নেশ্যনেল ডেস্ক, 7 ডিচেম্বৰ : চলিত বৰ্ষৰ জানুৱাৰীৰ পৰা নৱেম্বৰলৈ উত্তৰ প্ৰদেশৰ উন্নাও জিলাত সৰ্বমুঠ 86 টাকৈ ধৰ্ষণকাণ্ড সংঘটিত হৈছে ৷ ইয়াৰ ফলত জিলাখন উত্তৰ প্ৰদেশৰ 'ৰেপ কেপিটেল' হিচাপে পৰিগণিত হৈছে ৷
লক্ষ্নৌৰ পৰা 63 কি.মি. আৰু কানপুৰৰ পৰা 25 কি.মি. নিলগত অৱস্থিত 31 লাখ জনসংখ্যাৰ উন্নাও ৷
প্ৰতিবেদন অনুসৰি, এই 11 মাহত মহিলাৰ ওপৰত সংঘটিত শাৰীৰিক নিৰ্যাতনৰ গোচৰ সৰ্বমুঠ 185 টা ৷
কুলদীপ চেংগাৰ আৰু বৃহস্পতিবাৰে ধৰ্ষণৰ ভুক্তভোগী গৰাকীক জ্বলাই দিয়াৰ উপৰি বহুকেইটা জটিল ধৰ্ষণকাণ্ড জিলাখনত ঘটিছে ৷ জিলাখনত 1 নৱেম্বৰৰ দিনাও এগৰাকী মহিলাৰ ধৰ্ষণৰ ঘটনা সংঘটিত হৈছে ৷
উন্নাওৰ অশোহা, আজগাইন, মাখি, বাংগাৰমাউত ধৰ্ষণ আৰু শ্লীলতা হানিৰ গোচৰ ৰুজু হৈছে ৷
অধিক সংখ্যক গোচৰত অভিযুক্তক আটক কৰাৰ পাচতে জামিনত মুকলি কৰা হয় অথবা আত্মগোপন কৰি হাৰিবলৈ সক্ষম হয় ৷
ইয়াৰ বাবে স্থানীয় লোকে আৰক্ষীকে জগৰীয়া কৰিছে ৷
মহিলাৰ ওপৰত এনে ধৰণৰ ঘটনা বৃদ্ধি পাই অহাৰ বিৰুদ্ধে কংগ্ৰছ নেতা প্ৰিয়ংকা গান্ধী ভদ্ৰাই কয়, "আইন-কানুন নিয়ন্ত্ৰণ কৰাটো চৰকাৰৰ দায়িত্ব ৷ উন্নাওতে বিগত 11 মাহত প্ৰায় 90 টাকৈ ধৰ্ষণকাণ্ড সংঘটিত হৈছে ৷"
"উন্নাওৰ আৰক্ষী বিভাগৰো সম্পূৰ্ণৰূপে ৰাজনীতিকৰণ কৰা হৈছে ৷ ৰাজনৈতিক নেতাসকলে আদেশ নিদিয়ালৈকে তেওঁলোকে এখোজো আগ নাবাঢ়ে ৷ ইয়াৰ ফলত অপৰাধীসকল উদ্বুদ্ধ হৈছে ৷" এই মন্তব্য আজগাইনৰ বাসিন্দা ৰাঘৱ ৰাম শুক্লাৰ ৷
উত্তৰ প্ৰদেশৰ বহুকেইজন শীৰ্ষ ৰাজনৈতিক নেতা উন্নাওৰ বাসিন্দা ৷ তেওঁলোকৰ ভিতৰত আছে উত্তৰ প্ৰদেশ বিধানসভাৰ অধ্যক্ষ হৃদয় নাৰায়ন ডিক্সিট, আইন মন্ত্ৰী ব্ৰিজেশ পাঠক আৰু বিজেপি সাংসদ সাক্ষী মহাৰাজ ৷
"ৰাজনীতিৰ ফলত ইয়াত অপৰাধ বৃদ্ধি পাইছে ৷ অপৰাধৰ জৰিয়তে ৰাজনীতিত বৰ্তী থাকিবলৈ ৰাজনীতিবিদসকলে চেষ্টা চলাই আহিছে আৰু আৰক্ষী তেওঁলোকৰ হাতৰ পুতলা হৈ আছে ৷ এনেকুৱা এটাও উদাহৰণ নাই যেতিয়া আৰক্ষীয়ে গুৰুত্ব সহকাৰে দায়িত্ব পালন কৰিছে ৷" এজন স্থানীয় অধিবক্তাৰ মন্তব্য ৷
উন্নাও ধৰ্ষণকাণ্ডৰ সৈতে জড়িত বিজেপি সাংসদ কুলদীপ চেংগাৰ ইয়াৰ এক বৃহৎ উদাহৰণ ৷
গোচৰ ৰুজু কৰাৰ 9 মাহলৈকে আৰক্ষীয়ে কোনো তদন্ত নকৰাত ভুক্তভোগী গৰাকীয়ে লক্ষ্নৌত উপস্থিত হৈ মুখ্যমন্ত্ৰীৰ আৱাসগৃহৰ সন্মুখত আত্মজাহ কৰাৰ চেষ্টা কৰিছিল ৷ ইয়াৰ পাচতহে আৰক্ষীয়ে তদন্তৰ দায়িত্ব গ্ৰহণ কৰিছিল ৷
ভুক্তভোগীৰ পিতৃক গ্ৰেপ্তাৰ কৰি জেলৰ ভিতৰত অভিযুক্তৰ ভাতৃয়ে আৰক্ষীৰ জিম্মাতে হত্যা কৰিছিল ৷
মিডিয়াৰ প্ৰভাৱত কুলদীপ চেংগাৰ আৰু তেওঁৰ ভাতৃক গ্ৰেপ্তাৰ কৰা হৈছিল যদিও ভুক্তভোগী গৰাকীক সুৰক্ষা প্ৰদানৰ ক্ষেত্ৰত কোনো ব্যৱস্থা গ্ৰহণ কৰা নাছিল ৷ ইয়াৰ ফলত এই বৰ্ষৰ জুলাই মাহত আদালতলৈ যোৱাৰ পথত ভুক্তভোগী গৰাকীৰ গাড়ীখন দুৰ্ঘটনাগ্ৰস্ত কৰা হৈছিল আৰু তেওঁৰ সৈতে অধিবক্তা গৰাকী গুৰুতৰভাৱে আহত হৈছিল আৰু তেওঁৰ দুগৰাকী সম্বন্ধীয়ই মৃত্যুক সাৱটি লৈছিল ৷
বৃহস্পতিবাৰৰ ঘটনাতো ভুক্তভোগী গৰাকীক কোনো সুৰক্ষা প্ৰদানৰ চেষ্টা নকৰাৰ বাবেই তেওঁক জ্বলাই দিয়া হৈছিল ৷ অভিযুক্তকো আৰক্ষীয়ে 30 নৱেম্বৰত আৰক্ষী জিম্মাৰ পৰা মুকলি কৰি দিছিল ৷
