নেশ্যনেল ডেস্ক, 21 এপ্ৰিল : 22 এপ্ৰিলত সমগ্ৰ বিশ্বই বিশ্বজোৰা ধৰিত্ৰী দিৱসৰ সোণালী জয়ন্তী উদযাপন কৰিবলৈ সাজু হোৱাৰ সময়তে কিংবদন্তি সংগীতজ্ঞ ডঃ এল. সুব্ৰমনিয়াম,অভয় কে.আৰু কবিতা কৃষ্ণমূৰ্তিয়ে নিৰ্মান কৰি উলিয়াইছে এক নতুন গীত ৷
ভাৰতীয় আদৰ্শ 'বসুদভ্যা কুটুম্বকাম'ৰ (সমগ্ৰ বিশ্ব এক পৰিয়াল) পৰা এই গীতটি অনুপ্ৰেৰিত ৷ বিখ্যাত ভাৰতীয় সংগীতজ্ঞ কেইগৰাকীয়ে বৰ্তমানৰ বিশ্বজোৰা স্বাস্থ্যজনিত সংকটৰ সময়ত এই গীতটি অধিক প্ৰাসংগিক বুলি মন্তব্য কৰিছে ৷
এই সম্পৰ্কত সুব্ৰমনিয়ামে কয়,"এক গতানুগতিক গীতে বিশ্বৰ বিভিন্ন দেশৰ লোকক অনুপ্ৰেৰিত কৰাৰ লগতে গীতৰ বান্ধোনেৰে বান্ধিব পাৰিব আৰু পিচৰ প্ৰজন্মকো পৃথিৱীখন সুৰক্ষিত কৰি ৰাখিবলৈ প্ৰেৰণা যোগাব ৷"
গীত আৰু ভিডিঅ'ৰ প্ৰযোজনা কৰিছে ডঃ এল. সুব্ৰমনিয়ামে ৷ আনহাতে,কবি-কূটনীতিবিদ অভয় কে. এ গীত ৰচনা কৰাৰ লগতে কন্ঠদান কৰিছে কবিতা কৃষ্ণমূৰ্তি, সুব্ৰমনিয়াম আৰু বিন্দু সুব্ৰমনিয়ামে ৷
বসুদভ্যা কুটুম্বকামৰ পৰাই অনুপ্ৰাণিত হৈ অভয়ে 2008 চনতো ৰাছিয়াৰ ছেইন্ট পিটাৰ্ছবাৰ্গৰ পৰা এনে এক গীত ৰচনা কৰি উলিয়াইছিল ৷
এই গীত সম্পৰ্কত অভয়ে কয়, "COVID-19 মহামাৰীয়ে এই কথা প্ৰতিপন্ন কৰিছে যে, সমগ্ৰ বিশ্ব এটা পৰিয়ালৰ দৰে ৷ কৰ'ণা ভাইৰাছৰ সংক্ৰমণে এই কথা প্ৰমাণিত কৰিলে যে, আমি ইজনে সিজনৰ ওপৰত নিৰ্ভৰশীল ৷ যিখন দেশৰে নহ'লেও আমি পৃথকে থাকিব নোৱাৰো ৷ তেনেদৰেই পৰিৱেশ প্ৰদূষণ, জৈৱবৈচিত্ৰ ধংস আৰু বতৰ পৰিৱৰ্তনে আমাক প্ৰভাৱান্বিত কৰে ৷ আমি পূৱ,পশ্চিম,উত্তৰ,দক্ষিণ যিকোনো দিশতে থাকিলেও আমি এক পৰিয়াল ৷"
উল্লেখ্য যে, এই গীতটি 2017 চনতে প্ৰখ্য়াত ভায়লিনবাদক ড0 এল. সুব্ৰমনিয়ামে প্ৰযোজনা কৰিছিল ৷ তেতিয়াই গীতটি বিশ্বৰ প্ৰায় 50 টা বিভিন্ন ভাষালৈ অনুবাদ কৰা হৈছিল ৷ ইয়াৰোপৰি, সুব্ৰমনিয়ামক শেহতীয়াকৈ এই বৰ্ষৰ ধৰিত্ৰী দিৱসৰ সোণালী জয়ন্তীৰ 'এম্বেচাদৰ' হিচাপেও নিযুক্তি দিয়া হৈছিল ৷
22 এপ্ৰিলত উন্মোচন কৰিবলগা গীতটি কবি অভয়ৰ ইউ টিউব চেনেলৰ জৰিয়তে দৰ্শকে উপভোগ কৰিব পাৰিব ৷
