অৰুণাচল, 20 মাৰ্চ : অৰুণাচল প্ৰদেশৰ ৰাজনীতিত ধুমুহা ! লোকসভা নিৰ্বাচনৰ আগমুহূৰ্তত অৰুণাচলত খহিছে বিজেপিৰ দুৰ্গ ৷ মঙলবাৰে সন্ধিয়া বিজেপি এৰি আঞ্চলিক দল এন পি পিত সমূহীয়া যোগদান ৰাজ্যখনৰ দুগৰাকীকৈ মন্ত্ৰীৰ লগতে 12গৰাকীকৈ বিধায়কৰ ৷ এন পি পিৰ ৰাষ্ট্ৰীয় সাধাৰণ সম্পাদক থমাছ চাংমাৰ উপস্থিতিত দলটোত যোগ দিয়ে ৰাজ্যখনৰ বিজেপিৰ ৰাজ্যিক সাধাৰণ সম্পাদক জাৰপুম গামলিনৰ লগতে মন্ত্ৰী-বিধায়ককেইগৰাকীয়ে ৷ ইপিনে 14 জনকৈ মন্ত্ৰী-বিধায়কে দলত্যাগ কৰাৰ পাচতে এতিয়া ৰাজ্যখনৰ 60 জনীয়া বিধানসভাত বিজেপিৰ আসনৰ অবনমিত হয় ৩৪ খনলৈ ৷আসন্ন লোকসভা নিৰ্বাচনৰ লগতে ৰাজ্যখনৰ বিধানসভা নিৰ্বাচনৰ আগমুহূৰ্তত এনেদৰে এক বৃহৎ সংখ্যক বিজেপি নেতা তথা মন্ত্ৰী-বিধায়কে দলত্যাগ কৰাটো বিজেপিৰ বাবে মোক্ষম আঘাত বুলি বিবেচিত হোৱাৰ বিপৰীতে ইয়ে আঞ্চলিক দল এম পি পি লৈ আনিছে সুখবৰ৷
উল্লেখ্য যে, সোমবাৰে নিশাই জাৰপুম গামলিনৰ লগত বিজেপিৰ এটা ৭জনীয়া মন্ত্ৰী-বিধায়কৰ দল আহি গুৱাহাটীৰ হোটেল তাজ ভিভাণ্টাত বাহৰ পাতি এন পি পিৰ মুৰব্বী কনৰাড চাংমাৰ সৈতে মিলিত হৈছিল কেইবাঘণ্টাজোৰা এক বৈঠকত ৷ তাৰ পাচতেই মঙলবাৰে অৰুণাচলৰ দুগৰাকী মন্ত্ৰীৰ লগতে 12 গৰাকীকৈ বিধায়কে যোগ দিয়ে এন পি পিত ৷
