নেশ্বনেল ডেস্ক, 3 ছেপ্তেম্বৰ : মহাৰাষ্ট্ৰৰ নবী মু্ম্বাইত মঙলবাৰে অ'এনজিচিৰ গেছ প্ৰচেছিং প্লান্টত বিধংসী অগ্নিকাণ্ডত পাঁচজনকৈ লোকৰ মৃত্যু হৈছে ৷ ইয়াৰোপৰি, তিনিজনকৈ লোক অগ্নিকাণ্ডত গুৰুতৰভাৱে আহত হৈছে ৷ আৰক্ষী বিভাগে জানিবলৈ দিয়া অনুসৰি, মঙলবাৰে পুৱা 7 বজাত এই ঘটনা সংঘটিত হয় ৷ অ'এনজিচিৰ লগতে অন্য 22 খন অগ্নিনিৰ্বাপক গাড়ীৰ জৰিয়তে জুই নিয়ন্ত্ৰণ কৰা হয় ৷ এই বিধংসী অগ্নিকাণ্ডৰ সঠিক কাৰণ বৰ্তমানলৈকে জানিব পৰা হোৱা নাই ৷ অ'এনজিচি বিভাগৰ পৰা দিয়া তথ্য অনুসৰি, তেলৰ প্ৰচেছিঙত কোনো ধৰণৰ প্ৰভাৱ পৰা নাই যিহেতু গেছবোৰ গুজৰাটৰ চুৰাট জিলাৰ হাজিৰা প্লান্টলৈ পঠিয়াই দিয়া হয় ৷
উল্লেখ্য যে, আহত কেইজনক ততাতৈয়াকৈ ওৰান চিকিৎসালয়লৈ প্ৰেৰণ কৰা হয় ৷ আনহাতে, অগ্নিনিৰ্বাপক বাহিনীয়ে দুঘন্টাৰ ভিতৰত জুই নিৰ্বাপন কৰিবলৈ সক্ষম হয় বুলি অ'এনজিচিৰ তৰফৰ পৰা জানিবলৈ দিয়া হৈছে ৷
