নিউজ ডেস্ক, ১৬ জুনঃ ৰাজধানী দিল্লীত প্ৰতিদিনে দ্ৰুত গতিত বৃদ্ধি পোৱা কোভিড-১৯ৰ ৰোগীৰ প্ৰতি লক্ষ্য ৰাখি দিল্লীৰ সকলো কোভিড-১৯ হাস্পতালতে চিচি কেমেৰা লগোৱাৰ নিৰ্দেশ প্ৰদান কৰিছে। দিল্লী চৰকাৰৰ স্বাস্থ্য বিভাগক ২৪ ঘণ্টাৰ ভিতৰত সকলো হাস্পতালতে চিচি কেমেৰা লগোৱাৰ নিৰ্দেশ প্ৰদান কৰিছে গৃহমন্ত্ৰী অমিত শ্বাহে।
ইয়াৰ পূৰ্বে ৰাজধানী চহৰখনৰ কোভিড-১৯ ৰ শেহতীয়া পৰিস্থিতিৰ বুজ লোৱাৰ বাবে গৃহমন্ত্ৰীগৰাকীয়ে আয়োজন কৰিছিল সৰ্বদলীয় বৈঠকৰ । তাৰ পাছত দিল্লীৰ লোক নায়ক পাল জয়প্ৰকাশ নাৰায়ণ (LNJP) হাস্পতাল পৰিদৰ্শন কৰে গৃহমন্ত্ৰী অমিত শ্বাহে। হাস্পতাল পৰিদৰ্শনৰ পাছতে দিল্লীৰ মুখ্য সচিব বিজয় কুমাৰ দেৱক ৰাজধানী চহৰখনৰ সকলো কোভিড-১৯ হাস্পতালৰ ৱাৰ্ডসমূহত চিচি টিভি কেমেৰা সংস্থাপন কৰাৰ নিৰ্দেশ প্ৰদান কৰে। লগতে, ৰোগীৰ চোৱা-চিতাৰ বাবে চিচি টিভি কেমেৰাসমূহৰ সূক্ষ্ম নিৰীক্ষণ কৰাৰ নিৰ্দেশ প্ৰদান কৰে গৃহমন্ত্ৰীগৰাকীয়ে।
এই নিৰ্দেশ অনুসৰি 'PWD' বিভাগে ২৪ ঘণ্টাৰ ভিতৰত দিল্লীৰ সকলো কোভিড-১৯ ৱাৰ্ডত চিচি টিভি কেমেৰা সংস্থাপিত কৰিব আৰু এই সকলো ৰিপৰ্ট "pshealth@nic.in." ৱেৱচাইটত আপডেট কৰিব লাগিব।
তদুপৰি, দিল্লীৰ লোক নায়ক পাল জয়প্ৰকাশ নাৰায়ণ হাস্পতাল পৰিদৰ্শন কৰি নেতাগৰাকীয়ে চিকিৎসক আৰু নাৰ্চসকলক মনোৰোগ বিশেষজ্ঞৰ পৰামৰ্শ ল'বলৈ আহ্বান জনায় । কোভিড-১৯ ৰ এই সংকটৰ সময়ত নিজৰ সেৱা আগবঢ়োৱা ক্ষেত্ৰত মনোবল বৃদ্ধি কৰিবলৈ চিকিৎসক আৰু নাৰ্চসকলক এই পৰামৰ্শ আগবঢ়াই জ্যেষ্ঠ বিজেপি নেতাগৰাকীয়ে।
