নিউজ ডেস্ক, ২৯ জুন : শুকুৰবাৰে গৃহমন্ত্ৰী অমিত শ্বাহে কাশ্মীৰৰ সন্ত্ৰাসবাদ আৰু ৰাজ্যখনৰ বৰ্তমানৰ পৰিস্থিতিৰ বাবে জগৰীয়া কৰে কংগ্ৰেছক । প্ৰাক্তন প্ৰধানমন্ত্ৰী জৱাহৰলাল নেহৰুৰ বাবেই তিনি ভাগৰ এভাগ ভাৰতৰ ভূ - খণ্ড পাকিস্তানৰ অধীনলৈ যোৱা বুলি অভিযোগ আনে শ্বাহে ।
জুলাইৰ ৩ তাৰিখৰ পৰা ছয় মাহৰ বাবে জম্মু - কাশ্মীৰত ৰাষ্ট্ৰপতি শাসন বৃদ্ধি কৰা সন্দৰ্ভত উত্থাপন হোৱা প্ৰশ্নৰ উত্তৰ প্ৰদান কৰি শ্বাহে এনেদৰে মন্তব্য কৰে । কংগ্ৰেছ চৰকাৰৰ শাসন কালত যিবোৰ নীতি গ্ৰহণ কৰা হৈছিল সেই নীতিৰ ফলত জম্মু - কাশ্মীৰ আৰু সমগ্ৰ ৰাষ্ট্ৰৰ লোকৰ মাজত বিভেদৰ সৃষ্টি হ'ল বুলি তেওঁ দাবী কৰে । তেওঁ লগতে মন্তব্য কৰে যে, বিজেপি চৰকাৰে এই বিভেদ আৰু সন্ত্ৰাসবাদ নাইকিয়া কৰিবৰ বাবে যৎপৰোনাস্তি চেষ্টা অব্যাহত ৰাখিব ।
