নেশ্যনেল ডেস্ক,২২ জুন: ২০০৫ চনত সন্ত্ৰাসবাদীৰ আক্ৰমণৰ লক্ষ্য হৈছিল ইণ্ডিয়ান ইনষ্টিটিউট অৱ চাইন্স (IISC) । এই ঘটনাৰ তদন্ত কৰিছিল ৰাষ্ট্ৰীয় অনুসন্ধান সংস্থাই(NIA)। দীৰ্ঘদিনীয়াকৈ চলি আছিল এই ঘটনাৰ বিচাৰ প্ৰক্ৰিয়া । মঙলবাৰে এই বিচাৰ প্ৰক্ৰিয়াৰ অন্তত বেঙ্গালুৰুৰ এন আই এৰ বিশেষ আদালতে এগৰাকী অভিযুক্তক দোষমুক্ত ঘোষণা কৰে । অভিযুক্তজনৰ বিৰুদ্ধে তদন্তকাৰী সংস্থাটোৱে পৰ্যাপ্ত পৰিমাণৰ প্ৰমাণ দিব নোৱাৰাৰ বাবেই অৱশেষত মুকলি কৰাৰ নিৰ্দেশ দিয়ে এন আই এৰ বিশেষ আদালতে ।
২০০৫ চনত ইণ্ডিয়ান ইনষ্টিটিউট অৱ চাইন্স (IISC)ত উগ্ৰপন্থীৰ গুলীচালনাৰ গোচৰত গ্ৰেপ্তাৰ হোৱা ত্ৰিপুৰাৰ বাসিন্দা মহম্মদ হাবিবক বেংগালুৰুৰ এন আই এৰ(NIA) বিশেষ আদালতে মুক্তি দিয়ে । এনআইএৰ বিশেষ ন্যায়ালয়ৰ ন্যায়াধীশ ড০ কাছানাপ্পা নায়কে মহম্মদ হাবিবৰ বিৰুদ্ধে কোনো প্ৰাসংগিক প্ৰমাণ নাই বুলি কৈ মুক্তিৰ নিৰ্দেশ দিয়ে । ২০০৫ চনৰ IISC সন্ত্ৰাসবাদী আক্ৰমণৰ গোচৰৰ সপ্তম অভিযুক্ত হাবিবক আৰক্ষীয়ে গোচৰটোৰ প্ৰথম অভিযুক্ত শ্বাহবুদ্দিন আহমেদৰ ভাষ্যৰ আধাৰত গ্ৰেপ্তাৰ কৰিছিল ।
তেওঁ ২০০৮ চনত আৰক্ষীক কোৱা মতে বাংলাদেশ ভ্ৰমণৰ সময়ত তেওঁ ত্ৰিপুৰাৰ আগৰতলাত হাবিবক লগ পাইছিল । সেয়ে ২০১৭ চনত বেংগালুৰুৰ IISCত সন্ত্ৰাসবাদী আক্ৰমণত সহায় কৰাৰ অভিযোগত হাবিবক আৰক্ষীয়ে গ্ৰেপ্তাৰ কৰিছিল । উল্লেখ্য যে ২০০৫ চনত বেংগালুৰুৰ ইণ্ডিয়ান ইনষ্টিটিউট অফ চাইন্সত গুলীচালনাৰ ঘটনা সংঘটিত হৈছিল যাৰ ফলত এজন লোকৰ মৃত্যু হৈছিল আৰু আন কেইবাজনো লোক আঘাতপ্ৰাপ্ত হৈছিল ।
প্ৰথমতে সদাশিৱনগৰ আৰক্ষী থানাত এটা গোচৰ ৰুজু কৰা হৈছিল । গোচৰটোৰ তদন্ত পিছত এন আই এক(NIA) হস্তান্তৰ কৰা হৈছিল । এন আই এৰ বিষয়াসকলে ভাৰতীয় দণ্ডবিধিৰ অস্ত্ৰ আইন, বিস্ফোৰক পদাৰ্থ আইন আৰু অবৈধ কাৰ্যকলাপ নিয়ন্ত্ৰণ আইনৰ প্ৰাসংগিক ধাৰাৰ অধীনত এটা গোচৰ ৰুজু কৰিছিল ৷ এই গোচৰটোত চাৰি বছৰ পূৰ্বে কাৰাগাৰত বন্দী হৈ থকা মহম্মদ হাবিবে চিআৰপিচিৰ(CRPC) ২২৭ ধাৰাৰ অধীনত ডিচচাৰ্জ বিচাৰি আবেদন দাখিল কৰিছিল ৷
লগতে পঢ়ক:গণ প্ৰহাৰত যুৱকৰ মৃত্যু: উচ্চ পৰ্যায়ৰ তদন্তৰ দাবী মানিক সৰকাৰৰ
