্কোৱাডে লগে লগে অভিযোগৰ তদন্ত কৰিব পাৰিব।
পশ্চিম গাৰো পাহাৰ জিলাৰ মুখ্য নিৰ্বাচনী বিষয়া ৰাম সিঙে সদৰি কৰা অনুসৰি বৰ্তমানলৈকে তুৰা লোকসভা সমষ্টিত প্ৰায় 560গৰাকী বিশেষভাৱে সক্ষম ভোটাৰক চিনাক্ত কৰা হৈছে৷ তেওঁলোকে ভোটদানৰ সময়ত যাতে কোনো ধৰণৰ কষ্টৰ সন্মুখীন হ'বলগীয়া নহয়, তাৰ বাবে প্ৰশাসনৰ তৰফৰ পৰা ব্যৱস্থা কৰা হৈছে। আনহাতে যুৱ প্ৰজন্মই যাতে ভোটদান সাব্যস্ত কৰে তাৰবাবে বিভিন্ন সজাগতা সভা অনুষ্ঠিত কৰিছে ৷
