নিউজ ডেস্ক, ২৮ জুনঃ শনিবাৰে মন্ত্ৰী পৰিষদে নিৰ্মাণৰত অৱস্থাত থকা ৪৫০ খন বিচনাযুক্ত বুৰাৰী হাস্পতালক সম্পূৰ্ণৰূপে মহামাৰী COVID-19ৰ হাস্পতাল হিচাপে নিৰ্মাণ কৰিবলৈ অনুমতি প্ৰদান কৰে । দিল্লী চৰকাৰে সদৰী কৰা অনুসৰি, বিগত এসপ্তাহ পূৰ্বে স্বাস্থ্য আৰু পৰিয়াল কল্যাণ বিভাগে নিৰ্মাণৰত ৪৫০ খন বিচনাযুক্ত বুৰাৰীস্থিত এখন হাস্পতাল COVID-19ত আক্ৰান্ত ৰোগীৰ বাবে আগবঢ়াবলৈ প্ৰস্তাৱ দিছিল । এই প্ৰস্তাৱক শনিবাৰে মন্ত্ৰী পৰিষদে অনুমতি প্ৰদান কৰে বুলি সদৰী কৰে দিল্লী চৰকাৰে ।
দিল্লীৰ মুখ্যমন্ত্ৰী অৰবিন্দ কেজৰিৱালে এক প্ৰেছ বিবৃতিৰ জৰিয়তে কয় যে, বৰ্তমান COVID-19ত আক্ৰান্ত ৰোগীৰ বাবে আমাৰ লগত সাজু হৈ আছে ১৩,৫০০ খনতকৈ অধিক বিচনা । কেন্দ্ৰীয় চৰকাৰেও বুৰাৰীস্থিত এখন হাস্পতালত বিচনাৰ সংখ্যা বঢ়াবলৈ ধনৰাশি আগবঢ়াব বুলি অনুমতি দিছে । মই ভাবো ভৱিষ্যতে আমাক আইচিইউ বিচনাৰ আৱশ্যকতা হ'ব । সেইবাবে আমি এই সন্দৰ্ভত কাম কৰি আহিছো ।
