নিউজ ডেস্ক,৭ মাৰ্চ: শনিবাৰে গুজৰাটৰ খেডা জিলাত সেনাৰ এখন হেলিকপ্তাৰে জৰুৰী অৱতৰণ কৰে । যান্ত্ৰিক বিজুতিৰ ফলত জৰুৰী অৱতৰণ কৰে সেনাৰ হেলিকপ্তাৰখনে । হেলিকপ্তাৰখনত সেনাৰ লেফটেনেণ্ট জেনেৰেলকে ধৰি তিনিগৰাকী সেনা আছিল । এই ঘটনাত কোনো আহত হোৱা নাই বুলি সেনাৰ সূত্ৰই জানিবলৈ দিয়ে ।
তিনিদিনীয়া সংযুক্ত কমাণ্ডাৰ সন্মিলন সমাপ্তিৰ পাচত শনিবাৰে ৰাতিপুৱা নৰ্মদা জিলাৰ কেৱাড়িয়াৰ পৰা উভতি অহাৰ সময়তে সেনাৰ হেলিকপ্তাৰখনৰ যান্ত্ৰিক বিজুতি ঘটে । গুজৰাটৰ খেডা জিলাৰ বীনা গাঁৱৰ এখন ফাৰ্মত জৰুৰীকালীন অৱতৰণ কৰাৰ ফলত অঞ্চলটো সম্প্ৰতি বন্ধ কৰি দিয়া হয় । হাইড্ৰলিক তেল লিকেজৰ বাবে এই যান্ত্ৰিক বিজুতি ঘটে বুলি জানিবলৈ দিয়ে সেনা সূত্ৰই ।
লগতে পঢ়ক: নিজ দেশৰ নাগৰিকক ভাৰতৰ পৰা ঘূৰাই পঠিওৱাৰ আহ্বান ম্যানমাৰৰ
